Iburayon 6 - AKITUTUKET NAKITETET (NEPEPEKA ISABULIN KA AWARAGASIA)

¹ Kanuka ng'un, kekunyasi king'aren nama ka akisisianakino na icatarit ka akinyekini kokau wok akisisianakino nasodit naka akiroto ka Ekiristayone. Mam oni bobo akiduk apetetait naka alomar kasomisio kanu emam adumunete akiyuun Akuju;

² akisisanakino kuju ka akibatisao nepepe ka akidokokino akanin; ajarun ka lukatwak nepepe ka atubokino na emam esial.

³ Kekunyasi king'aren! Nu nes nu ibunete oni asoma kecamaki Akuju oni.

⁴ Ekipone ali inyakunere itung'a lu ang'eroto akiyuun kes akisilar bobo? Apak ape ajaasi kesi toma acaus ka Akuju; abutu kesi kiirata idutan ka Akuju kosodete adumun etyae kes loka Emoyo Lokalaunan;

⁵ Abutu kesi kojenutu kotoma akijar kes ebe ejokuna akirot ka Akuju, bobo kiirasi apedor naka ikaru kalu ebuto.

⁶ Kosodete kesi akinyekin akiyuun kes! Icasit akinyakun kesi kisilasi arokusio kes bobo, naarai ebubukisi kesi bobo Okoku ka Akuju omusalaba kakitisilikin nesi koking'aren ka itung'a.

⁷ Isulwanyinikini Akuju alipo nu emasete akiru na edoinikini kesi nepepe kanu itopoloete iraito lu ejaasi kadumunet kamaka ng'ulu kalu iraikite araito ng'unu kanu kes.

⁸ Konye kigwaki ikokwa kiton emoto, emam adumunete apede aapete ka akilamio; esial keng' erait akicweikin ka akimi.

⁹ Atikere kinerasi siong' ekipone lo, luminana, eirarito siong' name ejokuna kuju kus. Ijenete siong' ebe ijaasi osi ka arereng'usio nukajokak nuka alakuno kus.

¹⁰ Mam abeite kesali kamaka Akuju; mam nesi kimuruokini asoma nu isomato osi kere de amina na itodikisi osi nesi ka aking'arasit kana ilemuto osi bobo itolosito osi ainanakin Ikiriatayon luce.

¹¹ Nukapolok cut nu akotosi siong' kama kus erait ebe kitolosite ng'ini itwan kama kus kamuno akitodolo osial tetere ebunete iboro lu imunokiito osi araun abeite.

¹² Mama siong' kikotosi osi akalanyanar, konye ajaus osi bala ng'ulu lu iyuuto kojaasi katitinyu kosodete adumun nu isumunikiit Akuju kesi.

Akitumunikinete ka Akuju naka abeite

¹³ Nakeinakina Akuju Aburaam akitumunikinete keng', abu nesi kiyapo asoma nu kebu nesi kitumunik. Kanu kemamare itwan nikepolo akilanya Akuju elope, kosodi nesi akitosoma ekiror keng' kelope iyapoe nesi,

¹⁴ ebala, “Teni, esirereng'i eong' ijo, kakiyatakin auri kon.”

¹⁵ Kejaasi Aburaam katitinyu, kosodi nesi adumun iboro lukitumunikit Akuju nesi.

¹⁶ Iyapoyete itung'a, itosomaete ekiror loka itwan kice kani epolo akilanya kesi ikulopek, kosodi eyapo adaun apega.

¹⁷ Ng'ulu lu kitemokiit Akuju adumun nu kitumunikiit nesi, akote Akuju akitodiar ebe mam nesi cut kibelokini nuketiakut nesi asoma; kanuka ng'un, kiyatakini nesi eyapo keng' akitumunete.

¹⁸ Kanuka ng'un, ejaasi akiro nu aare nu emam kibelokinosi bobo nu mam Akuju king'alakini kuju kes. Kanuka ng'unu oni lu ikuata kama keng', kinakiite itawon luka akirumite baaba amuno na ipiakiite king'aren wok.

¹⁹ Ijaasi oni kamuno kana erait bala epir loka akijar wok. Idari bobo erait naka abeite, bobo elosi nesi kadepar nama ejii epasia lo ejii Otogo ka Akuju lo ejii kuju kadolore alaro nakalaunan kokuju.

²⁰ Kanuka ajokus wok, agee Yesu kama wok akilomo toma ng'ina, bobo araun nesi esaserdotit lokapolon ikaru kere kwape eraitere Melkisedek esaserdotit.