Igalatian 2 - AKITUTUKET NAKITETET (NEPEPEKA ISABULIN KA AWARAGASIA)

Paulo kiton Ikiyakia Luce

¹ Ketuborosi ikaru ikanykauni, abu eong' kabong'o Yerusalem nenipe ka Barnabas kiton Tito.

² Abu eong' kaloto naarai abu Akuju kitodik eong' ebe ejii eong' alosite. Kakiriamakin kang' nepepe ka ikapolok emam itwan ejeni, abu eong' kalimok kesi akiro nukajokak kanu esisianikini eong' Ilong'au. Amam eong' akote asoma kang' nuka sek kere de nukipokona komunaunosi.

³ Konye atikere Tito de lo ajaasi ka eong' amam apon kikurakine nesi akepio konye arait nesi Egirikit.

⁴ Konye akotosi ice kokapi nesi. Imoleete kesi ebe eraito kesi de ikeyuunak kwape wok, abutu itung'a lu kocedunosi atuket kosi kwape ka lukang'icak, ekotosi ajenun kuju ka alakakina kana ejaatatare ka oni akitor akimorikikina wok kiton Yesu Kristo. Akotosi kesi akitaraun siong' ijoloi,

⁵ konye kanuka aricakiite kotenan akiro nukajokak kanu kus, mam siong' abutu kacamakinosi ka kesi.

⁶ Konye ng'ulu lu atakanete kama kang' bala lukayaitok — abala eong' nu naarai mam agelakinete apede kama kang' ati keraito kesi kes kang'ai. Mam Akuju ketubonokini atupa ka ekipone lo etakania itwan koking'a. Abala eong' ebe mam lukayaitok ng'ulu abutu kiyatakisi acoa apede nakitetet nama kang'.

⁷ Konye kokipone kece kalo egelakina, na anyunata kesi ebe kepon koinakine eong' akisiarasiara akiro nukajokak namaka Ilong'au, kwape keinakiiter Petero akisiarasiara akiro nukajokak kamaka Iyaudin

⁸ (naarai nesi loking'arakini Petero asoma kamaka Iyaudin, nes keng'arakini eong' de asoma kamaka Ilong'au).

⁹ Kosodete Yakobo, ka Petero kiton Yoana lu araito bala lukayaitok anyun ebe kebu Akuju koinaki eong' asoma nu nukajokak. Kanuka ng'un, kosodete kesi akimalakin ka Barnabas kiton eong' kakanin akitoodikin ebe kisomaete siong' kere nenipe. Abutu siong' keirarosi ebe kesomata eong' kiton Barnabas kamaka Ilong'au, kisomata kesi kamaka Iyaudin.

¹⁰ Ibore ipe ni abutu kesi kilipata kesomata siong' arait ebe ejii siong' akiitute lukapalapalak kama kes, ibore ipe cut ni ijeket eong' noi asoma.

Eretaki Paulo Petero ko Antiok

¹¹ Konye na abunia Petero Antiok, abu eong' ketepeg nesi koking'aren ka itung'a naarai adiakarit nesi.

¹² Naarai sek ering'a itung'a ice lukijukuut Yakobo kedoluna, kenyemete Petero nenipe ka ikanacan ka akanacan nu Long'au. Konye na adolunata itung'a ng'ulu, kikunyari Petero kau, kinyekini akinyama nenipe ka Ilong'au, naarai akuriana nesi ng'ulu lu egang'ito akepio ka Iyaudin.

¹³ Kosodete ikanacan ka akanacan ace nuka Iyaudin ageun akurianu kwape ka Petero. Kosodi Barnabas de akigwap kesi, kakurianaar bala kesi.

¹⁴ Konye nape anyuna eong' ebe kemam kesi kisomaete nu idereete ikamut agirasia nukalaunak, abu eong' kalimok Petero koking'aren kes kere ebe, “Kirait ijo Eyaudit konye kiboe ijo bala Elong'ait, mere bala Eyaudit, ekipone ali ibeikina ijo akijukakin Ilong'au akiboi bala Iyaudin?”

Iyuno Iyaudin nepepe ka Ilong'au ka akiyuun

¹⁵ Teni, iraito siong' Iyaudin atupa ka akidouno, konye mere “Ilong'au luka arokusio”, kwape enyaritere kesi.

¹⁶ Konye ijenete siong' ebe akiyuun bon kotoma ka Yesu Kristo nes einakini imarakino itwan adolite koking'aren ka Akuju, konye mere asoma nu ekote Ekisil. Siong' de amunokisi Yesu Kristo tetere erimakini Akuju siong' atupa ka akiyuun kosi kotoma Kristo, konye mere asoma nu ekote Ekisil. Naarai emam itwan ni imarakino ebe edolit koking'aren ka Akuju kanuka asoma nu ekote Ekisil.

¹⁷ Konye itolosito siong' atamakiite korimaki Akuju siong' arokusio kosi kokipone kaloka amunokiite Kristo, kodumunete siong' iraito luka arokusio kwape ejaatatare Ilong'ait - itodikiito nu ebe igang'it Kristo arokusio? Mam cut!

¹⁸ Konye kaduku eong' bobo iboro ng'ulu lu abu eong' kamunau, kanuka ng'unu etodu eong' ebe arait eong' elope lokabilan Ekisil.

¹⁹ Ikamuut Ekisil, atwanit eong' - Ekisil elope nes kaari eong' tetere ajari eong' kanuka Akuju. Kari eong' nenipe ka Kristo ko omusalaba keng',

²⁰ tetere emam kerait eong' bobo nes ajari, konye Kristo lo ejii toma kang'. Akijar na ajii eong' toma kipokona na, ayait eong' kanuka amunokiite Okoku ka Akuju, lo aminuni eong' ka akidut akijar keng' kanu kang'.

²¹ Mam eong' kang'erit asianut ka Akuju. Naarai kere kedumunono adolite kanuka atupite ekisil, itodikiit ebe atwanare ka Kristo mam kejaasi ka adumunete apede.