Filemon 1 - AKITUTUKET NAKITETET (NEPEPEKA ISABULIN KA AWARAGASIA)

¹ Alomun kamaka Paulo, lo eyenite kanuka Yesu Kristo, bobo alomun kamaka onac wok Timot. Namaka opaupa kosi kiton Filemon lominata lo isomaete ka eong',

² kiton ekanisa lo etukonokin otogo kon, ka kanaci wok Apia, nepepe kaloka ajore Arkipus.

³ Koinaki osi Akuju Papa wok nepepe ka Lokapolon Yesu Kristo asianut ka aipuc.

Amina kiton Akiyuun ka Filemon

⁴ Akolong' kere na elipia eong' eitunene eong' ijo Filemon, ka akiyalamikin Akuju.

⁵ Naarai apupu eong' ekipone lo iminare ijo itung'a ka Akuju kere nepepe ka akiyuun na ejaasi ka ijo kotoma Yesu Lokapolon.

⁶ Akilip kang' erait ebe akimorikikina wok ka ijo bala lukeyuunak eyauni acoa na epolo naka ng'in arereng'u na ejaasi ka oni ka akijar wok nenipe ka Kristo.

⁷ Amina kon onac lo ominat, kainu eong' ailele na epolo ka akisicata etau kang'! Italaka ijo itawon ka itung'a ka Akuju kere.

Akilipa kanuka Onesimo

⁸ Kanuka atenikina kana tia eong' mam ka akurianara, bala onac koni kotoma Kristo, akicorakin ijo asoma nu itemokina asoma.

⁹ Konye kanu aminare eong' ijo, kemaimait eong' ijo. Esomae eong' nu atikere karait eong' Paulo, ekiyakia ka Yesu Kristo, bobo kipokona lo ejii aenis kanu keng'.

¹⁰ Kanuka ng'unu kemaimait eong' ijo kanuka okoku kang' Onesimo, lo erait okoku kang' kotoma Kristo; naarai araun eong' papa keng' ajii eong' toma aenis.

¹¹ Apak ape mam nesi ajaasi ka adumunet apede kama kon, konye kipokona ejaasi ka adumunet kama kon nepepe ka eong'.

¹² Enyakuti eong' nesi nama kon kipokona, etau kang' ejaasi ka nesi.

¹³ Akote eong' tia iboito nesi ka eong' kane, ering'a eong' ajii aenis kanuka Kristo, tetere ing'arakini nesi eong' tia ijo.

¹⁴ Konye, mam eong' kesomakin ibore ipede mam ijo kicamuti. Mam eong' kamina akikurakin ijo aking'arakin eong', konye kisoma kwape ikotere ijo elope.

¹⁵ Kere nes atenikina na ketiakatatar nes ka ijo ka apak kana edit tetere nesi ijaikinos ka ijo apaarasia kere.

¹⁶ Aso konye mam nesi kerait kipokona ebulesut, konye akilanya ebulesut: Erait nesi onac lominata kotoma Kristo. Epolo ajokun keng' noi kama kang'! Epolori ajokun keng' noi kama kon, bala ebulesut nepepe ka onac kamaka Lokapolon!

¹⁷ Kanuka ng'unu, kiyarit ijo eong' bala epe lo isomaete ka ijo, kidiau nesi kwape tia kidiautere ijo eong'.

¹⁸ Kisomakit nesi ijo nukarokok kere kejaasi nesi ka apesen koni, koinak eong' kataca.

¹⁹ Ne, egiri eong' ka akan kang' ka elope: Eong' Paulo, ataci! (Mam eong' kakote akisitokin ijo, ebe ijaasi ijo ka eong' apesen naka akijar kon ka elope).

²⁰ Kanuka ng'unu, onac kang' kisomakine eong' akirot ng'in kanuka ekiror ka Lokapolon; kitalaka emoyo kang' bala onac kotoma Kristo!

²¹ Egiri eong' ajaasi kabeitee ebe idiauni ijo ailipa kang'; bobo ajeni eong' ebe ilosi ijo asoma adepar nu elipit eong'.

²² Kakolong' kang'ipekang'ini kitenakine eong' etogo, naarai amunit eong' ebe ebong'okin Akuju alipasia kus kere ka akinyakuni eong' nama kus.

Amalan nakesial

²³ Kimalate osi Epapras, lo ejii aenis ka eong' kanuka Yesu Kristo,

²⁴ Mariko de, Aristariko, Demas, kiton Luka lu isomaete ka eong' kiyogato osi.

²⁵ Kojii asianut ka Lokapolon Yesu Kristo ka osi kere.