Ipilipin 3 - AKITUTUKET NAKITETET (NEPEPEKA ISABULIN KA AWARAGASIA)

Adolite naka Abeite

¹ Ang'etakini eong' ikanacan ka akanacan, kolakara kakimorikikina kus ka Lokapolon. Mam eong' kanyuti aronus akinyogokin nu agirit eong' sek, bobo ejokunar kama kus kekoki eong' neni.

² Kocoikinasi ka lukesomak nukarokok, ng'ulu lu eroko bala ing'okwo, ng'ulu lu isicasito atubutubu akwana.

³ Naarai oni nes bu ekepite naka abeite, oni lu imaete Akuju ka emoyo kiton kalakara kotoma Kristo Yesu, mam kemunokito akwana.

⁴ Eong' elope ajaasi ka atenikina naka amunokiite akwana de. Kejii itwan ni ituti ebe ejaasi nesi ka atenikina naka amunokiite akwana, ajaasi eong' kana edepara:

⁵ Akepio eong' adauti eong' esabiti epe. Kakidouno arait eong' loko Israel, loka ekitekere ka Benjamin, Eyaudit ka Iyaudin, Efarisayot atupa ka ekisil,

⁶ Alemuna eong' noi akisican ekanisa. Ikamut adolite na edumuno kopone kaloka atupite ikisila, esomate eong' ng'ini ibore.

⁷ Konye iboro ng'ulu kere lu abeikini eong' akimara bala adumunete, anyut eong' ebe eraito usa kanuka Kristo.

⁸ Teni emari eong' ng'ini ibore bala atwaniaret kanuka ajokus kana epolo noi naka ajenun Lokapolon kang', Yesu Kristo. Atwania eong' iboro kere kanu keng', kakimara kesi bala iboro lu ibosito tetere adumuni eong' Kristo

⁹ kakimorikikina ka nesi ding'ding'. Mam bobo eong' kajaasi ka adolite na kang', na edumuno kokipone kaloka atupite Ekisil. Ajaasi eong' ka adolite na edumuno kanuka amunokiite Kristo, adolite na einakini Akuju kiton naka amunokina.

¹⁰ Nu kere nu akote eong' erait ajenun Kristo kiton ajenun apedor naka ajarun kamaka lukatwak, ka akimoro akicana keng' karaun kwape keng' katwanare keng',

¹¹ kamunokiite ebe eong' elope itajaruno kamaka lukatwak.

Akitolosite Adolore Nama Itemokina

¹² Mere ebe adau eong' adumun kere de adau eong' araun lo edolit. Konye etolosit eong' auta tetere adumuni eong' idutat ni anyarauna Yesu Kristo eong' nama keng'.

¹³ Ikanacan ka akanacan, mam eong' kemari ebe adumu eong'; konye ibore ipe ni esomae eong' erait akimuruokin nu atuborosi kokau ka auta akitolosite adumun idutat ni ejii king'aren.

¹⁴ Auta eong' adolore adumun idutat ni kanyakarakit Akuju eong' kotoma Yesu Kristo.

¹⁵ Ejii oni kere lu ipoloko komoyo ajaus ka awomowomosia kanu nu eputosi. Konye kejaasi ice kama kus kanu egelakina, epukokini Akuju osi ng'unu de.

¹⁶ Kerumata ka abeite nu idumutu oni.

¹⁷ Kisisiata kama kang', kanacan ka akanacan kang'. Kopupoto ng'ulu lu etupito nukajokak nu etodikisi siong' osi.

¹⁸ Alimonoki eong' osi nu irwana ipu ageun sek, bobo enyogoe eong' kipokona amonyi akio, kojarete bala ipading'atin ka emusalaba ka Kristo.

¹⁹ Esial kes erait amudiaro, naarai akuju kes erait akooki, elakara kesi kotoma asilutu kes, ejaasi adama kes oboro luka akwap.

²⁰ Konye abara wok nakimorete oni ejii kuju, bobo alomun kang'ina idarito oni lokalakunan, Lokapolon Yesu Kristo.

²¹ Ebuni nesi akibelokin awate wok nu ebosete akitaraun bala na keng' naka akibusesu, kapedor ka ejatatar ipiakini ka nesi iboro kere kwap keng'.