Iromayon 14 - AKITUTUKET NAKITETET (NEPEPEKA ISABULIN KA AWARAGASIA)

Mam atubonokini osi ikulopek

¹ Kidiautu ng'ulu lu enonok akiyuun kes. Konye mam apega ka kesi kuju ka awomowomisio kes.

² Akiyuun ka itung'a kice ecamakiit kesi akinyama ibore kere. Konye itwan ni enonok kotoma akiyuun enyemi edia bon.

³ Ng'ulu lu enyemete ng'ini ibore mam akitamamuute ng'ulu lu mam kenyemete ng'ini ibore. Ng'ulu de lu inyemete edia bon mam atubonokin ng'ulu lu enyemete iboro kere, naarai acamu Akuju kesi.

⁴ Ing'ai ijo ni itubonokin lukejaanakinak ketwaan kece? Erait ejakait kes kikulopek nes etiakuni kitolototo kesi kojokan kere kibirorosi kesi. Itolosete kesi kojokan naarai ebeikini Lokapolon aking'arakin kesi kitolototo kojokan.

⁵ Itunenete itung'a ice ebe apaaran mutan ejokuna noi akilanya apaarasia nuce. Itunenete ice ebe apaarasia kere eputosi. Ng'ini itwan kotupu nu aseutu adama keng'.

⁶ Ng'ulu lu itopolorito apaaran mutan, isomaete kanuka ayong'ite Lokapolon. Ng'ulu lu enyemete ng'ini ibore isomaete kanuka ayong'ite Lokapolon naarai iyalaminikinete kesi Akuju kanuka inyamata. Ng'ulu lu eng'erito akinyama iboro mutan isomaete kanuka ayong'ite Lokapolon. Bobo iyalamikiito kesi Akuju.

⁷ Emam ipede kama wok ejari kanu keng' bon, emam ipede kama wok etwani kanu keng' bon.

⁸ Kijarete oni, ijarete oni kanuka Lokapolon. Bobo kitwakata oni, itwakate oni kanuka Lokapolon. Kanuka ng'unu, atikere kijarata oni kere de kitwakate oni, iraito oni luka Lokapolon.

⁹ Naarai atwani Kristo ka ajarun tetere erauni nesi Lokapolon kalu ejarete kiton lu etwakito.

¹⁰ Kanuka ng'un, osi lu inyemete edia bon inyo itubonokinata osi luce? Osi de lu inyemete ng'ini iboro, inyo itamamuutetere osi lukeyuunak luce? Oni kere ibuuto akigwo koking'aren ka Akuju kotubonok nesi oni.

¹¹ Naarai ebalasi agirasia nukalaunak be: “Ebala Lokapolon ebe abeite, karait eong' cut Akuju lo ejari, ebuni ng'ini akong'i akukokin koking'aren kang'. Ebuni ng'ini ang'ajepe alimor ebe arait eong' Akuju.”

¹² Ejii ng'in itwan kama wok alemun aimario keng' kamaka Akuju.

Mam ainakin nice ibiror

¹³ Kanuka ng'unu kenyekisi atubonokin luce. Konye ejii osi atyakun mam cut asoma ibore ipede ni einakini nice egatar kere de ibirokin toma aronus.

¹⁴ Kotoma akimorikikina kang' nepepe ka Lokapolon Yesu, ajaasi eong' cut ka abeite ebe, emam inyamata lu eroko. Konye kemunokiit itwan ebe eroko inyamata mutan, teni erokaarosi kamaka itwan kang'ini.

¹⁵ Kitakadik ijo onaci kon kere kinac kon kanuka inyamata kalu inyemi ijo, mam ijo kisomae nuka amina. Mam acamakin inyamata lu inyemi ijo ibirorete itwan ni abu Kristo kotwana kanu keng'!

¹⁶ Kanuka ng'un, mam akinyekin ajokus kon etemaro erono.

¹⁷ Naarai ajakaanut ka Akuju mam kerait akiro nuka akinyama ka akimata, konye erait naka adolit, aipuc, kiton alakara kamaka Emoyo Lokalaunan.

¹⁸ Na ijaanakinata itung'a Kristo kokipone kalo, italakarete kesi Akuju bobo ecamuuto itung'a kesi.

¹⁹ Kanuka ng'unu, ejii oni ng'in pak akote asoma iboro lu eyaunete aipuc kiton lu edukete itung'a kere.

²⁰ Mam amunaun nu esoma Akuju kanuka inyamata. Inyamen kere ebeikinosi enyemio. Konye erono akinyama ng'ini ibore ni idupori elomi itwan ice toma aronus.

²¹ Ibore ni ederi akisomakin erait aking'ere akinyama akiring', mam akimata ebino, kere de mam asoma ibore kere ni idupori onaci kon kere kinaci kon ibiror.

²² Koricaki akiyuun kon ikamuuti iboro lu, koraite kiding' kon bon kiton Akuju. Elakara ng'ulu lu mam kaanyuto ebe isomato kesi arokusio na isomata kesi ibore ni iteete kesi ebe edolit!

²³ Konye kibuwonokinete kesi kuju ka iboro kalu enyemete kesi, etubokini Akuju kesi na enyemiata kesi, naarai asomisio kes mam kecamara ka akiyuun. Bobo ibore kere ni mam kecamara ka akiyuun erait aronus.