Iburayon 4 - AKITUTUKET NAKITETET (NEPEPEKA ISABULIN KA AWARAGASIA)

¹ Etumuniki Akuju oni ebe ilomete oni alaro ng'ini na iyeng'unere na abu nesi kinere kuju keng'. Kanuka ng'un, kacoikinasi tetere emam ipede kama kus ni ikarakini adumun akiyeng'un ng'ini.

² Naarai iirasi oni Akiro Nukajokak kwape kiirarata kesi. Abutu kesi kiirasi akiro, konye mam akiro ng'unu abutu king'arakisi kesi ibore ipede, naarai na eirarata kesi akiro ng'unu, mam kesi abutu kocamutu kakiyuun.

³ Naarai kilomi oni lu iyuuto toma akiyeng'un ng'ini, kwape kedauna nesi atemar, “Kwape eyapokina eong' kanyunyura kang', mam cut kesi kelomete akiyeng'un kang'.” Atemari nesi nu atikere kedauna asoma keng' ape kesubunere akwap.

⁴ Naarai kalaro kace kagirasia kanukalaunak nu nes ebalai kuju ka apaaran kana kikanyetkaare: “Kiyeng'uni Akuju apaaran nakikanyet kaare.”

⁵ Inerai bobo kuju ka akirot kana ikamuut akiyeng'un: “Mam kesi cut kelomete akwap ng'ini nama etemokina eong' akisiyeng'un kesi.”

⁶ Ng'ulu lu agete akiirari Akiro Nukajokak mam abutu kodumutu akiyeng'un ng'ini, naarai mam kesi amunokiito. Kanuka ng'unu ejaasi ice lu ecamute kodumutu akiyeng'un ng'ini.

⁷ Abu Akuju kipiak apaaran ace na enyarite “Lolo,” kokau kotemari itorit nama ka Daudi akiro nukedaute atemar, “Kiirasi osi lolo eporoto ka Akuju, mam akisicasite itawon kus.”

⁸ Kere keinakiiti Yosua itung'a akiyeng'uni nakisumunikiit Akuju, tia mam Akuju kinerit kokau kuju ka apaaran kace.

⁹ Kanuka ng'unu ejii itung'a ka Akuju akiyeng'un ka apaaran kanaka esabato;

¹⁰ naarai ng'ini kere ni elomi toma akiyeng'un ka Akuju, ejii nesi akiyeng'un kotoma asoma keng' kwape kiyeng'una Akuju de kasoma keng'.

¹¹ Kanuka ng'unu katamakisi cut kalomata toma akiyeng'un ng'ini, tetere emam ipede kama wok ni ewolie kwape kikokinere kama kes nakemamuna kesi akiyuun.

¹² Naarai Akirot ka Akuju ejari bobo ejii isomae, ekwana akilanya ekileng' kere lokaujan lo ipienarite iwaitin iare. Etubi cut akitodolo nama iriamatatar emoyo kiton etau, akitodolo nama iriamatatar iboro ka akwana kiton akojo, emoe nu ekote etau.

¹³ Emam ibore ni ebeikino akigwa koking'aren ka Akuju; ng'in ibore itodute bobo itee nesi. Nesi nes ebuni atubokin oni kere.

Yesu Esaserdotit Lokapolon

¹⁴ Kanuka ng'unu kacoikisi akiyuun wok na itemasi oni ejaasi ka oni. Naarai ijaasi oni ka Yesu Okoku ka Akuju, esaserdotit lokapolon noi lo adau akilomo nama ejii Akuju.

¹⁵ Esaserdotit wok Lokapolon mam kerait lo mam kisonie oni na emamare oni agogong'u. Konye ijaasi oni ka esaserdotit Lokapolon lo apon kotamai nesi korotin kere bala oni konye mam nesi abu kisoma aronus.

¹⁶ Kanuka ng'unu kaapikisi ekicolong' ka Akuju loka ang'osibib nepepe ka asianut tetere kisonio oni ka adumun asianut na ing'arakini oni kocan.