Iburayon 3 - AKITUTUKET NAKITETET (NEPEPEKA ISABULIN KA AWARAGASIA)

Epolo Yesu akilanya Musa

¹ Kanuka ng'un ikanacana ka akanacan lukalaunak lu adau Akuju anyaraun kiitunenete kuju ka Kristo ekiyakia ka esaserdotit lokapolon loka akiyuun wok.

² Amunokina nesi kamaka Akuju kalo aseuni nesi, kwape amunokinare Musa de kotogo ka Akuju.

³ Etwan lo eduki etogo nes itopoloro noi adepar etogo elope. Kokipone kalope kang'olo etopolor Yesu akilanya Musa.

⁴ Itwan nes eduki ng'olo etogo, konye lokadukon iboro kere erait Akuju.

⁵ Amunokina Musa korotin kere kotogo ka Akuju erait nesi ekejaanakinan elimonori nesi iboro lu kitemokina ejori ruaru.

⁶ Konye emunokina Kristo erait Okoku lo epolokiit Etogo ka Akuju. Iraito oni etogo keng' kimam oni kikuriaka bobo kijaasi oni kepogi kanuka ng'un kanu imunokiito oni.

Akiyeng'un ka itung'a ka Akuju

⁷ Kanuka ng'unu kwape ebalare Emoyo Lokalaunan, “Lolo, na iirara ijo eporoto keng',

⁸ mam akisicata itauon kus kwape kimojong' kus lu abutu konwang'ata Akuju, kwape esomata kesi apaaran ng'ini komoding' na atamiata kesi nesi,

⁹ nama atamiata kes ka papaa kus eong' bobo eteete asoma kang' ikaru akais aung'ono.

¹⁰ Kanuka ng'unu abu kokadak eong' awuri ng'in, katemari eong', ‘Ang'eroto kesi eong'; ang'eroto kesi asoma nu ecorakiit eong' kesi asoma.’

¹¹ Kwape eyapokiitere eong' kanyunyura kang' ebe, mam kesi kelomete akiyeng'un kang'.”

¹² Kanuka ng'unu ikanacana ka akanacan kocoikinasi ebe ipe kama kus ejaasi ka etau lokaronon mam kejaasi ka akiyuun, etau lo ekote ijo alomar kamaka Akuju lo ejari.

¹³ Konye ejii osi akitogogong' nice ng'in paaran, itolosit akiroto “Lolo” akitosomao, ebe mam ipede kama kus ni ebuni aliokonu naka aronus akitininik etau keng'.

¹⁴ Naarai iraito oni kere lukamorak nepepe ka Kristo kiricakisi oni akiyuun wok akitodol osial.

¹⁵ Nu nes ebalasi agirasia: “Kiirasi osi eporoto ka Akuju lolo, mam akisicasite itawon kus bala imojong' kus lu abutu kong'eroto apupun Akuju.”

¹⁶ Kes ka ng'ai itung'a lu abutu kopuputu eporoto ka Akuju konye konwang'ete nesi? Ng'ulu kere lu alomarete ko Misiri ing'arenikiti Musa kesi?

¹⁷ Ng'ai kenyunyurakiit Akuju kokaru akaisawong'on? Ng'ulu lu esomato arokusio, lu abutu kibirorosi kotwakete komoding'?

¹⁸ Kes ka ng'ai kebu Akuju kiyapoki ebe mam cut kelomete alaro keng' naka akiyeng'un mam kerait ng'ulu lu abutu konwang'ata nesi?

¹⁹ Kanuka ng'unu iyanyutu oni ebe mam kesi abutu kolomata kanuka amamus ka akiyuun.