Ipilipin 2 - AKITUTUKET NAKITETET (NEPEPEKA ISABULIN KA AWARAGASIA)

Akiyapepera kiton apolou ka Kristo

¹ Akijar kus kotoma Kristo, kinakit osi agogong'u bobo amina keng' king'aing'ai osi. Imorete osi nenipe ka Emoyo, ijaasi osi ka asianut nepepe ka akisoni.

² Kanuka ng'unu, elipit eong' osi kitalakasi eong' kokipone kaloka ajaus ka awomowomosia nu eputosi, imorete osi amina na eputo bobo iraito osi ibore ipe kotowa omoyo kiton awomowomosit ape.

³ Mam akisoma ibore ipede erait atenikina ebe kodumutu osi tetere ipogasi osi. Konye koyong'ite ng'ini nice, ng'ini pak iyanyuto osi ebe ejoka luce akilanya osi ikulopek.

⁴ Mam ng'ini ipe kama kus akitere nu ekote nesi bon, konye nu ekotosi luce de.

⁵ Awomowomosia nu itemokina ajaus ka osi erait nu ejaasi ka Kristo:

⁶ Lo arait ejautene keng' Akuju, konye amam nesi anyut ebe akitiriana ka Akuju erait ibore ni emariao,

⁷ konye kinyekini elope ejautene keng', karaun bala ekejaanakinan, kidounete nesi ejaasi ka aputo bala naka itung'a.

⁸ Eyapepera nesi kosodi alosite kotoma olotote loka ayong'ara akitodol atwanare, atwanare keng' ko omusalaba.

⁹ Kanuka nu, abu Akuju kitopolo nesi noi, ka ainakin nesi ekiror lo epolo adepar iroria kere.

¹⁰ Kanuka ng'unu, kanuka ayong'ite ekiror ka Kristo, ebunete iboro kere, lu ejaasi kuju, kwap, kiton akwap ka lukatwak akukokin ka akimaa nesi,

¹¹ kosodete kesi kere atemar koking'aren ka itung'a, ebe Yesu Kristo nes Lokapolon, tetere itamaete itung'a kere Papa Akuju.

Kocaete ijaasi toma akwap

¹² Kanuka ng'unu luminan kang', kwape sek kiyong'itetere osi eong' na ajatatare eong' ka osi, ejokuna bere noi osi akiyong' eong' kipokona alwana eong' kama kus. Kitolositete asoma kalemuna cut tetere emam ibore ipede ni ekadit ka akiyuun kus,

¹³ naarai isomae Akuju ng'in pak kama kus tetere einakini osi akote kiton asoma kwape ekotore nesi.

¹⁴ Kisomata ng'in ibore mam aking'urung'ura ka apega,

¹⁵ tetere emam nu kiwosaere osi ka atubokino, tetere iraunete osi idwe ka Akuju lu edolito kokiding' ka auri kana ebosit, lu ibunete osi acare kokiding' kes kotoma akwap,

¹⁶ inanikinete osi kesi akirot naka akijar. Kisomata osi kong'in, ajaikinosi eong' ka atenikina naka epog kanu kus apaaran ka Kristo, naarai itodiari ebe auta kang' kere ka asoma kang' mam araito along'u.

¹⁷ Atikere kaari eong' kwape ka isubanit kanuka akiyuun kus, alakara eong' ka ailele noi kanu kus.

¹⁸ Kokipone kalope kang'oli, itemokina osi de alakara ka ailele nepepe ka eong'.

Timoti kiton Epafroditus

¹⁹ Kerait amina ka Lokapolon, amunit eong' ebe abeikini eong' akiyakun Timoti nama kus kapaarasia kanu apete, tetere eong' atitinyori ka akiro kuju kus.

²⁰ Nesi bon nes lo epupi kwape apupia eong' bobo nesi lo epodo kuju kus.

²¹ Luce kere, epodosi kuju ka akiro kes bon, mere kuju kanu ekote Yesu Kristo.

²² Bobo ijenete osi ikulopek kwape etodiara nesi ajokus keng', kwape esomata nesi nenipe ka eong' bala esapat ka papa keng' asoma nuka akisiarasiara akiro nukalaunak.

²³ Ajaasi eong' ka amuno ebe ejukuni eong' nesi nama kus atipete na ajenuna eong' ekipone lo elosiata iboro akibelokin kama kang'.

²⁴ Bobo amunokiit eong' Lokapolon, ebe eong' elope nes abuni nama kus.

²⁵ Anyu eong' ebe itemokina eong' akijukun onac wok Epafroditas nama kus. Isomaete nesi nenipe ka eong', bobo eng'ara nesi eong' ejie. Bobo esoma nesi bala ekiyakia kus kokipone kaloka aking'arakin eong'.

²⁶ Eburut etau keng' ekote anyun osi kere, bobo imojakina nesi etau kanu kiraritetere osi kedeka nesi noi.

²⁷ Teni arieba nesi noi aput atwanare. Konye kosodi Akuju akisoni nesi, konye mere nesi bon konye ka eong' de usa tia eong' adumut ican kuju ka ican.

²⁸ Kanuka ng'unu, ekote etau kang' noi akijukun nesi tetere ilakarosi osi bobo kianyutu osi nesi, kojong'ar eong' de aburute.

²⁹ Kanuka ng'unu, kidiautu nesi kalakara bala onac kotoma ka Lokapolon. Koyong'itete itung'a kere kwape keng',

³⁰ naarai eduporit nesi akijar keng', bobo aput nesi atwanare kanuka asoma ka Kristo tetere eng'arakini eong' osi kokipone kalo mam osi ikulopek kibeikinete.