Ipilipin 1 - AKITUTUKET NAKITETET (NEPEPEKA ISABULIN KA AWARAGASIA)

¹ Eong' Paulo kiton Timoti lukejaanakinak ka Yesu Kristo, nama ka itung'a ka Akuju ko Pilipi lu imorikikina ka Yesu Kristo, ikamut lukapolok luka ekanisa kiton lu ing'arakito kesi.

² Koinak Akuju Papa wok nenipe ka Lokapolon Yesu Kristo osi asianut kiton aipuc.

Akilip ka Paulo kanuka lukesomak keng'

³ Eyalamikiit eong' Akuju kang' kanu kus ng'in pak na eitunana eong' osi;

⁴ bobo ng'in pak elipanakini eong' osi kere, elipi eong' ka ailele

⁵ kanuka ekipone kalo ing'arakinata osi eong' kasoma kanukalaunak ageun apaaran na sodit akitodolo lolo.

⁶ Bobo ajeni eong' ebe nesi lokegeuni asoma nukajokak kama kus ebuni akitolosit akitodolo osial apaaran ka Yesu Kristo.

⁷ Ng'ini pak ijaasi osi otau kang'! Kanuka ng'un itemokina eong' akipup ekipone lo apupia eong' kanu kus. Naarai imorata osi kere ka eong' kasoma kanu nu aseu Akuju ainakin eong', kipokona na ajaare eong' aenis kiton bobo apak na alakakinare eong' akigang' akiro nukalaunak ka akitolosite kagogong'u.

⁸ Akuju nes ekajenan kang' ebe enera eong' abeit abala eong' ebe kemuit eong' anyun osi kere kamina ka Yesu Kristo kanape kaya.

⁹ Bobo erait akilip kang' ebe ebuni amina kus akiyatakin cut, nepepe ka akijene ka acoa,

¹⁰ tetere ibeikinete osi aseun ibore ni ejokuna cut. Koraunete osi itung'a lu elakakina karonus kijokin kiton amonya kapaaran ka Kristo,

¹¹ ileleba araito nuka adolite nu ebunete akitoro namaka Yesu Kristo, kanuka akibusesu ka akitur Akuju.

Akijar erait Kristo

¹² Ikanacan ka akanacan kang', akote eong' osi akijene, ebe iboro lu esomakinosi kama kang' eng'arakisi noi akisiarakin akiro nukalaunak.

¹³ Kanuka ng'un, ejenete ng'ulu kere lukedarak ere loka ejakait kaluce de kane ebe ajii eong' aenis kanu araitere eong' ekejaanakinan ka Kristo.

¹⁴ Ajaus kang' toma aenis ainaki ikanacan ka akanacan lu ipu agogong' kotoma ka Lokapolon, tetere icasete kesi kapakio kere akisiarasiara akiro nukajokak mam akurianu.

¹⁵ Teni ice isiarisiarete kuju ka Kristo ejaasi ka eding' kiton ang'olopa, konye ice kajokus.

¹⁶ Lu isiarisiarete kajokus kanuka amina naarai ejenete kesi ebe ainaki Akuju eong' asoma nuka akitodiar ebe eraito akiro nukalaunak nuka abeite.

¹⁷ Ice, mam kisiarisiarete kuju ka Kristo ejaasi ka itawon luka abeite adepar etau loka emwane. Iituto ebe ebunete kesi akiyatakin eong' ican etolosit eong' ajaus toma aenis.

¹⁸ Nu isomaete kesi, mam adumunete! Alakara eong' kanu isomaete kesi ajokus bon kisiarasiarai kuju ka Kristo koroto kere kalo ebeikin, kerait ka ajokus kere de ka aronus. Abuni eong' akitolosite alakara,

¹⁹ naarai ajeni eong' ebe kanuka alipasia kus kiton aking'arasit alomun kamaka Emoyo ka Yesu Kristo, kalacakino eong'.

²⁰ Nu amina eong' cut kamunokiite erait ebe mam kikarete eong' asoma kang', konye ebe ajaikinosi eong' ka atitinyu kapakio kere, cut apak na tetere ejautene kang' kere eyauni akibusesu nama ka Kristo, atikere kajara eong' kere atikere katwana eong'.

²¹ Naarai kama kang' akijar erait Kristo. Atwanare erait adumunet.

²² Konye kejii akijar kotoma akwana, eraunete ng'unu asoma nuka adumunete kama kang'. Konye mam eong' ka apedori alimor inyena aseuni eong'.

²³ Eridakito eong' akiro aare. Nu akote eong' erait alomar kajaikin nepepe ka Kristo, naarai ejokuna na cut.

²⁴ Konye akideun kakwana ekotokina kanu kus.

²⁵ Kanu amunokitere eong' nu, ajeni eong' ebe edeuni eong' kakitolosite nenipe ka osi kere, kanuka akitolosite kus kiton kanuka ajaus kus ka ailele kotoma akiyuun,

²⁶ tetere apak na abunia eong' nama kus bobo, ijaikinosi osi ka atenikina naka akitur Yesu Kristo kanu kang'.

²⁷ Ibore nikapolon erait ebe kitemokina ejautene kus ka akiro nukalaunak ka Kristo, tetere kere kabeikini eong' abunore anyun osi kere mam, kabeikini eong' akirar kuju kus ebe igwoete osi icasito ka etau kepe, imorikina adama eupasi nenipe kanuka akiyuun kanaka akiro kanukalaunak.

²⁸ Mam akurianu ipading'atin kus; Kotitiny ng'ini pak, kosodete nu akitodikin kesi ebe ilanyo kesi konye osi ilanyete naarai erait Akuju nes lo kinakini osi apedor naka akilanya.

²⁹ Naarai kinakin osi ajokus naka akijaanakin Kristo, mere kakiyuun nesi bon, konye bobo akicanakin kanu keng'.

³⁰ Ibeikinete osi akimorikikin ka eong' ko ojie. Erait ejie lope ng'oli lo ibutu osi kwanyutu eong' ajio sek, bobo kwape iranarata osi nes aring'a eong' ajio.