Iburayon 9 - AKITUTUKET NAKITETET (NEPEPEKA ISABULIN KA AWARAGASIA)

Akimaa nako Kwap kitoni nako Kuju

¹ Akitutuket nasodit ajaasi ka ikisila luka akimaa nepepe ka alaro na imaere kokwap.

² Kedukite ayema, alaro nako king'a na anyarite Alaro Nakalaunan. Neni nesi ajii agwoes naka atara nepepe ka acede ka emugati lokelemikiite Akuju.

³ Kokau kepasia kalokiareit, kejii ayema nakenyarite Nakalaunan kamaka Nukalaunak.

⁴ Toma keng' ajii altari nama icuere ebubani bobo ajii asaduku nakejii Akitutuket toma keng', erapite kesawabu iwaitin kere, ajii amoti toma nakitenite kesawabu na ajaasi ka emana, ebela ka Aron lo alomuto akwii, kiton amoru aare nukigirite ikisila kuju kes.

⁵ Kuju ka asaduku kang'in, kejaasi isubuna lukejaasi ka abenokoka lu agwoikiito ajaus ka Akuju, ka abenokoka kes eterakina nama erimanakinere arokusio. Konye mam kipokona kerait apak na itodiarere ng'ini ibore kakidulokina.

⁶ Lo nes ekipone lo itemitemiter iboro ng'ulu. Elomenenete isaserdotin toma Ayema nako king'a ng'ini paaran asoma nu ekotokina kesi asoma,

⁷ konye esaserdotit Lokapolon bon nesi elomenene ayema nako toma, katipe bon kokaru. Edakanari nesi aokot nu edusi nesi Akuju kanuka arokusio keng' kelope nepepe kanuka arokusio kanu isomato itung'a mam kejenete ebe isomaete kesi arokusio.

⁸ Alomun kakitemitemisio kanu kere isisianakini Emoyo Lokalaunan ebe eroto lo elomere Alaro Nakalaunan cut ering'a keng'ara kitolosit Ayema Nako king'a akigwo.

⁹ Akiroto na erait akitupusete na itodikiit akiro nuka apaarasia kanu. Apolou keng' erait ebe idutan kiton ityeng' lu elemikiite Akuju bala isuban mam kitalaunete etau kitwan kani emae Akuju,

¹⁰ naarai ikisila lu ikamuto inyamen, imatan kiton ipucin lu egelegela luka akitalauno. Eraito lu kere ikisila luko king'a bon, lu ebunete asoma akitodolo apak na ebunia Akuju akitenakin ejautene lokitetet.

¹¹ Konye adau Kristo adolun, erait Esaserdotit Lokapolon loka akiro kanu ejoka nu kipokona nu adautu adolun. Ayema na ijaanakina nesi kotoma epolo noi bobo ejokuna noi; mam kerait ayema na esubite ka akanin ka etung'anan, mam kerait ipe kamaka isuban luka akwap kana.

¹² Abu nesi kolomo Alaro Nakalaunan katipe bon, mam keyarit aokot ka akinei kiton nuka itaka, konye nu keng' kelope, kosodi nesi ainakin oni alakuno na mam esial.

¹³ Awokot ka akinei kiton nuka imong'in nepepe ka ekurwon ka itako kani ecweite egwatakino itung'a lukarokok, bobo nu italaunete kesi kokipone kaloka alemar nu itoronito kesi.

¹⁴ Konye isomasi akiro nukapolok noi kanuka aokot ka Kristo! Kanuka agogong' ka Emoyo kalo mam esial, abu Kristo elope kolemuni araun esubanit lo elae kamaka Akuju. Ebunete aokot keng' akitalaun awomowomisio tetere emam oni kisomaete asoma nu eyaunete atwanare tetere ibeikinete oni akijaanakin Akuju lo ejari.

¹⁵ Kanuka ng'unu erait nesi ekapuran ka akitutuket kanakitetet, tetere ng'ulu lu adau Akuju anyaraun edumunete asulwanyi na mam kedaun na adau Akuju akitumunikin kesi. Ebeikino asoma nu naarai ajaikin atwanare na iyuuni itung'a alomun karokusio kanu kisomato kesi apak naka akitutuket kana mojong'.

¹⁶ Ibore kere ni ikamut ng'unu nu igirir nu ekote nikatwan, itemokina akitodiar atwanare kani kigiri.

¹⁷ Naarai ng'unu nu igirir nu ekote nikatwan, mam kejaasi kadumunet kapede ering'a itwan nikegiran ejari; egeuni asoma kedau nikegiran atwanare.

¹⁸ Ng'ini nesi atenikina abeikina akitutuket na sodit de asoma kanuka agogong' ka aokot.

¹⁹ Na sodit abu Musa kolimonok itung'a acorasia kere kwape kejaatatare Okisil. Kosodi nesi alemun aokot nuka imong'in kiton nuka akinei, akinyalakin ka akipi kigwatakini nesi okitabo loka Ikisila nepepe ka itung'a kere, itosomae nesi akwii nuka isopo kiton ajulo ka amerekek nuka reng'ak.

²⁰ Abu Musa kotema: “Nu nes aokot nu enuesikinete akitutuket na abu Akuju kicoraki osi akiyong'.”

²¹ Kokipone kalope kang'olo kogwatakini Musa aokot Ayema Nakalaunan nepepe ka iboro lu itosomao apak naka akimaa Akuju.

²² Abeite, atupa ka Ekisil, ng'in ibore italauno ka aokot, bobo erimakino arokusio kebukor aokoto bon.

Isubanit ka Kristo elemari Arokusio

²³ Iboro ng'ulu lu alimor lu eraito etolibe ka iboro kaluko kuju, kitemokina akitalaun kesi kokipone kang'olo. Konye iboro ikulopek luko kuju ekotosi isuban lu elaete noi.

²⁴ Naarai mam Kristo abu kolomo Alaro Nakalaunan na esubite ka akanin ka etung'anan, na arait aputo kang'in naka abeite. Abu nesi kolomo kuju alope nama kipokona egwoya nesi koking'aren ka Akuju kanu wok.

²⁵ Esaserdotit ka Iyaudin elomenene Alaro Nakalaunan Noi katipe kokaru edakit nesi aokoto ka etyang'. Konye mam Kristo abu kolomo toma alemun nesi elope iruana ipu,

²⁶ kere kong'in tia Kristo isicanite irwana ipu ageun ape kesubere akwapa. Konye kipokona, aaputo apaarasia adolore osiali, atakanu nesi katipe bon kiton nakesial, alemar arokusio itorit alemun keng' kelope araun isubanit.

²⁷ Etiakute ng'ini itwan atwanare katipe, kau katwanare etubokini Akuju nesi.

²⁸ Kokipone kalope kang'olo, abuni kolemune Kristo de korau isubanit katipe bon kanuka alemar arokusio kalu ipu. Etakanuni nesi nakiyareit, mere bobo kanuka ayuuni itung'a karokusio kes, konye kanuka ayuuni ng'ulu lu iderito nesi.