Ikolosain 4 - AKITUTUKET NAKITETET (NEPEPEKA ISABULIN KA AWARAGASIA)

¹ Ijakaa, koyaitete ibulesun kus kadolite nepepe kajokun. Kojenete ebe ijaasi osi de ka Ejakait kuju.

Acorasia

² Mam akipasa akilip, kokwenyete ilipete osi, iyalamikiito osi Akuju.

³ Kilipakiitete siong' de akolong' nipeng'ini, tetere einakini Akuju siong' apak nakajokan naka alimonor akiro keng' ikamuut nu igwaite kuju ka Kristo. Naarai ng'unu nes ajaara eong' kipokona aenis.

⁴ Kanuka ng'unu kilipata tetere abeikini eong' ejori kwape itemokinar eong' ejori, kokipone kalo ikamunata itung'a kojokan.

⁵ Kojaasi ka acoa ikamuut ekipone lo isomanakinata osi itung'a ng'ulu lu emam kejaasi ka akiyuun, kitosomata kojokan apak kere na ejaatatar ka osi.

⁶ Itemokina ejori kus ng'ini pak akitalakaarit ka akitiminaarit itung'a, bobo itemokina osi akijene ekipone loka abong'onokin ng'ini itwan kojokan.

Amalan nakesial

⁷ Ebuni onac kosi Tikiko lo ominat, lo erait lokesoman lo emunokina kalo ijaanakini nenipe ka siong' kasoma ka Lokapolon, alimokin osi akiro kere kuju kang'.

⁸ Ng'ini nes atenikina na ejukuutere eong' nesi nama kus tetere italakari nesi osi ka alimokin nesi osi ekipone lo ijaatatar siong' kere.

⁹ Eupasi nesi ka Onesimo, onac ng'olo lo ominat bobo lo emunokina, lo erait epe kama kus. Elimokinete kesi osi ng'in ibore ni isoma kane.

¹⁰ Kimalate osi Aristakas lo eyenite ka eong', Mariko de onac keng' ka Barnabas kimalate osi. (Idautu osi adumun acorasia nuka akidiaun Mariko kebuu nesi nama kus).

¹¹ Imalate osi Yosua de lo enyarite Yusto. Iuni lu bon kes Iyaudin lu iyuuto lu isomaete ka eong' kanuka Ajakaanut ka Akuju, bobo king'arakisi kesi eong' noi.

¹² Amalan alomun kamaka Epafras, epe ece loka atukot kus bobo ekajaanakinan ka Yesu Kristo. Ilipanakini nesi osi ng'ini pak ka agogong', ilipit nesi Akuju king'arak osi kogwaata ka agogong' iraito Ikristayon lu apolokoto kalu atiakutu araus Ikristayon ka ayong'ite cut nu ekote Akuju.

¹³ Abeikiit eong' elope akitodiar kwape esoma nesi ka agogong' noi kanu kus kiton itung'a luko Laodisia nepepe ka Ierapolis.

¹⁴ Kimalate osi Luka, ekemadan wok lo ominat kiton Demas.

¹⁵ Koinakisi ikanacana ka akanacan luko Laodisia kiton Nimfa nepepe ka ekanisa lo iriamanakin otogo keng'.

¹⁶ Kidautu osi akisoma ebaruait lo, kotamakisi cut kisomata ko okanisa kaloko Laodisia de. Kapaki kanipe kang'in, ejii osi akisoma ebaruait lokijukaninete osi ikanacan ka akanacan alomun ko Laodisia.

¹⁷ Kolimokisi Akipas ebe, ejii ijo adaun asoma nu apon koinakine ijo nuka akijaanakin Lokapolon.

¹⁸ Ka akani kang' kelope egiri eong' nu: Amalan alomun kamaka Paulo. Mam akimuruokin aeno kang'! Kojii asianut ka Akuju ka osi.