Ipeson 3 - AKITUTUKET NAKITETET (NEPEPEKA ISABULIN KA AWARAGASIA)

Asoma ka Paulo kamaka luka akwap

¹ Kanuka Ng'un, elipit eong' Akuju, eong' Paulo lo eyenite kanuka amunokiite Yesu Kristo kanu kus.

² Abeite, irasi osi ebe kanuka asianut keng', ainaki Akuju eong' asoma nu kanuka ajokus kus.

³ Abu Akuju kitodia nu ketiakut nesi bon ka ainakin eong' ajenun. (Egir eong' kaurianut kuju kanu,

⁴ kisomata osi nu egir eong', ijenunete osi kuju kanu ajenu eong' ikamut aumosia ka Kristo).

⁵ Sek, amam alimonokino itung'sa aumosia nu, konye kipokona etodiki Emoyo ka Akuju ikiyakia keng' lukalaunak kiton ikadwarak.

⁶ Erait aumosit ebe kanuka akiro ka Akuju, emorete Luka akwap nenipe ka Iyaudin akibusesu ka Akuju; eraito kesi itung'a luka akwan ka ape kiton akimor akitumunet na keyauni Akuju kanuka akimorikikina ka Yesu Kristo.

⁷ Abu kitaraune eong' ekejaanakinan loka akiro ka Akuju kanuka asianut ka Akuju, idutat ni ainakini nesi eong' kanuka ainakin eong' apedor keng'.

⁸ Adit eong' adepar itung'a kere luka Akuju; konye adutaki nesi eong' asianut keng', tetere esiarasiarakini eong' itung'a luka akwap kuju ka abara ka Kristo na epolo noi,

⁹ kakitanyun itung'a kere ekipone lo igwakinere aumosia ka Akuju kere kisomata. Abu Akuju lo asubi iboro kere kigwa aumosit keng' ka aparasia kere kanu atuborosi,

¹⁰ tetere ka apak kana einakini ekanisa imalaikan lu ipugaete kalu ejaasi ka apedor kokuju apedor naka ajenun acoa ka Akuju kojautene kalo egelegela.

¹¹ Kisomakinosi nu atupa katiakunet na mam esial, na adumu nesi kokipone kaloka ainakin Yesu Kristo, Lokapolon wok apedor naka asoma nu,

¹² Imorikikina oni ka Kristo kiton amunokina kama keng' mam oni akurianu alosite nama ka Akuju ijaasi oni ka amuno kere.

¹³ Kanuka ng'unu, kemaimai eong' osi mam osi itawon akipas naarai ecana eong' kanu kus; esomakinosi nu kanu kus.

Amina ka Kristo

¹⁴ Atenikina na nes akukokinere eong' koking'aren ka Papa,

¹⁵ lo einanikini itung'a kere kokuju kiton kokwap ekiror loka abeit.

¹⁶ Elipiti eong' Akuju atupa ka abara naka akibusesu keng' koinak Emoyo keng' osi agogong' naka akicasite kotau,

¹⁷ bobo elipit eong' ebe itarauni Kristo itawon kus ere keng' kanuka akiyuun kus. Elipit eong' ebe kebeikini, ageunet kang'in ibore koraite amina,

¹⁸ tetere osi kiton itung'a ka Akuju, ibeikinete adumun apedor naka ajenun kwape epolore noi amina ka Kristo.

¹⁹ Kojenutu amina keng' — konye mam kebeikite ajenun kotenan — kanuka ng'un kojatatare ka ejautene bala loka Akuju.

²⁰ Koinakine nesi akibusesu, nesi lo einakiit Emoyo keng' apedor naka asoma nu ipu noi adepar nu ibekiito oni akilipiti kere de akiitun:

²¹ Akibusesu kojei nama ka Akuju ko okanisa kiton kamaka Kristo kapak kere, ikaru kere! Ikote nepeneni.