Ikolosain 2 - AKITUTUKET NAKITETET (NEPEPEKA ISABULIN KA AWARAGASIA)

¹ Kinyekisi kalimoki eong' osi ekipone lo esoma eong' ka agogong'u kanu kus bobo kanuka itung'a kaluko Laodisia kiton luce kere lu mam kajenete eong' elope.

² Esomae eong' nu tetere edumunete kesi atitinyu naka etau bobo tetere imorikikinosi kesi nenipe kotoma amina, ka adumun abara kere naka amuno kere na eyauni akijene naka abeite. Kokipone kalo, ejenunete kesi nu igwait Akuju, Kristo elope.

³ Nesi nes elacet lo eng'ae iboro kere lukajokak lu igwaite luka acoa ka Akuju kiton akijen.

⁴ Kanuka ng'un, kalimokini eong' osi ebe mam ajalakin itwan ipede king'alae osi kapega kanaka aliokonu, atikere kejoka kesi ekipone ali.

⁵ Naarai atikere kemam eong' kajii kakwan, ajaasi eong' ka osi kotoma omoyo. Bobo alakara eong' na etaa eong' ekipone lo igwoyata osi nenipe icasito baaba kotoma akiyuun kus kotoma Kristo.

Akijar na ileleba kotoma Kristo

⁶ Kanu icamunata osi Yesu Kristo araus Lokapolon, kojaikinosi imorikikina osi ka nesi.

⁷ Kojalakisi amori kus kidulokina cut toma keng', kodukoto akijar kus toma keng', kicatata kotoma akiyuun kus kwape kisisianakinere osi sek. Bobo kojaasi ka akiyalama.

⁸ Kanuka ng'un, kocoikinasi, kiteete ebe emam itwan ipede ebuni akitaraun osi ijoloi kokipone kaloka aliokonu kana emam kejaasi ka adumunet apede, naka etung'anan, na elomut kakisisianakino kanaka ikisila ka itung'a kiton imoyoi lu ipugaete akwap, konye mere lu elomuuto kamaka Kristo.

⁹ Naarai ejii toma nama ka Kristo ejautene kere loka araus Akuju, kojautene keng' kaloka etung'anane,

¹⁰ bobo ainakin osi akijar kere kotoma akimorikikina nepepe ka nesi. Epolo nesi akilanya imoyoi kere lu ipugaete kiton luka apedor kere.

¹¹ Kotoma akimorikikina ka Kristo apon kokepai osi, mere akepio na ekepi itwan, konye akepio na ekepi Kristo, na eyauni alakuno kotoma apedor naka akwana kanakarokusio.

¹² Naarai nakibatisaere osi, apon konuka osi nepepe ka Kristo, bobo kotoma akibatisao apon kitajarune osi de nenipe ka Kristo akitor akiyuun kus kotoma apedor ka Akuju na isomae noi, lo etajaruni nesi kama kalukatwak.

¹³ Itwakito osi ape pak kotoma omoyo, naarai iraito osi luka akwap lu amam ajaasi ka Ekisil. Konye ayau Akuju osi kipokona toma akijar nepepe ka Kristo. Abu Akuju korimaki oni arokusio wok kere;

¹⁴ abu nesi komwata agirasia nukarokok ikamuut apesen wok kiton ikisila keng' lu eyenete itwan kosodi alemari kokipone kaloka akibubukin kesi omusalaba.

¹⁵ Bobo komusalaba kang'olo, abu Kristo kolaku nesi elope kamaka agogong' ka imoyoi lu ipugaete kiton apedor; abu nesi kitodu kesi kokipone kaloka ayaite kesi bala lu eyenite kotoma aidiiya keng' kana itodikiit ebe elanya nesi.

¹⁶ Kanuka ng'unu, mam itwan ipede akiten ikisila ikamuut ibore ni inyemete osi kere ni imasete osi kere ikamuut apaarasia nukalaunak kere epucit lo elomuna elapa nasodit kere ikamuut Esabato.

¹⁷ Iboro kere bala lu eraito usa eturube ka iboro kalu ebuuto; Kristo nes abeite.

¹⁸ Mam osi acamun kotubonoki osi itwan kere ni ebala ebe epolo nesi kanu anyunana nesi eruja lo mam kerait loka ng'in pak, bobo ni itogogong'orit akiyapepera naka aliokonu kiton akimaa imalaikan. Kanuka atenikina kana emam ketakani, einakiit akiitunun naka etung'anane itung'a bala ng'ulu epogi

¹⁹ bobo enyekisi akirumite Kristo baaba, lo erait akou ka akwana. Kayaite ka Kristo, itanio akwana kere, bobo imorikikiite nenipe karucesia kiton amori, bobo epoloe kwape ekotore Akuju nesi apolo.

Atwanare ka akijar nenipe ka Kristo

²⁰ Itwakata osi ka Kristo, bobo adaun alakun osi komoyoi kalu ipugaete akwap. Inyo konye ijarit osi bala osi luka akwap kana? Inyo konye iboyata osi bala iraito osi luka akwapa kana? Inyo itupitetere osi ikisila ng'ulu bala

²¹ “Mam akirum ibore eni, Mam akiir ibore eni, Mam ajorori ng'ini”?

²² Akiro nu kere ikamuut iboro lu emamuuni adumunet kes nape edaunere akitosoma; eraito kesi usa ikisila kiton akisisianakineta ka etung'anan.

²³ Abeite erait ebe ikisila bala ng'ulu elomuuto ka acoa atupa ka ekipone kalo ikurakiiter itung'a akimaa imalaikan, ka akiyapepera naka esoswai, ka akimikite akwana iboro mutan lu itemokina. Konye nu kere mam kejaasi ka apedor naka aking'arakin itwan ayaite nu ekote akwana kere de nu mam kekote.