Igalatian 1 - AKITUTUKET NAKITETET (NEPEPEKA ISABULIN KA AWARAGASIA)

¹ Eong' Paulo lo erait ekiyakia, mere ka apedor ka etung'anan, kere de ka agogong' ka itwan konye ka apedor ka Yesu Kristo kiton naka Akuju Papa lo etajaruni Yesu kamaka lukatwak,

² ka ikanacan ka akanacan kere lu ejaasi nenipe ka eong' imalaete ikanisai luko Galatia.

³ Koinaki osi Akuju Papa wok nenipe ka Lokapolon Yesu Kristo, asianut kiton aipuc.

⁴ Abu Kristo kolemun kanuka arokusio wok, atupa ka amina ka Akuju Papa wok tetere elakuni nesi oni kakwap kanakaronon kana nakipokona atupa kanu ekote Akuju wok ka Papa wok.

⁵ Akibusesu kojaasi ka nesi ikaru kere! Ikote nepeneni.

Akiro Nukajokak

⁶ Ketimit eong' osi ebe nedio along'u inyekisi osi nesi lokinyarauni osi atupa ka asianut ka Kristo, kosodete osi acamun akiro ace nu egelakina.

⁷ Abeite emam “Akiro ace nukajokak,” konye abala eong' nu kanu ejaatatar itung'a ice lu isialete osi, etamakiito akibelokin akiro nukajokak nuka Kristo.

⁸ Konye atikere kesiarasiarata siong' kere de emalaikat alomun kokuju akiro nu egelakina kamaka nu esisianakiito siong' osi, kinyekisi kilami nesi ikaru kere!

⁹ Atemarito siong' nu sek, konye enyogokini eong' kipokona bobo ebe kisisianaki itwan ipede osi akiro nu egelakina kamaka nu abuutu osi kocamutu, kilami nesi!

¹⁰ Itodikiito nu ebe atamakiit eong' akote kitojokonata itung'a eong' kere kitojokon Akuju eong'? Kere atamakiit eong' akitalakaarite itung'a? Kere ketolosit eong' akitalakaarite itung'a, tia eong' amam karait ekejaanakinan ka Kristo.

Ekipone lokerauna Paulo Ekiyakia

¹¹ Kinyekisi kalimoki eong' osi, ikanacan ka akanacan kang' ebe akiro nukajokak nu esiarisiari eong', amam araito akiro nuka etung'anan.

¹² Amam eong' adumuni kamaka itwan, bobo amam itwan ipede nikesisianakini eong' akiro nu. Konye abunete akitor apukokinio ka Yesu Kristo.

¹³ Irasi osi kuju ka akijar kang' nasek na emaya eong' Akuju kwape imaananata Iyaudin. Irasi osi kwape esicania eong' ekanisa ka Akuju sek ka adedeng'u kiton ekipone lo atamakiitere eong' adaun ekanisa.

¹⁴ Elanyit eong' Iyaudin kang' lu ipu luka aturi kang' ka akimaa Akuju kwape imaananata Iyaudin. Bobo aricakiit eong' noi ikitokio kaluka asonya kosi.

¹⁵ Konye, kanuka asianut keng', abu Akuju koseu eong' ering'a bere eong' kidouna de, ka anyaraun eong' akijaanakin nesi. Na atiakuna nesi

¹⁶ akitoduun Okoku keng' kama kang', tetere abeikini eong' akisiarasiara Akiro keng' Nukajokak kamaka Ilong'au. Amam eong' abu kaloto namaka itwan kipede kicoraki eong',

¹⁷ bobo mam eong' abu kaloto Yerusalem anyun ng'ulu lu ageito kama kang' araun ikiyakia. Konye abu eong' kaloto atipet Arebia, kabong'ori eong' bobo Damaskas.

¹⁸ Ketuborosi ikaru iuni nes aikaria eong' Yerusalem akipejokin Petero, ka akideun ka nesi apaarasia atomon ka akany.

¹⁹ Konye mam eong' anyun ekiyakia epede adepar Yakobo onaci keng' ka Lokapolon.

²⁰ Erait abeite nu egiri eong'. Ejeni Akuju ebe mam eong' keng'alae!

²¹ Kokau, kaikari eong' alarosinoi nuko Siria kiton Silisia.

²² Apak ng'ini aring'a itung'a luko okanisai luko Yudea kanyuna ka ajenun eong'.

²³ Kiirarito kesi ebalai usa ebe, “Nesi lo esicani siong' apak ape nes isiarisiari kipokona kuju ka akiyuun kana atamakiit nesi apak ape adaun.”

²⁴ Kosodete kesi akitur Akuju kanu kang'.