Iburayon 12 - AKITUTUKET NAKITETET (NEPEPEKA ISABULIN KA AWARAGASIA)

Akuju Papa wok

¹ Ikamuti oni, ijaasi oni ka akwapa kalukajenak irimo kiito oni. Kanuka ng'un kenyekisi ng'ini iboro ni irebokini oni koroto nepepe ka aronus nakirumit oni cut. Kakerata katitinyu akerite na ejii king'aren wok.

² Kadupakisi akonyen wok namaka Yesu, nama egong'akina akiyuun wok amieun kageunet akitodolo osial. Mam nesi abu kopasa kanuka emusalaba! Konye kanuka ailel kana kidarit nesi, mam nesi abu koanyu atwanare komusalaba erait asilut. Bobo iboye nesi kipokona kakani kanakoteten kekicolong' ka Akuju.

³ Kiitutu nu kebu Yesu kodum; Ekipone lo ekanyia nesi eding' kaluka arokusio! Kanuka ng'un mam akipasa amunokiite Akuju.

⁴ Naarai kotoma auta kus karokusio, ering'a osi kejio akitodolo nama ibukoroto osi aokot kus.

⁵ Kimuruoki osi akiro nu einakiito itawon agogong'u nu abu Akuju kisiner osi bala isapa kiton apesuru keng'? “Ikoku kang', kopupi kotenan nakicoria ijo Lokapolon, bobo mam etau kon abila kiretaki nesi ijo.

⁶ Naarai icori Lokapolon ng'in kere ni emina nesi, bobo kakitisilar ng'in itwan ni idiauti nesi bala ikoku keng'.”

⁷ Kikanyata ican lu idumunete osi erait bala acorasia ka papa; icani kus itodikiito ebe eyait Akuju osi bala idwe keng'. Ejaikina apelem ikoku ni emam papa keng' kitisilarit?

⁸ Kimam kitisilaro osi kwape isomanikinere idwe keng' kere, itodikiit ebe mam osi kiraito idwe luka abeite, konye luko king'a.

⁹ Ikamuti kes ka papa wok luka akwap, abutu kesi kisicanata oni konye kayong'ete oni kesi. Ekipone konye ali itemokinare oni acoite Papa wok loka Emoyo tetere ijarete oni.

¹⁰ Kes ka papa wok luka akwapa abutu kitisilasi oni ka apak kana auriana, kwape kanyutetere kesi ebe ejokuna; konye Akuju itisilari oni kanuka adumunete wok kikulopek, tetere imorete oni akibusesu keng'.

¹¹ Na itisilaritere oni, erait bala ibore ni itakadikiit mere ni italakarit. Konye kokau, ng'ulu lu etisilario kakisicanio kang'in, ebunete akidwenye idutat nika akijar naka aipuc.

Akicorasia nepepe ka Akikwenyanareta

¹² Kanuka ng'un kikiasi akanin nukepasata, bobo kisicatata akong'in kus nu mam kejaasi ka agogong'u.

¹³ Kitolositete alosite korotin kalu eruara, tetere emam ni eng'walit kitang'walio cut konye kitang'aleune.

¹⁴ Kotamakisi akiboi ka itung'a kere ka aipuc, bobo kotamakisi ajaus ka akijar nakalaunan naarai mam itwan ipede ni ebuni aanyuni Lokapolon mam kitalauna.

¹⁵ Kocoikinasi mam akinyekin asianut ka Akuju. Kocoikinasi mam itwan ipede arauni bala ekitoi lokadwaran lo epolouni kosodi asorit keng' ayaun ican lu ipu.

¹⁶ Mam itwan ipede asoma nuka adoteu kere de akinyekin asoma ng'unu nuka Emoyo bala Esau, lo abu kogwela nu kitemokina nesi adumun kinyamen kaluka akolong' kape bon.

¹⁷ Ijenete osi ebe nakekotore nesi kokau adumun arereng'u ng'in kamaka papa keng', apon kimikai nesi, naarai mam nesi abu kodum apak naka akibelokin, atikere kakimonyo keng'.

¹⁸ Naarai mam osi kibuto namaka ibore kani ebeikiite ajorori, akimi na enoki bobo akirionus, ka icani, kiton aike,

¹⁹ acelun ka arupepe, nepepe ka aruore keporoto, kilipete kesi mam bobo akiirar akiroto ace,

²⁰ naarai mam kesi abeikinete akikanya acorasit nakebala, “Atikere kejoro etyang' emoru, ejii akibiribiri ka amoru akiyara.”

²¹ Etukurian alaro na ainakini Musa atemar, “Eceki eong' ka akurianu.”

²² Konye ibutu osi omoru loko Sayon, ere lokapolon ka Akuju lo ejari, Yeruasalem nako kuju, kiton nama etukokina aritai kimalaikan.

²³ Ibutu osi atukot ka idwe lu sodit ka Akuju, atukot naka ailel, lu igirite iroria kes kuju. Ibutu osi nama ka Akuju, lokatubonokinan itung'a kere, bobo ibutu osi nama ka imoyoi ka itung'a kalu ejoka kalu etalaun.

²⁴ Ibutu osi namaka Yesu, lo kiteni akitutuket nakitetet, ka aokot nu ebukoro nu itumunikiito akiro nu ejoka noi adepar aokot nuka Abel.

²⁵ Kanuka ng'un, kocoikinasi mam aking'ere akipupu ng'olo lo inera. Ng'ulu lu abutu kong'eroto akipupu alimokini kesi akiro nukalaunak kakwap kana, mam atwakare. Ikoni editari oni akikuu ayi, king'eroto oni akipupu ng'olo lo inera alomun kokuju?

²⁶ Kijang'ajang'a eporoto keng' akwapa kapak kang'ini, konye kipokona esumunikin nesi, “Ejang'ajang'akini eong' bobo mere akwapa bon, konye kuju de.”

²⁷ Akiro nu: “Bobo de” itodikiito ebe iboro lu esubite ijang'ajang'akino kalemar, tetere ideunosi iboro lu mam kebeikino akijang'ajang'akin.

²⁸ Kanuka ng'un, keyalamasi kanuka adumun ajakaanut na mam kebeikino akijang'ajang'akin. Kemaata Akuju kokipone kalo itemokina, kayong'ite nepepe ka akurianu;

²⁹ naarai erait Akuju wok akimi na ededeng' na itisisie.