Igalatian 3 - AKITUTUKET NAKITETET (NEPEPEKA ISABULIN KA AWARAGASIA)

Ekisil kere Akiyuun

¹ Okwai ibang'aisik Igalatian! Ng'ai kisubakini osi? Apon kitodiare kakonyen kus kuju ka akibubukino ka Yesu Kristo omusalaba.

² Kinyekisi keng'it eong' osi ang'itasait ape na bon: Kidumunete osi Emoyo atupa ka asoma nuka ekisil kere kanuka apupun kakiyuun?

³ Ikote osi ibang'aaka ai? Igeunete osi kotoma Emoyo ka Akuju, ikotosi osi adaun ka apedor kus kikulopek?

⁴ Kemam adumunet apede kamaka ng'unu kere kanu ibutu osi kwanyutu? Abeite, ejaasi kadumunet!

⁵ Einakini Akuju osi Emoyo Lokalaunan ka asoma aumosia kama kus kanu isomaata osi nu ekote Ekisil kere kanu ipupiata osi akiro nukajokak ka akiyuun?

⁶ Abu Aburaam “Komunok Akuju, kimarakinete nesi erait lo edolit.”

⁷ Kanuka ng'unu ejii osi akijen ebe auri naka abeite naka Aburaam erait itung'a lu ejaasi ka amuno.

⁸ Abutu agirasia nukalaunak kodwarutu sek ebe itodolikini Akuju Ilong'au koking'aren keng' akitoro amuno. Kanuka ng'un, kitodikinete akiro nukalaunak Aburaam Akiro Nukajokak: “Akitor nama kon nes isirereng'ia Akuju itung'a kere luka akwap.”

⁹ Abu Aburaam komunok, kisirerengi'ete nesi. Kanuka ng'unu, ng'ulu kere lu emunokiito, isirereng'io kwape kisirereng'iere nesi.

¹⁰ Naarai ilamite ng'ulu kere lu eyong'ito asoma nuka ekisil. Naarai igirite, “Ilamite itwan kere ni mam keyong'it ng'unu kijokin nu igirite okitabo loka ekisil, ka asoma ng'unu.”

¹¹ Kanuka ng'unu, etakani kipokona ebe emam itwan itodolikino koking'aren ka Akuju kanuka atupite Ekisil. Naarai, “Itwan ni bon edolit kanuka amunokina nes ebuni akijar.”

¹² Konye ekisil mam kitee amunokina. Naarai, “Nesi ni isomae nu ekote ekisil ebuni akijar akitor okisil.”

¹³ Abu Kristo koyu oni kolami kaluka ekisil, kedau nesi araun ilami kanu wok. Naarai igirite ebe, “Ilamite itwan kere ni emiedakin kokitoi.”

¹⁴ Abu Kristo kisoma nu tetere einakino Ilong'au asulwany na kisumunikiit Akuju Aburaam akitor namaka Yesu Kristo, tetere idiaunete oni Emoyo lokisumunikiit Akuju akitor akiyuun.

Ekisil kiton Akisumunikinet

¹⁵ Ikanacan ka akanacan kang', alosi eong' akitosoma aputo naka ng'ini paaran: Kecamarosi itung'a iare kuju ka ibore kosodete akigirakin, emam itwan ipede ebeikini akibil agirasia ng'unu kere de iyatakini ibore ipede.

¹⁶ Aburaam nenipe ka ikoku keng' nes keinakino asumuneta. Mam kebala, “Kiton namaka idwe keng',” ikamuut lu ipu, konye ikamuut ipe, “Kiton ikoku kon,” ni erait Kristo.

¹⁷ Na nes apolou kanu abala eong': Ekisil lo abuni ketuborosi ikaru akaisawong'on ka itomonkauni kokau, mam kebili akitutuket nasek nakeyauni Akuju kanuka akitatwaniar aisumunet ka Akuju.

¹⁸ Naarai kerait Ekisil nes eyauni idutat nika Akuju, mam bobo kerait kanuka asumunet ka Akuju. Konye keinakini Akuju Aburaam akitor asumunet.

¹⁹ Inyena konye atenika ka ekisil? Kiyatakino kanuka arokusio. Bobo kitemokina ekisil akitolosit akitodol apak na ebunia ikoku ka Aburaam, lokisumunikiite. Imalaikan nes keyaunete Ekisil, erait etwan nes kerait bala lo kejii kiding' ka Akuju kiton itung'a.

²⁰ Konye mam kekotokina itwan nikokiding' kikamuuto akiro itwan ipe bon. Erait Akuju epe.

Atenikina ka Ekisil

²¹ Itepegi ekisil asumuneta ka Akuju? Abeite mam. Naarai kere koyautete ekisil lo itajari, atia ekisil nes eyauni adolite.

²² Konye ebalasi agirasia nukalaunak ebe ejii akwap kere kwap ka apedor ka arokusio. Kanuka ng'unu, idutat ni isumunikiite atupa ka amunokiite Yesu Kristo einakino ng'ulu lu ecamuuto.

²³ Konye ering'a amuno kebunia, keyenit Ekisil oni kere bala itung'a lu ejaasi aenis akitodol nama itoduunere amunokina na ebuuti na.

²⁴ Kanuka ng'unu kepolokiit Ekisil oni akitodol nakebunia Kristo, tetere ebeikino akimarakin oni iraito lu edolito koking'aren ka Akuju kanuka amuno.

²⁵ Kanu konye adauna amuno adolun, mam bobo Ekisil kepolokiit oni.

²⁶ Erait akitor amuno nes iraitetere osi kere idwe ka Akuju kotoma akimorikikina nenipe ka Yesu Kristo.

²⁷ Kibatisao osi tetere imorikikinosi osi kiton Kristo. Kanuka ng'unu, katemasi inapito osi akijar ka Kristo ka elope.

²⁸ Kanuka ng'unu, emam agelakina ejii kiding' ka Iyaudin kiton Ilong'au, kiding' ka ijolon kiton lu elakakina, kiding' ka ikiliok kiton aberu. Naarai iraito osi kere ibore ipe kamaka Kristo.

²⁹ Kiraito osi luka Kristo, itodikiit iraito osi auri ka Aburaam. Bobo idumunete osi ibore nikisumunikiit Akuju.