Iromayon 10 - AKITUTUKET NAKITETET (NEPEPEKA ISABULIN KA AWARAGASIA)

¹ Ikanacan ka akanacan, nu emina etau kang' bobo nu elipit eong' Akuju ikamuut kesi erait ebe koyuune kesi!

² Kalimokini eong' osi cut abeite ebe elemuna kesi cut kamaka Akuju. Konye mam alemuna kes kiriamara ka akijen naka abeite.

³ Mam kesi kejenuuto ekipone lo itodolinikina Akuju itung'a koking'aren keng' kelope. Konye atamakisi kesi irotin kes kikulopek. Kanuka ng'unu mam kesi ikulopek akiyong' eroto ka Akuju loka akitodolikin itung'a.

⁴ Etodolo Kristo Ekisil osial, tetere ng'in ni iyuuni itodolikino koking'aren ka Akuju.

Erait Ayuno naka itung'a kere

⁵ Abu Musa kigiri nu kuju ka akitodolikino koking'aren ka Akuju akitoro ayong'ite Ekisil: “Ng'ini kere ni eyong'it acorasia nuka Ekisil ebuni akijar.”

⁶ Konye nu ebalasi agirasia nukalaunak kuju ka akitodolikino koking'aren ka Akuju akitor akiyuun erait nu: “Mam kitemokina ijo aking'itakin ilope ibala ebe ing'ai elomi kuju?” (Nes atemar ayaun Kristo kwap).

⁷ “Kere de mere ijo aking'it ebe, ing'ai elosi toma akwap?” (Nes atemar, akitajarun Kristo kamaka lukatwaka).

⁸ Nu ebalasi agirasia kes nu: “Apu Akirot ka Akuju kama kon, kotoma akituk kon kiton toma otau kon,” akiro nuka akiyuun nu ilimonorete siong'.

⁹ Kilimo ijo kakituk kon ebe erait Yesu Lokapolon ka akiyuun kotau kon ebe abu Akuju kitajaru nesi alomun kamaka lukatwak, kiyuno ijo.

¹⁰ Naarai erait akitoro akiyuun wok nes itodolikinere oni koking'aren ka Akuju. Erait akitor alimor wok nes kiyunere oni.

¹¹ Ebalasi agirasia nukalaunak ebe, “Ng'ini kere ni emunokini nesi mam kitakadikino.”

¹² Imorikikiito nu ng'in itwan. Naarai emam agelakinet na ejii kiding' ka Iyaudin kiton Ilong'au. Erait Akuju Lokapolon epe jepeje loka itung'a kere, bobo isirereng'enene nesi cut ng'ulu kere lu iworoete ekiror keng'.

¹³ Kwape ebalatatar agirasia nukalaunak ebe, “Ng'ini kere ni enyarauni Lokapolon king'arak nesi eyuuno.”

¹⁴ Konye ikote kesi enyaraunete nesi king'araki kesi ai, kemam kesi kiyuuto? Ikote kesi iyunete ai kemam kesi kiirarito akiro? Ikote kesi iirarete akiro ai kemam kelimoro akiro?

¹⁵ Ikote akiro elimorosi ai kemam kiyakiarite ikiyakia? Kwape ebalatatar agirasia nukalaunak ebe, “Ejokuna noi abunore naka ekiyakia kalo eyauni akiro nukajokak!”

¹⁶ Konye mere itung'a kere ediautu Akiro Nukajokak. Abu Isaya elope kotema ebe, “Lokapolon, ing'ai kebu komunok akiro kosi?”

¹⁷ Kanuka ng'unu, ebuni akiyuun akitoro apupun akirot, akirot ebuni akitor akisiarasiara kuju ka Kristo.

¹⁸ Konye eng'isit eong' ebe: Erait abeite ebe mam kesi kepotu kopuputu akirot? Abeite apotu kesi kopuputu, naarai ebalasi agirasia nukalaunak ebe: “Eikarit aruore ka eporoto kes akwapa kere; edolito akiro kes osial ka akwap.”

¹⁹ Eng'isit eong' bobo: Mam itung'a luko Israel ajenun? Erait Musa elope nes losodit akinyakun: “Etosomae eong' ni enyarite akwap koinaki itung'a kang' alilit; bobo kakitisoma akwap na ejaasi ibang'aisik ianakini eong' itung'a kang' anyunyurar.”

²⁰ Bobo ketitiny Isaya ebala kona, “Kodumut eong' ng'ul lu amam kakotos eong'; Katakanikini ng'ulu lu amam king'isito eong'.”

²¹ Konye ikamuut Israel ebala nesi ebe, “Apaaran kere arwauti eong' akanin kang' akidiaun itung'a lu mam keyong'ara nepepe ka kalu emenito.”