Ipeson 4 - AKITUTUKET NAKITETET (NEPEPEKA ISABULIN KA AWARAGASIA)

Akimorikikina naka akwan

¹ Kanuka ng'un, elipit eong' lo eyenite kanuka amunokiite Lokapolon osi akiboi kokipone kalo italakarit Kristo, akijar na kinyarakin osi,

² Kiyamakina ng'ini pak, kotitinyoko. Kitodikisi amina kus kokipone kaloka atitinyu kaluce.

³ Kotamakisi aricite akimorikikina na eyaut Emoyo Lokalaunan kokipone kaloka ainapakina na imorikikiit osi nenipe.

⁴ Ejii akwan ape kiton Emoyo epe, kwape ejaare amuno ape na kinyarak Akuju osi.

⁵ Ejii Lokapolon epe, amuno ape, akibatisao ape;

⁶ ejii Akuju ape, Papa ka itung'a kere, lo erait Lokapolon ka itung'a kere, lo isomae asoma keng' kokipone kaloka akitosoma itung'a kere, kojii otung'a kere.

⁷ Konye ainakin ng'ini ipe kama wok atupa ka etyae kidutat ka Kristo.

⁸ Kanuka ng'un kwape ebalatatar agirasia nukalaunak: “Na adokara nesi kuju, abu nesi king'arenik itung'a lu ayenite; kosodi nesi akidut itung'a idutan.”

⁹ (Inyena apolou ka atemar ebe, “Adoka nesi kuju?” Apolou keng' erait ebe kebu nesi koge adokun kwap adwii nako kwap.

¹⁰ Nesi lo kijerun kwap nes lo edokari nesi kuju kadepar akuju kere, tetere ejaikin nesi ng'in laro).

¹¹ Nesi nes lo “keinakini idutan”; kebu koseu ice araun ikiyakia, ice ikadwarak, ice akisiarasiara, ice lukecokok kiton ikesisianakinak.

¹² Kisomae nesi nu alokokin itung'a kere luka Akuju asoma nu itemokina Ikristayon asoma.

¹³ Kokipone kang'olo iraunete oni kere ibore ipe kokipone kalo imunokitetere oni Akuju kiton kokipone kalo ijenata oni Okoku ka Akuju; iraunete oni itung'a lu iyatakina akijen, kadolokin ejautene ka Kristo loka ajenus.

¹⁴ Kanuka ng'un, mam bobo oni kijaikinosi bala idwe, ibukanari oni ekuwam loka akisisianakino kanu egelegela nu irebokito itung'a lu liokoisik tetere itabang'anete luce kaliokonu.

¹⁵ Kojor abeite kotau kaloka amina, ejii ekipone lo ijenata oni nesi akiyatakin, nesi lo erait akou ka ekanisa, nesi Kristo.

¹⁶ Erait nesi nes lo eyait, imorikikinosi nenipe alarosinoi kere nuka kwan karaun ibore ipe. Ng'in ilaro ni ikamanakina ka akojo, imorikikiit nenipe akwan kere. Kanuka ng'un, isomae ng'in ilaro kwape itemokitere, epoloe akwan kere kakiduk nesi alope ejii amina.

Akijar nakitetet kotoma Kristo

¹⁷ Kanuka ng'un, kokiror ka Lokapolon kekwenyari eong' osi: Mam akitolosite ajaus bala ng'ulu lu emam kemunokiito Akuju, lu ituneneete nu mam adumunet

¹⁸ lu ejaasi adama kes akirionus. Mam kesi kedumunete akijar na einanikini Akuju, naarai ewolito kesi cut bobo kicasitete akwes.

¹⁹ Mam bobo kesi kejaasi kasilutu; isomaete nukarokok kiton iboro lukilec noi.

²⁰ Mere nu kes kisisiaete osi kuju ka Kristo!

²¹ Kirarito osi cut kuju keng', bobo kosodete akisisianakin osi kuju keng', kwape ka abeite kuju ka Yesu.

²² Kanuka ng'un kinyekisi ejautene loka akijar kus nakisek, na kiinakit osi ajaus kwape ijatatare osi — akijar na amunari aminanari keng' nakaronon.

²³ Itawon kus kiton adama kus ejii akiteteun cut,

²⁴ ejii osi akinapa ejautene loka akijar nakitetet, na kesubuni Akuju eputosi ka nesi, ka akitodikite akijar keng' kotoma akijar naka abeie na italakarit Akuju.

²⁵ Kanuka ng'un mam bobo aking'ala! Ejii ng'ini ipe kama kus alimonokin nice abeite naarai iraito oni kere itung'a luka akwan ka Kristo.

²⁶ Kepipilar ijo etau, mam aisikin adedeng' kon kiinakini ijo asoma nurarokok, bobo mam akideun epipil etau kon apaaran kere.

²⁷ Mam ainakin Asatanit apak.

²⁸ Ng'ulu lu kekokoete sek, kinyekisi akokoo kogeutu asoma tetere edumunete kesi etacenit loka abeite kadumun apedor naka aking'arakin lukapalapalak.

²⁹ Mam akitosoma akiro nukarokok adepar akiro nu ing'arakito, nu edukete atupa ka ibore ni ekotokina tetere isomakinete nu ilimuni ijo lu epupete ijo nukajokak.

³⁰ Mam akitadakar Emoyo Lokalaunan loka Akuju, naarai erait Emoyo ejenunet ka Akuju kama kus ebe iraito osi itung'a keng', kakitodiaret ebe ebut apaaran na eyuuna Akuju osi.

³¹ Kolemasi apipilu kotawon kus, kiton anyunyura, ka eding', ka adedeng'u, acela kiton aronus kere,

³² kisomak nice nukajokak, kison nice, korumanakinosi kwape arimakina Akuju osi kanuka akiyuun kus Kristo.