Ipilipin 4 - AKITUTUKET NAKITETET (NEPEPEKA ISABULIN KA AWARAGASIA)

Akicorasia

¹ Kanuka ng'un ikanacan ka akanacan kang', amina eong' osi noi bobo ekote etau kang' anyun osi noi! Italakarito osi eong' noi, bobo alakara eong' kanu kus! Konye ekipone lo ikanacan ka akanacan, nes itemokinare osi akideun icasito kakijar kus kama Lokapolon!

² Elipit eong' cut ijo Euodia kiton Sintike, kotamakisi akiirari bala akanacan nu ejaasi kama Lokapolon.

³ Elipit eong' ijo de lo isomaete nenipe ka eong', ijo lo emunokina, king'arak aberu nu, naarai autata kesi asoma nenipe ka eong' ka akisiarasiar akiro nukalaunak nenipe ka Kelement nepepe ka kalu isomaete ka eong' luce, lu ejaasi iroria kes okitabo ka Akuju loka akijar.

⁴ Koleleta ng'in pak kotoma akimorikikina ka Lokapolon. Bobo atemari eong' ebe, Kolelata!

⁵ Koyong'ara kamaka ng'in itwan. Apuuti Lokapolon adolun.

⁶ Mam apodo kuju ka ibore kipede, konye kalipasia kus kere kilipata Akuju koinaki osi ibore ni ikotosi osi, ng'ini pak ilipenenete osi nesi kojaasi ka etau loka akiyalama.

⁷ Kosodi aipuc naka Akuju na edeparit akijene ka etung'anan kere akidar itawon kus kiton adama kus imorikikina osi ka Yesu Kristo.

⁸ Ang'etakini eong' ikanacan ka akanacan kelelebata adama wok ka iboro kang'ulu kalu ejoka bobo ilekina adumun akiturio: Iboro lu eraito abeite, ibore kere ni ecoite, ibore ni edolit, ibore ni elae, ibore kere ni itiminarit, ibore kere nik'asianut, ibore ni elae adepar, ibore ni itiminarit bobo ejaasi ka akibusesu.

⁹ Kisomata nu isisiautu osi bobo idumutu osi kama kang', aare kere alomun ka akiro kang' nepepe ka asomisio kang'. Akuju nakinakini oni aipuc kojaasi ka osi.

Akiyalama kanuka idutata

¹⁰ Alakara eong' noi kakimorikikina kang' kiton Lokapolon ebe kosial igeutu osi bobo akitute eong'; teni ituto osi eong' konye mam osi kidumuto apak naka akitodiar ekipone lo itutetere osi eong'.

¹¹ Mere ebe amonyi eong' adumun ibore; naarai esisiau eong' akilesikina kojautene kere.

¹² Ajeni eong' ejautene loka akadadu bobo ajeni eong' ejautene loka akipuakus. Esisiau eong' akirot na eng'opit na, tetere kang'in ilaro kakolong' kere elesikina eong' atikere kajaasi eong' kang'in ibore kere de atikere kemono eong' kere de atikere keirarit eong' eteng'e, atikere kajaasi eong' ka akipuakus kere de ka akadadu.

¹³ Abeikini eong' asoma iboro kere kanu keng' kalo einakiit eong' apedor.

¹⁴ Konye isomato osi kojokan aking'arakin eong' ko ocan kang'.

¹⁵ Osi itung'a luko Filipi ikulopek ijenete ebe kageunete ka akiro kanukalaunak, na alomara eong' ko Masedonia, amam ekanisa lo abu king'arakinosi ka eong' kainanakin bobo kakidiaunun adepar osi bon,

¹⁶ naarai na ajaare eong' Tesalonika ibutu osi kijukakisi eong' aking'arasit irwana ipu.

¹⁷ Mere ebe akote eong' idutat; konye akote eong' araitoit na iyatakin kanu kus.

¹⁸ Adau eong' adumun eropit, bobo kiyatakina; elelebun eong', adaut, alomun kamaka Epafroditas idutan lu iyakunete osi, idutan lu ejoka subanit ni ecamute bobo italakarit Akuju.

¹⁹ Ebuni Akuju kang' akorakin osi ibore kere ni ikotosi osi atupa ka abara keng' naka akibusesu itorit nama ka Yesu Kristo.

²⁰ Akibusesu kojaasi ka Akuju wok ka Papa wok ikaru ka ikaru. Kikote nepeneni.

Amalan naka esial

²¹ Emalan namaka itung'a ka Akuju kere kalu ejaasi toma ka Yesu Kristo. Kimalato osi ikanacan ka akanacan lu ejaasi ne ka eong'.

²² Kimalato osi itung'a ka Akuju cut ng'ulu lu eraito luko ototo ka papa.

²³ Asianut ka Lokapolon Yesu Kristo kojaasi ka osi kere.