Iromayon 13 - AKITUTUKET NAKITETET (NEPEPEKA ISABULIN KA AWARAGASIA)

Nu Ibusakinit Akisomakin lu Ipugaete Akwap

¹ Ejii ng'in itwan akiyong'o lu ipugaete akwap, naarai emam apugan na ejaikin emam Akuju kecamuut. Bobo Akuju nes ipiakiit ng'ulu lu ipugaete akipuga.

² Ng'ini kere ni eng'erit apugan na ipugae, eng'erit apugan na aseu Akuju. Bobo ng'ini kere ni isomae ng'unu, etubokino.

³ Mam kitemokina ng'ulu lu isomaete nukajokak akurianu lu ipugaete emam kerait ng'ulu lu isomaete aronus. Ikotosi osi araus itung'a lu mam kikurianito ng'ulu lu ejaasi apugan? Kisoma nu ejooka, bobo ebunete kesi akitama osi,

⁴ naarai eraito kesi lukejaanakinak ka Akuju lu isomaete kanuka ajokus kus kikulopek. Konye kisomaete osi nukarokok, kokurianite kesi, naarai apedor kes naka akitisilar erait abeite. Eraito kesi lukejaanakinak luka Akuju bobo lu isomaete aitisilaro ka Akuju kamaka ng'ulu kalu isomaete arokusio.

⁵ Kanuka atenikina kana ejii osi ayong'ite apugan, mere ebe kanuka aitisilaro ka Akuju bon, konye bobo kanuka ejautene ka tau kon.

⁶ Ng'ini nes atenikina bobo na itacata osi emusolo, naarai luka apugan isomakiito Akuju na isomata kesi nu itemokina kesi asoma.

⁷ Kanuka ng'un, kotacata kesi kijokin nu itemokina. Kotacata emusolo kus namaka lu itemokina akitaca emusolo. Koyong' ni itemokina akiyong'.

Nu ibusakina akisomanakin Luce

⁸ Mam ajaus ka apesen ka itwan kipede, adepar apesen naka amina bon. Naarai ng'ini ni emina ipaduko keng' esomaki ekisil.

⁹ Ikisila: “Sir kidote; sir kiar; sir kikokoo; sir king'obel iboro ka itwan ka nice,” Nu kere kiton ace kawai, imorikikiite kokisil ka epe, “Komina ipaduko kon kwape iminar ijo ilope.”

¹⁰ Kimina ijo itwan, mam ijo kisomakini nesi nukarokok. Kanuka ng'un, amina erait ayong'ite Ekisil kere.

¹¹ Ejii osi asoma nu, naarai ijenete osi adolu apaki nakus naka akwenyun ka ajo. Naarai apu noi apaki naka ayuuno wok akilanya apaki na ageunata oni akiyuun.

¹² Atubor akwaare sek, adolu apaaran. Kenyekisi asomisio nuka akwaare, kerumata ijiisio luka acaus.

¹³ Kayaitete akijar wok bala itung'a lu ejaasi toma acaus naka apaaran. Mam ajaus ka emwane kiton amera, mam asilianut kiton adoteu, ang'olopa kiton aminanar.

¹⁴ Konye konapata Lokapolon Yesu Kristo. Mam akitere nu ekote akwan, kere akisimonikin nu ekote akwana.