Iburayon 8 - AKITUTUKET NAKITETET (NEPEPEKA ISABULIN KA AWARAGASIA)

Yesu esaserdotit wok Lokapolon

¹ Kanuka ng'unu, akirot nakapolon kamaka nu abalasi siong' erait na: Ijaasi siong' ka esaserdotit lokapolon bala lo, lo iboye koteten kokicolong' loka apolou loka Lokapolon kokuju.

² Ejaanakini nesi bala esaserdotit Lokapolon kalaro kanaka launan, kotoma ayema kanaka abeite na adukuni Lokapolon, mere na adukuno ka akanin ka etung'anan.

³ Ng'olo esaserdotit lokapolon eseute alemikin Akuju idutan nepepe ka isuban ka ityeng', kanuka ng'un esaserdotit wok lokapolon itemokina nesi de ajaus ka ibore ni elemuni.

⁴ Kere kejii nesi kwapa ne, tin mam nesi cut kerait esaserdotit, naarai ejaasi isaserdotin lu elemunenete idutan atupa ka ekisil.

⁵ Asoma nu isomaete kesi nuka esaserdotene erait usa aputo nepepe ka etolibe kanu ejaasi toma kuju. Eputosi kiton apak ka Musa. Aaputi nesi akiduk ayema Nakalaunan, kolimokini Akuju nesi: “Kitene ng'ini ibore atupa ka ekipone lokitodikino ijo komoru.”

⁶ Konye kipokona ainakin Yesu asoma nuka araus esaserdotit nu epoloko akilanya nu nes kwape ejokunare noi akitumunete nakitenit nesi ikamut Akuju kiton itung'a keng' naarai ageunet keng' erait akitumunet kiboro kalu elaete noi.

⁷ Kere kemam ibore nikaronon katutuket kana sodit, tia mam atenikina akote akitutuket nakiyareit.

⁸ Konye kebu Akuju kitorono itung'a keng' na atemara: “Ebala Lokapolon, ebuto apaarasia, nu egiria eong' akitutuket nakitetet kiton itung'a luko Israel nepepe ka itung'a luko Yuda.

⁹ Mam keputokinosi katutuket na eteni eong' ka papaa kes apaaran na erumia eong' kesi kakan kayar kesi alomar ko Misiri.

¹⁰ Kanuka ng'un, ebala Lokapolon ebe na nes akitutuket na alosi eong' asoma ka itung'a luko Israel apaarasia ebuto: Egwakini eong' ikisila kang' toma adama kes kakigirakin otawon kes. Abuni eong' araun Akuju kes, koraunete kesi itung'a kang'.

¹¹ Mam ipede kama kes ebuni akisisianakin itung'a luka akwap kes kere de alimokin itung'a kes, ‘Kojenu Lokapolon.’ Naarai ejenunete kesi kere eong', ageun kamaka nikaditan akitodol nikapolon.

¹² Arimakini eong' arokusio kes, mam bobo eong' keituni adiakanarete kes.”

¹³ Kejori kuju ka akitutuket nakitetet, adau Akuju akitomojong' nasodit; bobo ng'in ibore ni emojong'i ka akipasa, ebuni amamun apak ape.