Igalatian 5 - AKITUTUKET NAKITETET (NEPEPEKA ISABULIN KA AWARAGASIA)

Kidarata Alakakino kus

¹ Alakakina nes ibore ni ejaasi ka oni. Alakaki Kristo oni! Kanuka ng'unu, kogwata bala itung'a lu elakakiite. Mam acamun araun ijoloi bobo.

² Kanuka ng'unu, eong' Paulo nes kalimokini osi ebe, kekepi osi, emam adumunet ka Kristo kama kus.

³ Etodianari eong' bobo kamaka ng'in itwan kani ekepio ebe itemokina nesi atupite ekisil kere.

⁴ Osi ng'ulu lu itamakiito akitodolikino koking'aren ka Akuju kopone kaloka aricakiite ekisil, itiakarosi osi kamaka Kristo. Ijaasi osi king'a ka asianut ka Akuju.

⁵ Akitor namaka Emoyo kanuka amuno nes idaritere siong' kitodolokine siong' kanuka akiyuun kosi.

⁶ Naarai, imorikikina oni nenipe ka Yesu Kristo, emam adumunet apede kekepite ijo kere de kemam kekepite ijo. Ibore nika adumunet erait amuno na itodiara kotoma amina.

⁷ Ikerete osi sek kotenan. Ng'ai kirebokini osi ayong'ite abeite?

⁸ Mere Akuju lokinyarauni osi nes kisomae nu.

⁹ Asipa adis itubuyete akiria kere.

¹⁰ Ajaasi eong' ka amunokina kotoma ka Lokapolon ebe mam osi kijaikinosi ka awomowomosia ace adepar nu kang'. Bobo etubokino ng'ini nikisiali osi, ati kerait nesi ng'ai.

¹¹ Konye, ikanacan ka akanacan, ketolosit eong' akisiarasiara kuju ka akepio inyo konye itolositere akisicana eong'? Kere koraite kong'in, tia akisiarasiara kuju ka emusalaba ka Kristo mam keyauni ican.

¹² Kere cut ng'ulu lu kisialete osi akikepe awate kes ikulopek!

¹³ Naarai, osi ikanacan ka akanacan kang', apon konyaraune osi toma akijar naka alakakina. Konye, mam akitosoma alakakina kus erait atenikina naka asoma nu ekotosi awate kus. Konye, kijaanakinosi akitor amina.

¹⁴ Naarai iturianite Ekisil kere ka acorasit kape bon kana: “Komina epaduko kon kwape iminare ijo akwana kon ka ilope.”

¹⁵ Konye kikonyokonyasi osi ka akikang'asana osi ikulopek, kocoikinasi tetere emam osi kimudianarosi ikulopek.

Emoyo kiton Ejautene loka Etung'anan

¹⁶ Konye abala eong' ebe kolototo kwape kiyaitere Emoyo Lokalaunan, bobo mam asoma kwape eminare akwana.

¹⁷ Naarai nu emina akwana mam kiirara ka Emoyo Lokalaunan. Bobo nu emina Emoyo Lokalaunan de mam kiirara kanu emina akwana. Naarai nu aare epegasi tetere irebokinete ijo asoma nu kikote ijo asoma.

¹⁸ Konye kerait Emoyo Lokalaunan nes kiyait ijo, mam ijo kijii kwap ka Ekisil.

¹⁹ Ejenuna asoma nu emina akwana: Adoteu, asoma iboro lukarokok noi, ka adepar kadoteu,

²⁰ akimaa akujun, akicud, eding', ang'olopa, aminanari, adedeng'u, emwane, akote akilanya luce, atyakatyaka,

²¹ eding', amera, emwane kiton ace nu eputosi kanu. Ekwenyari eong' osi kwape ekwenyaritere eong' osi sek ebe ng'ulu lu isomaete iboro bala lu, mam kelomete toma ajakaanut ka Akuju.

²² Konye araito nuka Emoyo Lokalaunan erait: Amina, ailel, aipuc, atitinyu, asianut, ajokus, amunokina,

²³ akiyapepera, nepepe ka ayaitoi ilope kojokan. Emam ekisil lo itepegi nu.

²⁴ Adautu ng'ulu lu eraito luka Yesu Kristo akibubukin omusalaba ejautene loka akwana kiton nu emina akwana.

²⁵ Kijarete oni kanuka aking'arasit kana ayau Emoyo, kalototo atupa kayaite ka Emoyo.

²⁶ Mam oni epogi, mam oni akutukaanut, mam oni akadakiite nice.