Ipeson 1 - AKITUTUKET NAKITETET (NEPEPEKA ISABULIN KA AWARAGASIA)

¹ Eong' Paulo ekiyakia ka Yesu Kristo, lo eworouno araun ekiyakia atupa ka apedor ka Akuju. Nama kalu iyuuto lu emunokina kamaka Yesu Kristo:

² Asianut ka aipuc alomuni kamaka Papa wok Akuju kiton Lokapolon Yesu Kristo kojei ka osi.

Arereng'usio nuka Emoyo kotoma ka Kristo

³ Keyalamikisi Akuju, Papa keng' ka Lokapolon wok Yesu Kristo, lo esirereng' oni ka arereng'usio kere nuka Emoyo nuko kuju kanuka akimorikikina wok ka Yesu Kristo.

⁴ Sek ering'a kesubuna akwap, kedauti Akuju aseun oni araus lukeng' akitor akimorikikina ka Kristo tetere iraunete oni lukajokak komam arokusio apede koking'aren keng'. Kanuka amina keng',

⁵ Kedauti Akuju atyakun akitaraun siong' idwe keng' itorit nama ka Yesu, nu kes kitalakarito nesi kiton kitemokiit nesi.

⁶ Ketamaata Akuju kanuka asianut keng' naka akitur, kanuka idutat kani abu nesi koinak oni atupa kanu esomae Okoku keng' lo ominat!

⁷ Akitoro awokot ka Kristo nes kilakakinere oni nes arimakinere arokusio wok. Ikoni asianut ka Akuju epolo ai,

⁸ na ainakini nesi oni ka akipwaakus! Akitor acoa keng' kijokin kiton ajenus keng' kere,

⁹ abu Akuju kisoma nuketiakuut nesi asoma ka akitejenuuni oni atemetemesio keng' nu mam ketakanete nuketiakuut nesi bon adaun kanuka apedor ka Kristo.

¹⁰ Akitemetemesit na, na ebuni Akuju akisomakin kedol Apak na itemokina, erait akimorikikin isuban kere, ng'in ibore kokuju nepepe kakwap erait Kristo nesi akou.

¹¹ Iboro kere isomao atupa ka ekipone lo itemitemiter Akuju ka atiakuute; bobo keseut Akuju oni araus itung'a keng' imorikikina oni nenipe ka Kristo kanu kekotore nesi elope atupa kanu ketiakuut nesi ape kageunet.

¹² Oni lu ageete amunokin Kristo keturoto akibusesu ka Akuju!

¹³ Ibutu osi de korautu itung'a ka Akuju na irarata osi akiro nuka abeit, Akiro Nukajokak nu ainunete osi akiyuun. Ibutu osi komunokisi Kristo, kosodi Akuju akipiakin akan keng' nama kus naka akitaraun osi lukeng' kokipone kaloka ainakin osi Emoyo Lokalaunan lokitumunikiit nesi.

¹⁴ Emoyo Lokalaunan nesi itodiariit abeite ebe idumunete oni ibore ni esumuniki Akuju itung'a keng', ibore eni italakarit oni ebe einakini Akuju ng'ulu lu eraito lukeng' alakakina cut. Keturwoto akibusesu Keng'!

Akilip ka Paulo

¹⁵ Kanuka atenikina kana, ape keirara eong' kuju ka akiyuun kus Lokapolon Yesu Kristo kiton ekipone iminatatare osi itung'a ka Akuju,

¹⁶ mam eong' kenyekiit akiyalamikiite Akuju kanu kus. Eituuti eong' osi kalipasia kang'

¹⁷ ka akilipite Akuju ka Lokapolon wok Yesu Kristo, Papa lo iturite koinaki osi Emoyo lo einakini osi acoa ka akitodiar Akuju kama kus tetere ijenunete osi nesi.

¹⁸ Elipit eong' kong'aarosi adama kus tetere ijenunete osi akiyuun na anyaraki nesi osi, kiton ekipone lo ilelebar asulwanyi na isumunikiit nesi itung'a keng',

¹⁹ ka ekipone lo epolore apedor keng' kama wok kalu iyuuto. Eputosi apedor na isomae kama wok na kiton apedor naka agogong',

²⁰ na etosomae nesi apak na etajaruna nesi Kristo kamaka lukatwak kakisiboikin nesi akani keng' nako teten kokuju.

²¹ Epolokiit Kristo kang'ina ikapolok kere luko kuju, luka apedor, ka agogong', ka lukapolok; ejaasi nesi ka ekirori lo epolo kororia kere kaluka polou ka akwap kana kiton kana ebuuti.

²² Abu Akuju koinak Kristo apolokiite iboro kere, kigwakini Akuju Yesu akanin ke ekanisa, erait nesi nes epolokiit iboro kere.

²³ Erait ekanisa akwan ka Kristo kiton apolou keng' kalo einakiit iboro kere apolou ka alarosinoi kere.