Ikolosain 1 - AKITUTUKET NAKITETET (NEPEPEKA ISABULIN KA AWARAGASIA)

¹ Alomun kamaka Paulo, lo erait ekiyakia ka Yesu Kristo atupa ka akote ka Akuju, kiton alomun kamaka onac wok Timoti.

² Nama ka itung'a ka Akuju luko Kolosai, lu eraito ikanacan ka akanacan wok lu emunokina kotoma Kristo. Koinak Akuju Papa wok osi asianut ka aipuc.

Akilip naka akiyalama

³ Iyalaminikinete siong' ng'ini pak Akuju, Papa keng' ka Lokapolon wok Yesu Kristo, na ilipanakinata siong' osi.

⁴ Naarai eirasi siong' kuju ka akiyuun kus kotoma Yesu Kristo kiton kuju ka amina kus itung'a kere luka Akuju.

⁵ Na ageyata akiro nuka abeite, Akiro Nukajokak abunore nama kus, ibutu osi kiirasi kuju ka amuno na elomuni kabeite kang'ini. Kanuka ng'unu akiyuun kus ka amina kus ejaasi kanuka nu imunokiito osi nu igwaikite osi kojokan kokuju.

⁶ Itolosito Akiro Nukajokak ayaun arereng'usio bobo itolosit akisiarakina akwap kere, kwape kisiarakiner kokiding' kus ageun apaaran nasodit nakiirarata osi kuju ka asianut ka Akuju.

⁷ Ibutu osi kisisiautu kuju ka asianut ka Akuju alomun kamaka Epafras lo ominat, lokejanaakinan ka siong', lo erait lokesoman ka Kristo lo emunokina kanu wok.

⁸ Alimoki nesi siong' kuju ka amina kana ainaki Emoyo osi.

⁹ Kanuka nu, elipanakisi siong' osi ng'ini pak, ape kapupunata siong' kuju kus. Elipito siong' Akuju kilelebik osi akijen ikamuut nu ekote nesi, ka acoa kere kiton akijen na einanikini Emoyo keng' itwan.

¹⁰ Kosodete osi abeikin akijar kwape ekotore Lokapolon ka asoma ng'ini pak nu italakarito nesi. Ebuni akijar kus asoma nukajokak nu egegelegela, bobo ipolounete osi kakijen kus Akuju.

¹¹ Kicasitete kagogong' kana ebuni alomun ka apedor keng' kana ejaasi ka akibusesu, tetere osi ingirikinete ng'ini ibore katitinyu.

¹² Kiyalamakisi Papa ka alakara, lo ainaki osi apedor naka adumun nu itemokina osi adumun kamaka iboro kalu adau Akuju akigwaikin itung'a keng' kotoma ajakaanut naka acaus.

¹³ Abu nesi koyuu oni kamaka apedor ka akirionus kosodi ayaun oni kojokan toma ajakaanut ka Okoku keng' lo ominat,

¹⁴ lo elakunere oni kanu keng', nes atemar ebe arimakin arokusio wok.

Yesu Elope kiton Asoma keng'

¹⁵ Erait Kristo aputo na etakani naka Akuju lo mam ketakani. Erait nesi Okoku lokiyai, epolo akilanya iboro kere lu esubite.

¹⁶ Naarai akitor nama keng' nes asubia Akuju ng'in ibore ni ejii kuju kiton kwap, lu etakanete kalu mam ketakanete, nenipe ka apedor naka imoyoi, ijakaa, lukapugan kaluka apedorosia. Asubi Akuju akwap kere akitor nama keng' bobo kanu keng'.

¹⁷ Ajii Kristo ering'a iboro kere kejaikina, bobo kotoma akimorikikina ka nesi nes ejaare ng'in ibore nama itemokina.

¹⁸ Erait nesi akou ka akwana keng', ekanisa. Nama keng' nes edumuter akwana akijar. Erait nesi Okoku lokiyai, lo etajaruno katwanare, tetere ebeikini nesi bon adumun alaro nasodit kamaka iboro kere.

¹⁹ Naarai arait atupa ka ekipone lo atiakuna Akuju elope nes ejaatatar Okoku elope ka ejautene kere loka Akuju.

²⁰ Akitor namaka Okoku, abu Akuju kitutubo akinyakun akwap kere nama keng' kelope. Abu Akuju koyau aipuc akitor aokot nu abukori Okoku keng' komusalaba kosodi akinyakun iboro kere nama keng' kelope, ka akwap kiton luko kuju.

²¹ Kapaki kape lwaka osi kamaka Akuju bobo raito osi ipading'atin keng' kanuka iboro kalukarokok lu ipotu osi kisomata ka awomowomo.

²² Konye kipokona katwanare ka Okoku keng', etarau Akuju osi ipaupatin keng', tetere eyauno osi nama ejii nesi ilaete, iliara, kiton emam aronus.

²³ Kanuka ng'un ejii osi akitoloto ka akiyuun kus igwoete osi kapetatait kanaka abeite kana icasit, bobo mam kilesikina osi akurianu ka alemaro kotoma amuno na abutu osi kwanyutu na ipupunata osi Akiro Nukalaunak kuju ka Kristo. Erait kanuka Akiro Nukalaunak nu kuju ka Kristo nes abu eong' Paulo karau lokejaanakinan, Akiro Nukalaunak nu, nu alimonokin ng'in itwan ka akwap.

Asoma ka Paulo erait Lokejaanakinan ka Ekanisa

²⁴ Alakara eong' kipokona kanuka ican kang' kanu kus. Naarai akitor ocan kang' luka akwana, eng'arakiit eong' akirikakin nu ering'a ideuna kocani ka Kristo kanuka ekanisa, akwana keng'.

²⁵ Etarau Akuju eong' lokejaanakinan loka ekanisa, lo abu koinaki eong' asoma nu kanu kus. Erait asoma nuka alimonor akiro keng',

²⁶ nu egwait nesi apelem alomun ka ageun ka etung'anan konye etodu nesi kipokona kotung'a keng'.

²⁷ Akitemeteme ka Akuju erait akitejenuun kotung'a keng' nu igwait nesi, nu igwait nesi nu koraitete nuka akibusesu ejaasi ka nesi kanuka itung'a kere. Bobo akirot na igwaite erait ebe ejii Kristo toma kus, apolou keng' erait ebe ibunete oni akimor nenipe kotoma akibusesu ka Akuju.

²⁸ Kanuka ng'unu ilimonorete siong' Kristo kamaka ng'in itwan. Ka acoa kere kana ebeikin, ikwenyanarete siong' ka akisisianakin kesi tetere eyauno ng'in itwan king'aren ka Akuju erait itwan ni kicata kotoma akimorikikina ka Kristo.

²⁹ Kanuka akote kisomakinosi nu, auta eong' ka asoma ka agogong' etosomae eong' apedor na einakini Kristo itwan bobo na isomae kotoma kang'.