Ikolosain 3 - AKITUTUKET NAKITETET (NEPEPEKA ISABULIN KA AWARAGASIA)

¹ Etajarun osi nepepe ka Kristo. Kanuka ng'un, kigwaakisi adama kus oboro lu ejaasi kuju, nama iboya Kristo kokicolong' keng' kakan kanakoteten ka Akuju.

² Kipiakisi adama kus oboro lu ejaasi ng'ina, mere oboro lu ejaasi kwap ne.

³ Naarai itwakata osi, akijar kus egwaite nepepe ka Kristo kotoma Akuju.

⁴ Akijar kus naka abeite erait Kristo bobo na etakanuna nesi, itakanunete osi de nepepe ka nesi ka akimor akibusesu keng'!

Akijar na mojong' kiton Nakitetet

⁵ Kanuka ng'un, kwaarata ng'ini ibore ni ejii toma kus ni erait nika akwap: Adoteu, asilianut, amina nukarokok, ationus (naarai ationus erait ekipone epe loka akimaa aputon)

⁶ Kanuka iboro bala ng'ulu ebuni anyunyura ka Akuju namaka ng'ulu kalu mam keyong'ito nesi.

⁷ Apak ape, ipotu osi kojarata atupa ka akiro ng'unu, nakiyaiteter osi akiro ng'unu.

⁸ Konye kipokona ejii osi alemar iboro lu kere: Anyunyura, aminanar kanukarokok, aronus ketau. Mam araton kere ejori lokaronon alomun kakituke kus.

⁹ Mam osi aking'alanakin, naarai ilacasi osi akijar namojong' ka iponesio keng'

¹⁰ bobo inapata osi akijar nakitetet. Na nes akijar nakitetet na itolosit Akuju lo asubuni nesi akiteteute tetere eputokinosi ka nesi kanuka ainakin osi apedor naka ajenun nesi kojokan.

¹¹ Kanuka ng'un, emam bobo agelakinet na ejii kiding' ka Igirikin kiton Iyaudin, kiding' kalu ekepite kiton lu mam kekepite, imo, lu ideuna kokau, ijoloi, kiton lu elelakakina, konye Kristo nes ng'in ibore, ejii Kristo toma kes kere.

¹² Iraito osi itung'a ka Akuju; abu nesi kominu osi bobo koseuni nesi osi araun lukeng'. Kanuka ng'un, ejii osi ikulopek akinapa akisoni, asianut, akiyapepera, akinapara kiton atitinyu.

¹³ Kikanyete kaluce, korimanarosi apak kere na ejaatatar itwan ka akirot ka nice. Ejii osi arimanar kwape arimakina Lokapolon osi.

¹⁴ Kuju ka akiro kanu kere kiyatakisi amina, na erucokini iboro kere kotoma akimor na ejokuna noi.

¹⁵ Itemokina aipuc na eyauni Kristo ayaite osi kotoma atiakuneta nu isomaete osi, naarai nama ka aipuc kana nes eworou Akuju osi kotoma akwana ape. Bobo kojaasi ka akiyalama.

¹⁶ Tar akiro ka Kristo ka abara keng' kere akiboi kotoma otawon kus. Kisisianakinosi bobo kicorasi ka acoa kere. Kirukosi Isabulin, ikosioi, kiton ikirukisinoi lu eyauni emoyo lokalaunan; kirukokisi Akuju ka akiyalama kotawon kus.

¹⁷ Ibore kere ni isomaete osi kere de ni itemarete osi, ejii akisomakin kokiror ka Lokapolon Yesu, iyalaminikinete osi Papa Akuju akitor nama keng'.

Epaperone kotoma akijar nakitetet

¹⁸ Aberu, koyong'itete ikiliok kus, naarai ng'unu nes itemokina osi kwape ka Ikristayon.

¹⁹ Ikiliok, kominasi aberu kus bobo mam adedeng' kama kes.

²⁰ Idwe, koyong'itete ikauriak kus kotoma ng'in ibore, naarai italakarito nu Akuju.

²¹ Ikauriak, mam akitakadikiite idwe kus, kemam ebwalarosi kesi.

²² Ibulesun, koyong'itete ijakaa kus luka akwap kang'in ibore, mere bon na itaata kesi osi kanuka akote akitojokonaara koking'aren kes; konye kisomata ketau kalo elae kanuka ayong'ite kus Lokapolon.

²³ Kang'in ibore kere kani isomaete osi, kisomata kitawon kus kere, bala isomakiito osi Lokapolon konye mere etung'anan.

²⁴ Kojenete ebe ebuni Lokapolon ainakin osi ibore ni ing'adakiit nesi kanuka itung'a keng' erait bala idutat. Naarai Kristo nes ejakait loka abeite lo ijaanakinete osi.

²⁵ Eropio lu isomaete nukarokok kanuka iboro kalukarokok kalu isomaete kesi, naarai etubonokini Akuju ng'ini itwan kokipone ka epe kalo eputo.