Ipeson 5 - AKITUTUKET NAKITETET (NEPEPEKA ISABULIN KA AWARAGASIA)

Akiboi kotoma Acaus

¹ Kanuka ng'un kisomata kwape isoma Akuju kanu iraitetere osi idwe lu minan.

² Itemokina amina ayaite akijar kus, kwape keminuna Kristo oni kalemun akijar keng' kanu wok bala idutan kiton asubanit na itiminarit Akuju.

³ Kanu iraitetere osi itung'a ka Akuju ikalaunak, mam kitemokina alimilimite de usa koding' kus kuju ka adoteu kere de arokusio kiton aminanari.

⁴ Kinyekisi ejori lokaronon, lo mam adumunet kere loka apega, mam ajokus kang'un kere kama kus; akiro nuka kiyalamikite Akuju nes ejaasi kadumunete.

⁵ Kojenete ebe mam itwan ipede nidote, nikesoman nukarokok kere nika aminanar (naarai aminanar erait bala akilip aputon) ni edumuni ibore ipede ka Ajakanut kanaka Kristo kiton naka Akuju.

⁶ Mam aisikin king'alak itwan osi ka akiro kanuka abang'anut, naarai enyunyurar Akuju kanuka ng'ulu kalu mam keyong'ito nesi kanuka akiro kang'un nuka abang'anut.

⁷ Kanuka ng'un, kinyekinosi ka kesi,

⁸ naarai sek ijaasi osi akirionus, konye kipokona iraito osi acaus kanuka ajaus toma ka Lokapolon; kolosete bala idwe lu ejaasi toma acaus;

⁹ (naarai edumuno araito ka acaus kamaka ng'un kere kanukajokak, kanu ideerete kiton nuka abeite),

¹⁰ kotamakisi akisisia nu itiminarito Lokapolon.

¹¹ Mam akimor asoma ng'unu nuka akirionus, konye kitodiasi kesi.

¹² Naarai erait asilut ejori iboro lu isomaete kesi kotoma akirionus;

¹³ konye kedau acaus akitodiar ng'ini ibore etakanuni, naarai ibore kere ni etakani erauni acaus.

¹⁴ Kanuka ng'un ebalai ebe: “Konyou, Okwai ijo lo iperi konyou kanaka lukatwak, itacauni Kristo acaus keng' kama kus.”

¹⁵ Kiteete kotenan ekipone lo iboyata osi, mere bala itung'a lu mam kejaasi ka acoa konye bala luka acoa,

¹⁶ mam amunaute apak, naarai eroko aparasia.

¹⁷ Kanuka ng'un mam abang'anut, konye kojenete nu ekote Lokapopolon kisomata.

¹⁸ Mam amera ka ebinu, naarai kimunari osi; konye kinyekisi koyaite osi Emoyo.

¹⁹ Kinerasi kaluce itosomaete osi akiro nuka isabulin, ikirukesinoi kiton ikosioi lukalaunak; kirukokisi Lokapolon ikirukesinoi luka isabulin ijaasi osi kakiyalama kotawon kus.

²⁰ Kiyalamikisi ng'ini pak Papa Akuju kanuka ng'in ibore kokiror ka Lokapolon wok Yesu Kristo.

Aberu kiton Ikiliok

²¹ Koyong'asi kanu iyong'itetere osi Kristo.

²² Osi aberu, koyong'itete ikiliok kus, kwape iyong'itetere osi Lokapolon.

²³ Naarai erait ekiliokit akou ka aberu kwape eraitere Kristo akou kekanisa, lo erait akwan keng' koraite nesi elope nes Lokeyunan ekanisa.

²⁴ Kanuka ng'un, ejii aberu de ayong'ite ikiliok kes kwape eyong'itere ekanisa de Kristo.

²⁵ Osi ikiliok, kominasi aberu kus, kwape eminare Kristo ekanisa kalemun akijar keng' kanuka ekanisa.

²⁶ Kisomae nesi nu erait ekipone loka ainakin Akuju ekanisa kokipone kaloka akisiarasiara Akiro Nukajokak kedau akitalaun ekanisa kokipone kaloka akibatisa,

²⁷ tetere itarauni nesi ekanisa lokeng' lo italaute — lo edolit kolae cut, ecae, komam kekudit, kere de aronus apede.

²⁸ Itemokina ikiliok de amina aberu kes kwape eminatatare kesi awate kes. Nesi lo emina aberu keng' emina nesi elope.

²⁹ Naarai emam itwan ni ekadakiit akwan keng', konye itani ka akidar kwape isomakitere Kristo ekanisa,

³⁰ naarai iraito oni itung'a luka akwan keng'.

³¹ “Na nes atenikina inyekina ekiliokit papa keng' ka toto keng' kakimorikikin ka aberu keng' kosodete iare araun akwan ape.”

³² Epolo aumosit na, bobo abala eong' ebe apolou keng' erait Kristo kiton ekanisa;

³³ kanuka ng'un, komina ng'ini ipe kama kus aberu keng' kwape ke elope, ng'ini aberu koyong'ite okilen keng'.