Iburayon 2 - AKITUTUKET NAKITETET (NEPEPEKA ISABULIN KA AWARAGASIA)

Akiyuuno na Epolo

¹ Ng'ini nes atenikina itemokinare oni aricakiite nu ipuputu oni tetere emam oni kiwoliorete.

² Akirot nakepotu imalaikan koinakisi lukasonya wok apon kitodune erait abeite kosodete ng'ulu kere lu kemam kepotu kotupata kayong'ite akiro ng'unu adumun akitisilaro na etemokina kesi adumun.

³ Ikote konye oni ikuyete ayi kimam oni kipodosi akiyuuno na epolo bala na? Lokapolon elope nes agei alimor akiyuuno na, kosodete ng'ulu lu abutu kiirasi nesi kitodiasi kama kosi ebe teni erait abeite.

⁴ Abu Akuju bobo kiyataki akijene keng' nama kes kokipone kaloka asoma aumosia nu egelegela nepepe kanuka akiuka bobo kokipone kaloka akikoro idutan luka Emoyo Lokalaunan atupa kakote keng'.

Lokiyait oni akiyuuno

⁵ Mam Akuju kipiakiti imalaikan araus lukepitak akwapa nakitetet na ebuti, akwapa na inerasi oni kuju keng'.

⁶ Konye ebalasi agirasia kalaro kace: “Inyena konye Itwan ni iitunene ijo kuju keng', kere de okoku ka etwan lo ipodo ijo kuju keng'?

⁷ Ibu ijo kosubu nesi edite nedio kamaka imalaikan; kitanapa ijo nesi abokok nepepe ka akibusesu ka apedor,

⁸ ipiakiit iboro kere akejene keng'.” Ka akipiakin iboro kere akejene keng', mam adepakin ibore ipede koking'a ka apedor keng'. Kwape iteoto oni kipokona, mam oni kiteete ng'in ibore ejii akejene keng'.

⁹ Konye iteete oni Yesu, lo apon kitiditeune kamaka imalaikan, itanapite akibusesu kanuka icani luka atwanare, tetere iiri nesi atwanare kanuka ng'in itwan atupa ka asianut ka Akuju.

¹⁰ Adolit ebe Akuju, lo esubi kakidar iboro kere akitaraun Yesu etwan lo edolit kokipone kaloka akisitor nesi ocan kanuka ayaun idwe lu ipu akimor akibusesu keng'. Naarai Yesu nes lo eyait kesi akiyuuno.

¹¹ Naarai nesi lo italauni nepepe ka ng'ulu lu italauno elomuuto kalaro kape. Ng'in nes atenikina mam nesi kesilikiit anyaraun kesi ikanacan ka akanacan,

¹² ebala, “Alimok eong' itung'a kang' nu isoma ijo; keturi eong' ijo kokiding' kes.”

¹³ Bobo, “Epiakini eong' amuno kang' nama keng'.” Kosodi bobo, “Eong' lo, nepepe ka idwe lu ainaki Akuju eong'.”

¹⁴ Kanu eraitetere idwe kwape ka itung'a kalu ejaasi ka akiring' ka aokoto, abu Yesu elope korau bala kesi komori etung'anane kes. Abu nesi kisoma nu tetere emudiari nesi Asatanit kokipone kaloka atwanare keng', Asatanit na ebeikiit ayaun atwanare,

¹⁵ kosodi nesi kokipone kalo akitukuu ng'ulu lu araito ijoloi kakijar kes kere kanuka akurianu kes atwanare.

¹⁶ Abeite mere imalaikan nes epodo nesi. Konye epodo nesi auri ka Aburaam.

¹⁷ Kanuka ng'unu kitemokina akitaraun nesi bala ikanacana ka akanacan keng' korotin kijokis tetere erauni nesi esaserdotit lokapolon lo ejaasi ka asianut ka amunokina kotoma akijaanakin Akuju, tetere erimakino arokusio ka itung'a.

¹⁸ Kanu atamere ka akicana nesi elope, ebeikini nesi aking'arakin ng'ulu lu etamite bobo icanasi.