Iburayon 11 - AKITUTUKET NAKITETET (NEPEPEKA ISABULIN KA AWARAGASIA)

Akiyuuno

¹ Ajaus ka akiyuun erait amunokin ebe idumunete oni iboro lu imunokiito oni idumunete oni; akiyuun cut iboro lu mam oni kiyanyuto.

² Naarai imojong' luka sek abutu kocamune kesi kanuka akiyuun kes.

³ Erait kanuka akiyuun nes ijeniata oni ebe asubuno akwapa ka akirot ka Akuju tetere iboro lu etakanete kesubuno alomun koboro kalu mam ketakanete.

⁴ Arait akiyuun nes ainakini elemikini Abeli Akuju isubanit nikajokan akilanya nika Kain. Kanuka akiyuun keng' nes emarakina Akuju nesi bala etwan lo edolit, naarai abu Akuju elope kocamu idutan keng'. Ering'a Abeli inera akitoro akiyuun keng' atikere ketwanit nesi.

⁵ Kakiyuun nes ayarere Enok kuju tetere nesi mam kanyuni atwanare; bobo mam nesi adumun, naarai adaut Akuju ayaari nesi. Ering'a nesi keyara kuju, kebun kotamai nesi kitalakarit nesi Akuju.

⁶ Emam itwan ni ebeikini akitalakar Akuju mam kejaasi ka akiyuun, naarai ng'ini kere ni ebuni nama ka Akuju itemokina nesi akiyuun ebe ejii Akuju bobo ebe eropi nesi ng'ulu lu ekotosi nesi.

⁷ Akiyuun nes ainakini Noa epupuuni akikwenyareta nuka Akuju ikamuut akiro nukebuto nu kemam nesi kebeikini anyun. Koyong' nesi Akuju kosodi nesi akiduk ataker kanuka ayuuni nesi elope ka ekale keng'. Kanuka ng'unu, kotubokine akwapa konye abu Noa kodum akitalauno alomun kamaka Akuju akitalauno na edumunono kanuka akiyuun.

⁸ Arait akiyuuno nes ainakini Aburaam epupuni na anyarauna Akuju nesi kalimokin nesi kolot akwapa na kisumunikiit Akuju ainakin nesi. Abu nesi koloma kakwap keng' kelope mam kejeni nama elosi nesi.

⁹ Kakiyuun nes eboya nesi bala epejonon ka akwapa kana kebu Akuju kitumunik nesi. Kiboi nesi kotoma ayemai, kwape ka Isaka nepepe ka Yakobo, lu adumuto akitumunet ng'ipeng'ini alomun kamaka Akuju.

¹⁰ Naarai edarit Aburaam ere lokapolon lokedau Akuju akiten kiton akiduk, ere lo icasito apeteta.

¹¹ Akiyuun nes ainakini ebeikini Aburaam araun papa atikere kapaki kana amojong'itere nesi noi bobo kapak kana amamare Sara de alope abeikini akidore idwe. Abu nesi komunoki ebe ebuni Akuju akisomakin nukitumunikiit nesi.

¹² Alomun kamaka Aburaam, etwan epe lo, lo asiit bala etwanit nes alomunata itung'a lu ipuaka kwape ka akanyere kanu ejaasi kuju ka asing'e na ejii akare.

¹³ Abutu itung'a lu kere kotwakata ering'a ejaasi ka akiyuun. Mam kesi abutu kodumutu iboro lukitumunikiit Akuju kesi, konye abutu kesi kwanyutu kalwanus iboro ng'ulu kosodete kesi akidiaun, kocamunete kesi koking'aren ka itung'a ebe keraito kesi imoo kiton lukakerak kakwap kana.

¹⁴ Itung'a lu inerasi akiro bala kang'unu, itoduto ka acaus ebe ekotosi akwapa kes bon.

¹⁵ Kere cut kiitunenete kesi kuju ka akwapa kanakelomunata kesi sek, tia kesi ebong'orito sek.

¹⁶ Konye kipokona, ekotosi kesi akwapa na elae noi, akwapa nako kuju. Kanuka ng'unu, mam kesilikiit Akuju enyarite nesi Akuju kes, naarai etenak nesi kesi ere lokapolon.

¹⁷ Akiyuun nes ainakini elemuni Aburaam okoku keng' Isaka bala isubanit apak na atamia Akuju Aburaam. Aburaam nes kisumunikiit Akuju, konye kong'in de alokokina nesi alemun okoku keng' bala isubanit.

¹⁸ Kedauti Akuju alimokin nesi, “Erait akitoro namaka Isaka nesi elomuna auri na ketumunikiit eong' ijo.”

