Igalatian 6 - AKITUTUKET NAKITETET (NEPEPEKA ISABULIN KA AWARAGASIA)

Kodaka Alang'iru ka Nice

¹ Ikanacan ka akanacan kang', kilanyata itwan arokusio mutan, ekotokina osi lu eyait Emoyo Lokalaunan aking'arakin nesi kayong'ara. Kocoikinasi, kemam, kitamio osi de.

² Kodakata alang'iru ka nice, naarai kong'in nes asoma ekisil ka Kristo.

³ Konye kiitunene itwan kere ebe epolo nesi konye komam kepolo, ing'alae nesi ilope akwana keng'.

⁴ Ejii ng'in itwan kama kus akimoo asoma keng' kilope. Kejoka nu isoma ijo, ibeikini ijo akipoga kanu isoma ijo ilope emam akitupusite kanu esoma itwan nice.

⁵ Naarai ng'ini itwan kama wok ejaatatar ka alang'iru keng' kilope na itemokina nesi adakite.

⁶ Itemokina kesi lu isisianakino akirot ka Akuju akimor iboro kes kere lukajokak nenipe ka lukesisianakinak kes.

⁷ Mam aking'alao. Mam kebeikino akwenar Akuju. Naarai ibore kere ni iraikini itwan, ng'ini nes edwenyuni nesi.

⁸ Naarai itwan ni iraikini akwana keng', ebuni adwenyun alomun kakwana keng' aronus. Konye nesi ni iraikini Omoyo ebuni adwenyuni alomun ko Omoyo akijar na emam esial.

⁹ Kanuka ng'un, mam oni akipasa asoma nukajokak, naarai kemam itawon wok kepasete, ibunete oni akidwenye kapaki kana itemokina.

¹⁰ Kanuka ng'unu, kidumutu oni apaki, kesomakisi itung'a kere nukajokak, konye cut ng'ulu lu eraito luka asiirit ka Kristo.

Akikwenyaret naka esial kiton Emalan

¹¹ Kiteete agirasia nukapolok nu etosomae eong' akigirakin osi kakan kang' kelope!

¹² Itung'a lu ekotosi akitoduuna kes kakwaan nes kikurakinete osi akepio tetere emam kesi kitisilaaro kanuka emusalaba ka Kristo.

¹³ Atikere ng'ulu lu ekepio, mam ketupito Ekisil. Konye ekotosi kesi kokepai osi tetere ipogasi kesi kanuka aporei kang'un kawate kus.

¹⁴ Konye eong', mam cut kabuni epogi kanuka ibore kice adepar kanuka emusalaba ka Lokapolon wok Yesu Kristo, lo etosomao akibubukin akwap nama kang', eong' de akwap.

¹⁵ Emam adumunet apede ekepite kere de emam kekepite itwan adepar araus ibore nikitetet.

¹⁶ Aipuc ka akitimio kojaasi ka ng'ulu kere lu etupito ekisil lo, ka Israel ka Akuju.

¹⁷ Kosial, mam aisikin itwan ipede kisiali eong', naarai adakit eong' kakwana kang' aporei ka Yesu.

¹⁸ Asianut ka Lokapolon wok Yesu Kristo kojaasi ka osi kere, ikanacan ka akanacan kang'. Ikote nepeneni.