Ipeson 6 - AKITUTUKET NAKITETET (NEPEPEKA ISABULIN KA AWARAGASIA)

Idwe kiton Ikauriak

¹ Osi idwe, koyong'itete ikauriak kus kanu imunokitetere osi Lokapolon, naarai edolito nu.

² “Koyong'ite papa kon ka toto kon” (lo nes ekisil losodit lo ejaasi ka akitumunet),

³ “tetere ejokarosi akiro kon bobo tetere ijari ijo ikaru lu ipu ka akwap.”

⁴ Kes ka papa, mam osi akitakadikite idwe kus konyunyurarosi, konye kitopoloutu kesi koroto ka Lokapolon.

Ibulesun kiton Ijakaa

⁵ Osi ibulesun, koyong'itete ikapolok kus luka akwap cut, kitawon kalu emunokina bala lu iyong'ito Kristo.

⁶ Kisomata nu ng'ini pak, mere iteete itung'a osi bon, kanuka akote akitojokanara kama kes; konye kisomata kitawon kus kere nu ekote Akuju bala ibulesun ka Kristo.

⁷ Kisomata asoma kus nukaraus ibulesun kalakara bala lu isomakito Lokapolon, mere itung'a.

⁸ Kitutete ebe ebuni Lokapolon akidut ng'ini itwan, kerait ejolot kere ni elacakina kanuka asoma kanukajokak nu isomato kesi.

⁹ Ijakaa, kisomakisi ibulesun kus kong'ipe kong'in, kinyekisi akitosoma akiro nuka akitukurian. Kitutete ebe osi nenipe ka ibulesun kus iraito luka Ejakait kalo ejii kuju, lo etubonokini ng'ini itwan mam kesee.

Iboro ka Akuju kere Luka ejie

¹⁰ Kosial, kicasitete kamaka Lokapolon kiton kanuka ajaus kus ka agogong' na kinakini osi apedor keng'.

¹¹ Konapata iboro ka Akuju kere luka ejie, tetere ipedorete osi akilany ibotei kere luka Asatanit.

¹² Naarai mam oni kitijiete itung'a konye itijiete oni ajore naka imoyoi lukarokok luka akwap kanako kuju, lukepugak, kiton apedor naka akwap kanakirionon kana.

¹³ Kanuka ng'un konapata iboro kere luka Akuju luka ejie, tetere ibeikinete osi akilany ka apaaran kana ebuniata arokusio. Kidau ijo ejie akitodol osial mam ijo kipasi.

¹⁴ Kanuka ng'un, kogwata ilokokina, ijaasi osi ka akiro ka Akuju bala arokoba na iyenikiit ijo ang'abet, koraite adolit kon bala ibore ni idarit aturub kon,

¹⁵ bobo etau loka akisiarasiara Akiro Nukajokak nuka aipuc koraite bala amukan kakejen kus.

¹⁶ Ng'in pak kojaasi ka amunokina erait bala ebuku; naarai nesi nes kinakini osi apedor naka akiara akwaras nuka ajokit nu inokete.

¹⁷ Kojaasi ka akiyuun bala ekofia, akiro ka Akuju bala ekileng' lo kinakini Emoyo ijo.

¹⁸ Kilipenenete ka akolong' kere kotoma Omoyo ilipito osi aking'arasit ka Akuju. Kanuka ng'un kokwenyete ititinyoko, ilipakito osi itung'a kere luka Akuju,

¹⁹ kiton eong' tetere ang'ari eong' akituk kang' ejori kener eong' mam akurianu kuju ka aumosia kanu ejaasi toma ka Akiro Nukajokak.

²⁰ Erait kanuka Akiro Nukajokak kanu nes araitere eong' ekabwoikinon ka Kristo atikere keyenite eong' kipokona. Kilipata ebe komam eong' kakurianar akisiarasiara Akiro Nukajokak kwape ekotokina eong' asoma.

Amalan nakesial

²¹ Tetere ijenunete osi ekipone lo ajaare eong' kiton nu esomae eong', kilimokini osi onac Taikikas, onac kang' lominata bobo ekejaanakinan lo emunokina kamaka nu isomakito oni Lokapolon.

²² Na nes atenikina ejukuna eong' nesi nama kus tetere ijenunete osi ekipone lo ijaatatare siong', bobo tetere isicasi nesi itawon kus.

²³ Aipuc kojaasi ka osi lukeyunak, ka amina kiton amunokina, alomun kamaka Papa Akuju kiton Lokapolon Yesu Kristo.

²⁴ Asianut kojaasi kang'ulu kere lu eminasi Lokapolon wok Yesu Kristo kamina kana mam kedaun.