Iburayon 10 - AKITUTUKET NAKITETET (NEPEPEKA ISABULIN KA AWARAGASIA)

¹ Mam Ekisil Kiyaudin kerait aputo nakajokan naka iboro luka abeite; erait usa akitodiaret naka iboro kalukajokak kalu ebuto. Isuban kwipe kwi lu elemunono ng'ini pak ikaru kere. Ikoni konye Ekisil ebeikini akitalaun itung'a lu ebunete nama ka Akuju ayi?

² Kere cut kitalaute itung'a lu imaete Akuju alomun karokusio kes, tia mam kesi bobo ka nyuto ebe ejaasi kesi ka arokusio, bobo tia akidwara kere edaun.

³ Konye kotoma osuban kalu kejii akisitonokin itung'a arokusio kes ng'olo karu.

⁴ Naarai aokot kimong'in kiton nuka akinei mam cut kebeikinete alemar arokusio.

⁵ Kanuka atenikina kana, aaput Kristo abunore akwapa, abu nesi kolimok Akuju: “Mam ijo kikote isuban kiton idutan, konye itenaki ijo akwana kanu kang'.

⁶ Mam kitalakarito ijo idutan lu kicwa ka altari kere de isuban kanuka alemar arokusio.

⁷ Kasodi eong' atemar, ‘Ajii eong' ne, Okwai Akuju, kanuka asoma nu ikote ijo, kwape igiritere kuju kang' okitabo loka Ekisili.’ ”

⁸ Na sodit, abu nesi kotema, “Mam ijo kikote bobo mam kitalakarito ijo isuban kiton idutan kere kityeng' lu kicwa ka altari nepepe ka isuban lu elemarete arokusio.” Abu nesi kotema nu konye isuban lu kere elemunono atupa ka Ekisil.

⁹ Kosodi nesi atemar: “Okwai Akuju, ajii eong' ne alokokina asoma nu ikote ijo.” Kanuka ng'unu, inyekini Akuju isuban kere lumojong' kosodi nesi akipiakin agogong'u nama ka Kristo, isubanit ni kiareit.

¹⁰ Kanu esoma Yesu Kristo nu akote Akuju kisoma nesi kisoma, kitalauno oni kere karokusio atupa ka edutat loka akwana keng' lo abu nesi kolemu katipe bon bobo kanuka itung'a kere.

¹¹ Ng'olo esaserdotit lo erait Eyaudit ijaanakini ng'ini paaran, bobo elemunene idutan lu eputosi irwana ipu; konye isuban lu mam cut kebeikinete alemar arokusio.

¹² Konye abu Kristo kolemun araun isubanit ipe kanuka arokusio, isubanit ni ejaasi ka agogong'u ikaru kere, kosodi nesi akiboikin akan na teten ka Akuju.

¹³ Idarit nesi kang'ina kipokona akitodol na itarauna Akuju ipading'atin keng' ekicolong' lo idokokini nesi akejene keng'.

¹⁴ Kanuka ng'un, na alemunere nesi erait isubanit ipe, etalau nesi kokaru kere ng'ulu lu alemar arokusio kes.

¹⁵ Emoyo Lokalaunan de itodianari kama wok. Na sodit ebala nesi:

¹⁶ Ebala Lokapolon, “Na nes akitutuket na alosi eong' akipiakin ka kesi apaarasia nu ebuto. Epiakini eong' ikisila kang' otawon kes ka akigirakin adama kes.”

¹⁷ Bobo ebala nesi, “Mam eong' bobo keituni arokusio kes kiton asoma kes nukarokok.”

¹⁸ Kanuka ng'un kedaun arimakin nu, mam bobo atenikina elemunere isubanit ni elemarere arokusio.

Kaapikisi Akuju

¹⁹ Kanuka ng'unu ikanacana ka akinacana, kanu ijaatatare oni ka alakakina naka akilomo Alaro Nakalaunan Noi akitoro atwanare ka Yesu.

²⁰ Abu nesi kong'aki oni eroto lokitetet loka akijar akitoro opasia, akitoro akwana keng' kelope.

²¹ Ijaasi oni ka Esaserdotit lokapolon lo epolokiit Etogo ka Akuju.

²² Kanuka ng'unu kaapikisi Akuju ketau kaloka abeite ka amunokina naka abeite, kiton itawon lu elotar ka awomowomosia kanukarokok bobo ilosite awate wok kakipi kanu elaete.

²³ Ketolositete kamuno kana ejaasi ka oni na ilimonorete oni mam akijang'ajang'a, naarai Akuju lokitumunikini oni mam keliokono;

²⁴ Keitununutu ekipone loka akitogogong' luce kominasi bobo kisomaete nukajokak.

²⁵ Mam oni akinyekin ekitoki loka atukonokin nenipe kwape isomata itung'a luce. Konye kesicasitete luce cut naarai iteete osi apuuti apaaran ka Lokapolon.

²⁶ Naarai kitebeikiito oni cut asoma nukarokok kidautu oni ajenun kacamun abeite, mam bobo isubanit ice ni ideuna kanuka alemar arokusio.

²⁷ Konye ibore bon ni ideuna oni asoma erait akidarite kakurianu atubokino nepepe ka akimi na epolo noi na ebuni akinyama ng'ulu lu itepegete Akuju!

²⁸ Itwan kere ni emam keyong'it Ekisil ka Musa etwani mam akisoni kitodiasi lukajenak iare kere iuni kuju keng'.

²⁹ Abo konye ng'ulu lu enwang'ito Okoku ka Akuju? Lu itebebenito aokot nuka akitutuket ka Akuju nu etalaunete kesi karokusio? Lu erasete Emoyo loka asianut? Kiitutu bere ekipone lo eronarere akisicanio na edumunete kesi!

³⁰ Naarai ijenete oni nesi lo abu kotema, “Enyang'i eong', abuni eong' akitaca.” Bobo abu nesi kotema, “Ebuni Lokapolon atubokin itung'a keng'.”

³¹ Akibirokin akanin ka Akuju lo ejari erait ibore ni itukuriani noi!

³² Kiitutu apaarasia nuka sek. Kapaarasia kang'unu, kedau acaus ka Akuju acaikin osi, ipotu osi kikanyakisi icani lu ipu konye amam icani abutu kilanyata osi.

³³ Apakio ace apon koratai, kakisicana osi koking'aren ka itung'a; apakio ace, ilokokina osi akimorikikin nenipe ka ng'ulu lu kisicanio ekipone lope lo.

³⁴ Naarai ijaasi osi kakisoni lukeyenite, bobo kocamunete osi kalakara ademario iboro kus naarai ijenete osi ebe kijaasi osi ikulopek ka abara na elae noi bobo na mam kedaun.

³⁵ Kitolositete ajaus mam akurianu naarai eyauni eropit lo epolo noi.

³⁶ Ekotokina osi atitinyu, kanuka asoma nu ekote Akuju kadumun nu isumunikiit Akuju.

³⁷ Naarai ebalasi agirasia nukalaunak: “Kapak kana euriana, ebuuti nesi lo ebuni; bobo mam nesi kitumor.

³⁸ Konye lukang' lu edolito ebunete akijar ka akiyuun konye kebong'oo ipede kama kes kau, mam eong' kalakarosi ka nesi.”

³⁹ Konye mam oni kiraito bala ng'ulu lu ebong'ete kau kosodete amudiar, konye iraito ng'ulu lu ejaasi ka akiyuun bobo kidarete imoyoi kes.