Iromayon 1 - AKITUTUKET NAKITETET (NEPEPEKA ISABULIN KA AWARAGASIA)

¹ Alomun kamaka Paulo, lokejaanakinan ka Yesu Kristo kiton ekiyakia lo eseut Akuju ka anyaraun akisiarasiara Akiro keng' Nukajokak.

² Etumunikit Akuju akiro Nukajokak kokolong' sek akitoro namaka ikadwarak keng', kwape igiritere toma Agirasia Nukalaunak.

³ Erait kuju ka Okoku keng', Lokapolon wok Yesu Kristo. Inerai kuju ka etung'anane keng', arait nesi auri ka Daudi.

⁴ Ikamuut alaus keng' alomun kamaka Akuju, abu kitoduune nesi ejaasi ka apedor nakapolon noi naka araus Okoku ka Akuju kopone kaloka akitajaruno alomun katwanare.

⁵ Akitoro nama keng' abu Akuju koinaki eong' asianut naka araus ekiyakia kanuka Kristo, kanuka ayaite itung'a luka akwapin kere akiyuun ka akiyong'.

⁶ Ikamuuto nu osi de lu ijaasi Roma, lu anyarau Akuju araun luka Yesu Kristo.

⁷ Kanuka ng'un egirakiit eong' osi kere luko Roma lu emina Akuju, lu anyarau nesi araus itung'a keng': Elipit eong' koinaki Akuju Papa wok ka Lokapolon Yesu Kristo osi asianut nepepe ka aipuc.

Akilip naka akiyalama

⁸ Nasodit, eyalamikiit eong' Akuju kang' akitoro namaka Yesu Kristo kanu kus kere, naarai epupi akwap kere kuju ka akiyuun kus.

⁹ Akuju nesi ekajenan kang' ebe nu enera eong' eraito abeite. Akuju lo ejaanakini eong' ketau kang' kere kokipone koloka alimonor Akiro Nukajokak kuju ka Okoku keng'. Ejeni Akuju ebe eituuti eong' osi

¹⁰ ng'ini paki na elipia eong'. Elipit eong' ebe, Akuju kotoma akote keng' kanakajokan ebeikini kosial aking'arakin eong' kepejoki osi kipokona.

¹¹ Naarai kaminanari eong' cut anyun osi, tetere amorete oni asulwany nakalaunan kanuka akitogogong' osi.

¹² Apolou kanu abala eong' erait ebe osi ka eong' ing'arakino nenipe kakolong' kape. Akiyuun kang' king'arakini osi, nakus de king'arakini eong'.

¹³ Ejii osi ikanacan ka akanacan kang' akiitute ebe, kapakio kanu ipu etemeteme eong' akipejokin osi, konye kerebonokini eong' ng'ini pak ibore. Akote eong' akibeleun ice kama kus namaka Kristo, kwape ebeleuna eong' ilong'au ice.

¹⁴ Ajaasi eong' kasoma kotung'a kere, luka acoa ka ibang'aikis, lu isisiato kalu mam kisisiato.

¹⁵ Kanuka ng'un, kemuit eong' akisiarasiara Akiro Nukajokak kama kus kalu iboyete ko Roma.

Agogong' ka Akiro Kanukajokak kuju ka Yesu

¹⁶ Mam cut kasilikiito eong' Akiro Nukajokak. Erait apedor ka Akuju naka ayuuni ng'ulu kere lu iyuuto, lusodit Iyaudin nepepe ka ilong'au.

¹⁷ Naarai itoduunete Akiro Nukajokak ekipone lo imarakina Akuju itung'a keng' adolite koking'aren keng'. Erait akitor akiyuun alomun kageunet akitodol osial. Kwape ebalatatar agirasia nukalaunak ebe, “Itwan ni imarakino koking'aren ka Akuju ebe edolit akitor akiyuun, ebuni akijar.”

Adiakaret ka etung'anan

¹⁸ Etoduun anyunyura ka Akuju alomun kokuju namaka ang'erit ayong'ite Akuju kiton aronus naka ng'ulu kalu iimakiito abeite karonus kes.

¹⁹ Itisilari Akuju kesi, naarai nu ebeikinosi ajenun kuju ka Akuju etakanete kama kes, naarai abu Akuju elope kitoodu.

²⁰ Ape kesubuna Akuju akwap, ejautene keng' lo etakani, apedor keng' kere na emam kedaun kiton ejautene keng' loka araus Akuju, atakanu kotenan. Etakanete koboro kalu asubu Akuju. Kanuka ng'unu emam itung'a ng'ulu atenikina naka akigang'ite agwoetait kes!

²¹ Ejenete kesi Akuju, konye mam keyong'ito nesi kwape itemokinar. Bobo mam kesi kejaasi ka akiyalama kama keng'. Konye arautu awomowomosia kes abang'aanut cut, bobo elelebun akirionus toma adama kes nu eng'aara.

²² Ebalasi ebe ecuaka kesi, konye ebang'aaka kesi;

²³ tia kesi akimaa Akuju lo ejari ikaru kere, imaete kesi aputon nu itenite eputosi ka etung'anan lo etwani kere de ikwenyi, kere ityeng', kere ityeng' lu eliaete.

²⁴ Kanuka ng'unu, aisik Akuju itung'a ng'ulu kisomata iboro lukarokok lu itiminarit itawon kes. Bobo, isomaete kesi iboro luka asilutu kawate kes kikulopek.

²⁵ Ilokonyete kesi abeite ka Akuju kiton aliokonu. Imaete kesi ka akijaanakin iboro lukesubi Akuju tia akimaa Lokasuban elope, lo itemokina akitur nesi ikaru kere! Ikote nepeneni.

²⁶ Kanuka nu, ajalaki Akuju kesi kisomata asilut na eminasi itawon kes. Atikere aberu ejulakisi ejautene loka aelo, kosodi aberu ka aberu aelokin.

²⁷ Kokipone kalope kang'olo enyekisi ikiliok aelo ka aberu kwape kesubitere Akuju. Kogeunete ikiliok akijekete luce. Isomaete ikiliok iboro luka asilutu ka ikiliok kaluce. Kanuka nu eyaunete kesi ikulopek akitisilaro nama kes, akitisilaro na itemokina kesi adumun kanuka adiakareta kes.

²⁸ Kanu ang'eriata itung'a ng'ulu akipiakin toma adama kes acua naka abeite ikamuut Akuju, egwaki nesi kesi akanin kitung'a kalu ebosito adama, tetere isomaete kesi iboro lu mam kitemokina kesi asoma.

²⁹ Ileleba kesi arokusio nu egelegela, emwane ka iponesio lukarokok. Ileleba kesi eding', aara, ejie, aliokonu kiton agamanakin luce akiro. Esomete kesi

³⁰ ka ejori nukarokok kuju kaluce. Mam kesi keminasi Akuju, kipugasi ka edel. Itunenete kuju ka irotin kice luka asoma nukarokok. Mam keyong'ito ikauriak kes,

³¹ emam kesi awomowomosia; mam kericakiito asumuneta kes; mam kitoduuto akiyamuna kere de akisoni luce.

³² Ejenete kesi ebe ebala Ekisil ka Akuju ebe itung'a lu iboete kokipone kalo itemokina atwanare. Konye mere ebe itolosito kesi asoma nu bon, konye ecamara kesi kaluce de lu isomaete ng'unu.