Iburayon 5 - AKITUTUKET NAKITETET (NEPEPEKA ISABULIN KA AWARAGASIA)

¹ Eseuno ng'olo esaserdotit lokapolon kotung'a keng' kinyonyoikinete nesi akijaanakin Akuju kanuka itung'a, akileme isuban nepepe ka idutan kanuka arokusio.

² Kanu enonokar nesi elope korotin kalu egelegela, ebeikini nesi akinapaara kamaka ng'ulu kalu mam kejenete ibore nepepe ka ng'ulu lu ediakanarete.

³ Kanu enonokar nesi elope, ejii nesi alemun isuban mere kanuka arokusio ka itung'a bon konye kanuka arokusio keng' kelope de.

⁴ Mam ipede ni eseuni ilope akitopolori araun esaserdotit lokapolon. Erait kanyarauno ka Akuju bon nes erauna itwan esaserdotit lokapolon kwape ka Aaron.

⁵ Kokipone kalope kang'olo, mam Kristo elope abu kitopolori araun esaserdotit lokapolon. Konye Akuju nes alimokini nesi: “Irait ijo Okoku kang'; lolo araun eong' Papa kon.”

⁶ Etemarit nesi kalaro kace, “Irauni ijo esaserdotit ikaru kere kwape ka Melkisedek.”

⁷ Kakijar ka Yesu ejii nesi kwapa ne, abu nesi kilip Akuju emonyi noi koleleete akiyo, Akuju lo abeikini ayuuni nesi kotoma atwanare. Kiirari Akuju nesi kanuka akiyapepera keng' nepepe ka alemuna keng'.

⁸ Teni arait nesi Okoku ka Akuju, konye abu nesi kisisiau ayong'ara kocani keng'.

⁹ Nakitalaunere nesi, abu korau nama edumunata itung'a kere lu eyong'ito nesi akiyuuno,

¹⁰ kosodi Akuju aseun nesi araun esaserdotit lokapolon bala Melkisedek.

¹¹ Ering'a ejaasi nu ipu nu itemokina siong' atemar ikamuut akiro nu, konye ekekes alimokin osi apolou kes naarai mam osi ketapana apupun.

¹² Ajaikinosi osi ka apak kana elesikina osi araun lukesisianakinak, konye ering'a osi ikotosi itwan kisisianak osi akiro ka Akuju nu sodit. Atia osi akinyama inyamen lu icasito, itolosito osi akimata akile.

¹³ Itwan kere ni itolosit akimata akile ering'a erait ikoku, mam kejeni nukajokak kanukarokok.

¹⁴ Konye inyamen lu icasito eraito luka itung'a kalu icatarito, lu ebeikinete akitegelikin ibore nikajokan kanikaronon.