¹⁹ Abu Aburaam kocamu ebe teni ebeikini Akuju akitajarun lukatwak; bobo kokipone kece, teni abu Aburaam kodumu ikoku keng' alomun kamaka lukatwak.

²⁰ Akiyuun nes ainakini Isaka itumunikini Yakobo kiton Esau asulwany kanuka apaarasia kanuko king'aren.

²¹ Akiyuun nesi keinakini Yakobo isulwanyikini isapa kere luka Yosef aaputi nesi atwanare. Abu nesi kogong'akin kuju kebela keng' kosodi nesi akimaa Akuju.

²² Akiyuun nes keinakini Yosef aaputi nesi atwanare ejori kuju ka alomar ka itung'a kaluko Israel ko Misiri, kosodi alemun akicorasia kuju kanu ekotokina akisomakin akwana keng'.

²³ Akiyuun nes keinakini ikauriak ka Musa igwaete nesi ilapio iuni kedaun akidoun nesi. Kepotu kesi kwanyutu ebe erait nesi ikoku ni elae, bobo mam kesi abutu kokuriakarosi akinwang' akicorasia nuka ejakait.

²⁴ Akiyuun nes keinakini Musa kedau apoloun, aking'ere anyarauno okoku ka apese ka ejakait Farao.

²⁵ Kebu nesi koseu akicanakin nepepe ka itung'a ka Akuju akilanya alakara asoma aronus ka apak kana edit.

²⁶ Kebu nesi kwanyu ebe ejokuna adumun icani kanuka Kristo akilanya ajakaanut kere nako Misiri naarai eitunene nesi kuju kadumun eropit loka apaarasia kanu ebuuto.

²⁷ Akiyuun nes keinakini elomari Musa ko Misiri mam akurianu ejakait loka dedeng'an; Abu nesi kong'ere abong'ori kau bala itwan ni kedau anyun Akuju lo mam ketakani.

²⁸ Akiyuun nes keinakini nesi ageun asoma epucit loka Paska, kakigwata aokot okekia tetere emam Emalaikat loka atwanare kaari isapa lu sodit luko Israel.

²⁹ Akiyuun nes keinakini itung'a luko Israel atubor kakare kanakenyarite Akare Nakareng'an bala kitorito akwapa na ewonit; naketamakinata itung'a luko Misiri de atubor kilikorete akipi kesi.

³⁰ Akiyuun nes keinakini arwatan nuko Yeriko akibiror kedautu itung'a luko Israel akimanamana apaarasia akanykaare.

³¹ Akiyuun nes kitukui amalayata Raabu ario nepepe ka ng'ulu lu mam kecoito Akuju, naarai abu nesi kidiau kotenan lukang'icak alomun ko Israel.

³² Anyena ace bobo itemokina eong' atemar? Mam eong' apak alimor kuju ka Gidion, Barak, Samson, Yefta, Daudi, Samuel nepepe ka lukadwarak.

³³ Akiyuun nes keinakini kesi itijiyete akwapin kilanyete. Abutu kesi kisomata nu alaete kosodete adumun nukitumunikiit Akuju kesi. Abutu kesi kogoloto akituke nuka ing'atunyo,

³⁴ kwarete akimia nukapolok, kokuyete ario kekileng' kalukaujak. Anonoko kesi konye abutu kicatata. Ecasito kesi kojie kilanyete ajore naka ilong'au.

³⁵ Akiyuun nes ediaunata aberu ipajanitin kes luketwakito. Ice kama kes abutu kong'eroto alakakino, kotwakete isicanio kesi tetere itajaruno kesi kodumutu akijar na elae noi.

³⁶ Kokwenare ice ka akipoto kapariko, koyenete kinyororon koyarete kesi aenis.

³⁷ Kibiribirete kesi kamoru, kotubitubete kesi kemusumeno irwana kaare. Kwarete kesi kekileng'. Kolototo kesi kakimanamana enapito imukulei luka amerekekin ka luka akinei, epalipalito, isicanio kakitisilaro.

³⁸ Amam cut akwapa ajokokiit kesi! Abutu kesi kirimoto komoding' kiton omoru bala lukakerak, iboyete kesi kabwai kiton kaduyon kanuko kwap.

³⁹ Kitodia akiyuun kalu kere kuju kes, konye mam kesi abutu kodumutu nukitumunikiite kesi,

⁴⁰ naarai kedauti Akuju anyun ibore ni elae noi kanu wok. Nu kekote nesi kerait ebe kotoma aupa ka oni bon nes kebeikinere akitalaun kesi.