Iburayon 7 - AKITUTUKET NAKITETET (NEPEPEKA ISABULIN KA AWARAGASIA)

Esaserdotit Melkisedek

¹ Arait Melkisedek lo ejakait loko Salem, kiton esaserdotit ka Akuju lo Eliliara. Ebonguti Aburaam kojie kalo elanyia nesi ijakaa iwong'on, abu Melkisedek kiriamakinosi ka nesi kosodi Melkisedek akisulwanyikin nesi,

² koinakini Aburaam nesi atutubet ape kama kitomon kiboro kere kalu keraito lukeng'. (Apolou nasodit naka ekiror Melkisedek erait “Ejakait loka Adolite;” bobo kanu araitere nesi ejakait loko Salem, apolou ace naka ekiror keng' erait “Ejakait loka aipuc.”)

³ Mam kelimorite papa keng' kere de toto keng', atikere ipede kamaka ajena keng'; mam ketemarite ibore ipede kuju ka akidouno keng'. Eputosi nesi ka Okoku ka Akuju; ideuni nesi erait esaserdotit ikaru kere.

⁴ Koanyutu ekipone lo epolore nesi! Abu emojong'it Aburaam papa wok koinaki nesi atutubete na kitomon koboro kere lu abu nesi kodum kojie.

⁵ Bobo icorakiite kokisila akidore ka Lebi lu eraito isaseredotin, akidianun atutubete naka itomon alomun kamaka ikanacana ka akanacan kes konye kesi de eraito akidore naka Aburaam.

⁶ Amam Melkisedek arait auri ka Lebi, konye abu nesi kidiau atutubete naka itomon alomun kamaka Aburaam kosodi nesi akisulwanyikin Aburaam, etwan lo abu kodum akitumunete ka Akuju.

⁷ Ng'in itwan ejeni ebe ni epolo nes isulwanyikini ng'in ni edit.

⁸ Ikamuut isaseredotin, itung'a lu etwakete nes idiaunenete atutubete naka itomon; konye ikamuut Melkisedek, lo ejari nes kirarienene atutubet naka itomon, kwape ebalatatare agirasia nukalaunak.

⁹ Ebeikini itwan atemar ebe Lebi elope lo ediaunene atutubete naka itomon abu kotaca atutubete naka itomon, itorit nama ka Aburaam,

¹⁰ naarai aring'a Lebi kidouna, aring'a nesi ejii toma akwana ka papa keng' Aburaam na eriamakinototore Melkisedek ka nesi.

¹¹ Abuni koinakine itung'a luko Israel ikisila kanuka araus Ilebin isaseredotin. Konye kere kideere akijaanakin naka itung'a ka Lebi, tin mam bobo atenikina naka ajaus isaseredotin ice lu egelakina, bobo lu etupito akitemotemo naka esaserdotit Melkisedek, mere naka Aron.

¹² Naarai kibelokin ejautone loka araus esaserdotit, ejii ekisil de akibelokin.

¹³ Konye Lokapolon wok lo etemarite iboro lu kuju keng', alomut kokitekere kalo egelakina, bobo mam itwan epede nika ekitekere keng' ni kijaanakiit erait esaserdotit.

¹⁴ Ejenuna cut ebe edouno nesi erait ipe kokitekere kaloka Yuda; bobo mam Musa abu kolimo ekitekere lo na enerare nesi kuju ka isaseredotin.

Esaserdotit ece bala Melkisedek

¹⁵ Bobo ejenuna akirot na noi: Atakanu esaserdotit ece lo eputosi ka Melkisedek.

¹⁶ Kitaraunete nesi esaserdotit mere atupa ka ikisila ka etung'anan, konye atupa ka agogong' naka akijar kana mam kedaun.

¹⁷ Naarai ebalasi agirasia: “Ibuni ijo araun esaserdotit ikaru kere bala Melkisedek.”

¹⁸ Kanuka ng'un, kocakare ekisil lokolong' naarai anonok bobo mam ajaasi ka ajokun apede.

¹⁹ Naarai ekisil ka Musa mam abeikini akitalaun ibore ipede. Konye kipokona ayaun amuno na ejokuna naking'arakini oni aapikin Akuju.

²⁰ Kuju kang'unu, ajii eyapo loka Akuju. Amam sek eyapo bala ng'olo apak na etaraunere luce isaserdotin.

²¹ Konye abu Yesu korau esaserdotit atupa keyapo apaaran na alimokina Akuju nesi. “Eyapoki Lokapolon, mam nesi kibelokini nu etumuniki nesi: ‘Irauni ijo esaserdotit ikaru kere.’”

²² Agelakina na nes ainakini Yesu erauni nes lokagwoikinan akitutuket na ejokuna.

²³ Epuaka isaserdotin luka sek, naarai abutu atwakisio kirebokisi kesi akitolosite kasoma kes;

²⁴ Konye Yesu isomae asoma keng' nuka araus esaserdotit ikaru kere, naarai itolosit nesi kokaru kere.

²⁵ Kanuka ng'un, ebeikini nesi ayuuni ikaru kere ng'ulu lu elosete namaka Akuju itorito nama keng', naarai ejari nesi ikaru kere ilipi Akuju kanu kes.

²⁶ Kanuka ng'un erait Yesu esaserdotit lokapolon lo ing'aranakini oni. Erait nesi lokalaunan; mam aronus kotoma keng'; agelar nesi awai kamaka lukarokok kikiarete nesi kuju.

²⁷ Mam nesi keputosi ka isaserdotin lukapolok luce; mam nesi kitemokina alemunun isuban ng'in paaran kanuka arokusio keng' kilope kiton kanuka arokusio ka itung'a. Abu nesi kolem isuban katipe bon kiton kanuka itung'a kere na alemunere nesi elope.

²⁸ Ekisil ka Musa eseunene itung'a luka arokusio araun isaserdotin lukapolok; konye akitumunete ka Akuju na abu nesi kisoma koyapo; na abu kobu kokau ka Ekisil, eseuni Okoku lo etalaun ikaru kere.