Iromayon 16 - AKITUTUKET NAKITETET (NEPEPEKA ISABULIN KA AWARAGASIA)

Amalan keng' kelope

¹ Ainakini eong' osi kinaci kang' Fibi, na ijaanakini ko okanisa kaloka Senikri.

² Kidiautu nesi ko okiror ka Lokapolon, kwape itemokinar ka Akuju asoma. Koinakisi nesi aking'arasit kere na ekote nesi kama kus. Naarai eng'araki nesi itung'a lu ipu atikere eong' de.

³ Kimalakisi eong' Prisila kiton Akwila, lu isomaete ka eong' asoma ka Yesu Kristo,

⁴ Abutu kesi kopalata akijar kes kanu kang'. Eyalamikiit eong' kesi, mere eong' bon konye kanuka ikanisai kere luka Ilong'au.

⁵ Kimalata ekanisa lo iriamanakin otogo kes. Kimalata Epaenetas, opaupa kang', lo agei akiyuun Kristo ko Asia.

⁶ Kimalata Maria, na esoma kagogong'u kanu kus.

⁷ Kimalata Andronikas kiton Yunia, Iyaudin kang' lu ajaasi ka eong' toma aenis. Ejenuna kesi noi kamaka ikiyakia. Bobo kesi ageete araun Ikristayon kama kang'.

⁸ Kimalata Amupiliatas, lominata kang' kamaka Lokapolon.

⁹ Kimalata Arbanas, epe kamaka lu kesomaka ka siong' kasoma ka Kristo, kiton Stakis lominata kang'.

¹⁰ Kimalata Apeles, na adaun akitutuboor ayong'ite keng' Kristo. Kimalata ng'ulu kere luko otogo ka Aristobalas.

¹¹ Kimalata Erodion opajana kang', Eyaudit kang', kiton Ikristayon luko otogo ka Narisisas.

¹² Kimalata Trufena kiton Trufosa, nukejaanakinak nu isomaete asoma ka Lokapolon, kiton Pasis apoupa kang' naminat, na esomaki Lokapolon asoma nu ipu noi.

¹³ Kimalata Rufus, etwan lo icasit noi kasoma ka Lokapolon, kiton toto keng' na abu koya eong' bala esapata keng'.

¹⁴ Kimalata Asinkritas, Filegon, Ermes, Patrobas, Ermas, kiton ikanacan ka akanacan lu ejaasi ka kesi.

¹⁵ Kimalata Filologas, Julia, Nerias kiton kinaci keng', Olimpas kiton itung'a kere luka Akuju lu ejaasi ka kesi.

¹⁶ Kimalasi kanuikin kanakalaunan. Ikanisai kere luka Kristo kimalato osi.

Acorasia nuka Esial

¹⁷ Elipit eong' osi ikanacan ka akanacan kang' ebe, kocoikinosi kang'ulu kalu eyauto atiakatiaka kiton akicoko akiyuun naka itung'a, ka akitepege akisisianakino na idumutu osi. Kikunyasi kama kes!

¹⁸ Naarai itung'a ng'ulu mam kijaanakinete Lokapolon wok Kristo, konye nu ekotosi kesi. Kotoma akiro kes nukajokak kiton ejori loka aijodo ing'alaete kesi itung'a lu ewolito.

¹⁹ Ng'in itwan adau akiirar kuju ka amunokina kus akiro nukalaunak. Kanuka ng'unu, alakara eong' kanu kus. Akote eong' osi kojaasi ka acoa ikamuuti ng'in ni elae, konye koraite ibang'ai kakiro kanukarokok.

²⁰ Akuju loka aipuc apuut akibirokin Ajokit kwap akejen kon. Kojaasi asianut ka Lokapolon wok Yesu ka osi.

²¹ Kimalate Timoti lo isomaete ka eong' osi. Lusias de, ka Jason, kiton Sosipita, Iyaudin kang' kimalaete osi.

²² Eong' Taritias, lokegiran epapula lo kemalate osi.

²³ Kimalate osi Gayo, lokidiaut eong' kiton ekanisa kere. Kimalato osi Erasto lokegwan ko ore ka lokapolon kiton onaci wok Kuaritas.

²⁴ Kojii asianut ka Lokapolon wok Yesu Kristo ka osi kere. Ikote nepeneni.

Akilip naka esial naka Akitur

²⁵ Kainakisi Akuju akibusesu! Ebeikini nesi ainakin osi apedor naka akigwo icasito kotoma akiyuun kus, atupa ka Akiro Nukalaunak nu alimonorit eong' kuju ka Yesu Kristo bobo atupa ka apukokino naka abeite nakigwaite ikaru ka ikaru.

²⁶ Konye kipokona abeite ng'ini etejenun akwapin kere akitor agirasia ka ikadwarak, kiton acorasit naka Akuju loka ikaru kere, kanuka ayaun ayong'it naka akiyuun.

²⁷ Kamaka Akuju ka epe bon, lo ejaasi ka acoa, kojai akibusesu akitor namaka Yesu Kristo ikaru ka ikaru! Ikote nepeneni.