Ipeson 2 - AKITUTUKET NAKITETET (NEPEPEKA ISABULIN KA AWARAGASIA)

Akijar kotoma Kristo

¹ Sek, itwakito osi kanuka akicasit ka akwes kus kiton arokusio.

² Apak ng'in kitupito osi irotin lukarokok luka akwap; kiyong'ito osi lokaronon lo epolokiit ajokin kokuju, eparait lo eyait itung'a lu emam keyong'ito Akuju.

³ Abeite, oni kere iputosi bala kesi, ijaasi atupa kanu ikotosi oni ng'ini pak, isomaete ibore kere ni kekotosi awate kiton adama wok. Kojautene wok kaloka ng'ini paaran, kitemokina oni akisicanio kwape kang'in itwan naarai kemam Akuju kelakara ka oni.

⁴ Konye Akuju lo epolo asianut, kanuka amina kana keminare oni,

⁵ atikere iring'a oni itwakito kanuka adiaka nareta wok, kitajaruni nesi oni nenipe ka Kristo (kanuka asianut nes kiyuunere osi),

⁶ kakitajarun oni nenipe ka Kristo, kakisiboikin oni nenipe ka nesi ka alarosinoi kanuko kuju kanuka ajaus toma ka Kristo,

⁷ tetere ebekiit nesi akitodiar apaarasia kanu ebuuto ajakaanut naka asianut keng' na etakani amina keng' oni kanuka ajaus toma ka Kristo.

⁸ Naarai erait kanuka asianut nes kiyuunere osi atupa ka amuno kus; mere osi isomaete nu, konye erait idutat ni keinakini Akuju osi,

⁹ mere kanuka asoma, kere koraite kong'in tia itung'a ipogasi.

¹⁰ Ijaasi oni kon kanu keng'. Kanuka ajaus wok toma ka Yesu Kristo, kesub Akuju oni ajaus akijar naka asoma asomisio nukajokak, nu kedau nesi atyakun kesomata oni.

Iraito oni ibore ipe kamaka Kristo

¹¹ Kanuka ng'un kiituutete ebe apak ape osi luka akwap kakidouno, osi lu kenyarito Iyaudin ilong'au, ibore ni esubite kakiring kakanin.

¹² Apak ng'in kitiakara osi kamaka Kristo. Kiraito osi ilong'au, kimam osi kiraito itung'a ka Akuju lu eseute. Kemam osi kimarakiite atutukesia nukerait ageunet ka asumuneta ka Akuju otung'a. Bobo ijarito osi ka akwap kana emam amuno, emam ajena ka Akuju.

¹³ Konye kipokona, kanuka ajaus toma ka Kristo, osi lu ilwaka sek ayaun nama apie kanuka atwanare ka Kristo.

¹⁴ Naarai kiinu Kristo elope oni ainapakina kokipone kaloka akitaraun Iyaudin kiton Luka akwap ibore ipe. Abu atwanare keng' ko omusalab kibiro arwatat na ketiakit kesi, kayaute eding' kiding' kes.

¹⁵ Abu nesi kolemaa Ekisil loka Iyaudin nenipe ka ikisila keng' kiton akicorasia tetere itarauni nesi itekerio iare ibore ipe imorikikina nenipe ka nesi. Koyauni aipuc kokipone kalo.

¹⁶ Abu atwanare keng' kodau eding' kes; atupa ka atwanare keng' ko omusalaba abu nesi kimorikik itekerio iare ka akitaraun akwan ape ka akinyakun kesi namaka Akuju.

¹⁷ Kanuka ng'un abu Kristo kobuu kosodi akisiarasiara Akiro Nukajokak kuju ka akinapakina-kama kus luka akwap lu alwaka noi kama ka Akuju kiton kamaka Iyaudin lu apete kama keng'.

¹⁸ Erait akitoro namaka Kristo nes ibeikitetere oni kere-Iyaudin kiton Luka akwap abunore ko Omoyo ka epe king'aren ka Papa.

¹⁹ Kanuka ng'un mam bobo osi Luka akwap kiraito ilong'au; irautu osi luka akwap kape nenipe ka itung'a ka Akuju.

²⁰ Adukokin osi de kuju ka ageunet na kigwaakinete ikiyakia kiton ikadwarak, erait Yesu Kristo elope nes amoru na itogogong'it etogo.

²¹ Nesi nes ikamuut etogo kere nenipe kakitaraun etogo lokalaunan loka Akuju lo elemuute kanuka Lokapolon.

²² Kakimorikikina ka nesi, kidukio osi de nenipe kaluce de kere akitaraun alaro na iboya Emoyo ka Akuju.