Iburayon 1 - AKITUTUKET NAKITETET (NEPEPEKA ISABULIN KA AWARAGASIA)

Akiroto ka Akuju akitoro nama ka Okoku keng'

¹ Kokolong'o sek, alimokiit Akuju imojong' wok iruana ipu korotin kalu ipuaka itorit nama ka lukadwarak,

² konye kapaarasia kanukesial kanu enerata nesi ka oni itorit namaka Okoku keng'. Asubi Akuju akwap itorit nama ka Okoku keng', epe lo aseu Akuju korautu iboro kere lukeng' kosial.

³ Itoduuti nesi acaus naka akibusesu ka Akuju bobo erait nesi aputo naka Akuju kelope, idari nesi akwapa kere ka agogong'u ka akiroto keng'. Nakedauna nesi ayaun arimakino naka arokusio ka etung'anan, kosodi nesi akiboikin akan nakoteten ka Akuju kokuju, loka apedor kere.

Apolou naka Okoku ka Akuju

⁴ Apon kitopolore Okoku akilanya imalaikan, kwape epolore ekirori lo abu Akuju koinak nesi akilanya lu kes.

⁵ Naarai mam Akuju abu kolimok emalaikat keng' epede: “Irait ijo Okoku kang'; lolo araun eong' Papa kon.” Bobo mam Akuju abu kotema kuju ka emalaikat kepede, “Arauni eong' Papa keng', kosodi nesi araun Okoku keng'.”

⁶ Konye aaputi Akuju akijukun Okoku keng' losodit akwapa, abu nesi kotema: “Itemokina imalaikan ka Akuju kere akimaa nesi.”

⁷ Konye ikamuuti imalaikan abu Akuju kotema, “Itaraunene Akuju imalaikan keng' ekuwam, itarauni nesi lukejaanakinak keng' akimi na enoki cut.”

⁸ Konye ikamuuti Okoku keng', abu Akuju kotema: “Ajakaanut kon, Okwai Akuju erait naka ikaru kere! Ipugae ijo itung'a kon kabeite.

⁹ Imina ijo ni ederi ka areite ni erono. Ng'in nes atenikina keseuna Akuju kon ijo, kosodi ainakin ijo alakara naka epolo noi akilanya na ainaki nesi ipoupatin kon.”

¹⁰ Bobo abu nesi kotema: “Ibu ijo Lokapolon kosub akwap sek, bobo akanin kon kelope nes isubuna ijo kuju.

¹¹ Ebuto kesi adaun konye ijo ideun; ebunete kesi kere adaun bala inagai.

¹² Ibuni ijo abilanakin kesi bala akoti, kosodete kesi akibelokin bala inagai. Konye ideuni ijo mam kibelokin, bobo akijar kon mam kedaun.”

¹³ Amam Akuju abu kolimok imalaikat keng' ipede: “Kiboikin ne akan kang' nakoteten akitodol na epiakina eong' ipading'atin kon araun bala ekicolong' lo ejii kwap ka akejen kon.”

¹⁴ Inyena konye imalaikan? Eraito kesi imoyoi lu ijaanakinete Akuju kijukiyanari nesi kesi aking'aranakin ng'ulu lu elosete adumun akiyuuno.