Iburayon 13 - AKITUTUKET NAKITETET (NEPEPEKA ISABULIN KA AWARAGASIA)

Ekipone loka akitalakar Akuju

¹ Kitolositete ka amina luce bala ikanacana ka akanacana kotoma Kristo.

² Kiitutete akidiaunun ipejok koreria kus. Ajaasi ice lu abutu kisomata ng'unu kosodete akidiaun imalaikan mam kejenete.

³ Kiitutete ng'ulu lu ejaasi toma aenis, bala kijaasi osi aenis nepepe ka kesi. Kiituutete ng'ulu lu icanasi, bala icana ijo kwape icanatatare kesi.

⁴ Itemokina itung'a kere acoite adukokino. Ejii ikiliok ka aberu amunokiit nice. Ebuni Akuju atubokin ng'ulu lu edoteyaka kiton ng'ulu lu isomaete adoteu.

⁵ Mam amina ikabel; kilesikina kanu ejaasi ka ijo. Naarai atema Akuju, “Mam eong' cut kenyekini ijo; mam eong' kacakari ijo.”

⁶ Kanuka ng'un, kenyekisi Akurianu, katemasi: “Erait Lokapolon lokeng'aranakinan kang', mam eong' kakurianari. Inyena ebeikini itwan ipede akisomakin eong'?”

⁷ Kiitutu ikeng'arenikinok kus, lu abutu kolimonokisi osi akirot ka Akuju. Kowomowomota kuju kejarete kiton ekipone lo atwakiata, bobo kotupata akiyuun kes.

⁸ Yesu Kristo nesi jepeje, lolo ka ikaru kere.

⁹ Mam ajalakin akisisianakino na egelegela na itegelikina kamaka Akiro Kanukajokak elemarete osi koroto kaloka abeite. Ejokuna adumun agogong'u nako toma alomun kamaka asianut ka Akuju, konye mere ebe kokipone kaloka acoite ikisila lu ikamuto inyamen; ng'ulu lu ecoito ikisila lu, mam kedumuto aking'arasit apede kama kes.

¹⁰ Ijaasi oni altari nama mam kitemokina ng'ulu lu ijaanakinete ko Otogo ka Akuju akinyam kaneni.

¹¹ Naarai ityeng' ng'ulu lu eyaunene esaserdotit lokapolon aokot kes Otogo ka Akuju eraito bala isuban lu elemarere arokusio icweo koking'a kekambi.

¹² Kanuka nu nes kicanar Kristo de koking'a ka erute, tetere italauni nesi itung'a ka aokot keng' kelope.

¹³ Kanuka ng'unu kalototo king'a nama ejii nesi koking'a kekambi. Komorata arasio keng'.

¹⁴ Naarai kakwap kana mam oni ere lokapolon lokikaru kere, konye ikotosi oni ere lo ebuti.

¹⁵ Kanuka ng'un, kainakisi Akuju akibusesu erait bala isubanit wok kotoma Kristo, lo erait idutan luka akituke kalu iyuuto nesi bala Lokapolon.

¹⁶ Mam akimuruokin asoma nukajokak nepepe ka aking'aranakin luce, naarai lu nes isuban lu italakarito Akuju.

¹⁷ Koyong'itete lukeng'arenikinok kus, bobo kotupata acorasia kes. Idarete kesi imoyoi kus mam akiyeng'un naarai ejii kesi akitodikin Akuju nukisomato kesi kakijaanakin kes. Kipupoto osi kesi, elosete kesi akijaanakin kalakara; konye kemam, ebunete kesi akijaanakin kitawon kalu ebilakina. Mam ng'un king'arakinete osi.

¹⁸ Kitolositete akilipakiite siong'. Ijenete siong' ebe elaete awomowomosia kosi, naarai ikotosi siong' asoma nu elaete kang'in pak.

¹⁹ Kemaimait eong' osi cut ebe kilipakiitete eong' tetere ijukuni Akuju eong' bobo nama kus ka apak kana aapi.

Akilip nako osial

²⁰ Elipit eong' Akuju lo etajaruni Lokapolon Yesu wok alomun kamaka lukatwak, lokapolon lokecokon amerekekin akitoro abukorio ka aokot nuka akitutuket naka ikaru kere,

²¹ koinaki osi ng'in ibore nikajokan tetere isomaete osi nu ekote nesi; isomae nesi kama kus nu italakarito kakonyen keng' akitoro nama ka Yesu Kristo; lo ejaasi ka akibusesu ikaru kere. Ikote nepeneni.

Akiro nuke esial

²² Kemaimait eong' osi ikinacan ka akanacan kopupoto akiroto kang' na einakini itwan agogong', naarai egiraki eong' osi ebaruait kaurianut.

²³ Akote eong' akitodikin osi ebe adaun alakakin onac wok Timoti kaenis, lo ebunete nepepe ka eong' anyun osi kedolu nesi atipet.

²⁴ Kimalata lukeng'arenikinok kus kere nepepe ka itung'a ka Akuju kere. Kimalaete osi itung'a luko Itali amalan.

²⁵ Asianut ka Akuju kojaasi ka osi kere. Ikote nepeneni.