Aswamisio 9 - AKITUTUKET NAKITETET (NEPEPEKA ISABULIN KA AWARAGASIA)

Akibelokin ka Saulo

¹ Konye kolosi Saulo nama ka esaseredootit lokapolon itukuriani akiara lukesisiaka ka Lokapolon

² kosodi nesi aking'it esaserdotit koinak nesi ibarua lukakitejenun ko osinagogin ko Damaskas, tetere kedumu nesi ipede ni etupit Erot ka Lokapolon, ebeikini nesi akikamun kesi kere ikilioko kiton ka aberu ka ayaun kesi Yerusalem.

³ Aaput saulo adolore Damaskas, atipet kimiliakini nesi acaus alomun kokuju.

⁴ Kosodi akibirokin kwap kirari eporoto elimokini nesi, “Saulo, Saulo inyo kisicania ijo eong'?”

⁵ Kosodi Saulo aking'it ebe, “Ng'ai ijo, Lokapolon?” kobong'okini eporoto ebala, “Arait eong' Yesu lo isicani ijo.”

⁶ “Konye konyou kolot ore lokapolon, nama kilimokinere ijo nu itemokina ijo asoma.”

⁷ Kosodete itung'a lukeupasi ka nesi akigwo etiiti na kiirarata eporoto konye mam anyun itwan ipede.

⁸ Konyouni Saulo kokwap; keng'arosi akonyen keng', mam nesi abeikini anyun ibore ipede; kanuka ng'un kosodete arikor nesi kayar nesi Damaskas.

⁹ Kaparasia kauni mam nesi kitee, bobo mam nesi akinyam kere de akimat.

¹⁰ Kejii ekiyakia Damaskas lokenyarite Anania. Kolimokini Lokapolon nesi ko oruja ebe, “Anania.” Kobong'okini Anania ebala, “Ajei ne, Lokapolon.”

¹¹ Kosodi Lokapolon alimokin nesi, “konyou kolot orot lo enyarite Ideere, king'it ko otogo ka Yudas etwan loko Tasis lo enyarite Saulo; naarai ilipi kipokona,

¹² bobo anyu nesi etwan lo enyarite Anania ebuti kakidokokin nesi akanin keng' tetere eng'arosi akonyen keng' bobo.”

¹³ Konye kinyakuni Anania ebe, “Lokapolon, eira eong' kamaka itung'a kalu ipu kuju ka etwan kalo, nukarokok nu ipu nu esomak nesi lu etupito ijo ko Yerusalem;

¹⁴ bobo ejatatare ka apedor alomun kamaka isaserdotin ka lukapolok akikam ng'ulu kere lu enyarito ekiror kon.”

¹⁵ Konye kolimokini Lokapolon nesi, “Kolot, naarai erait nesi ibore ni aseu eong' ayar ekiror kang' nama kalu mam keraito Iyaudin kiton ijakaa kitoni idwe luko Israel;

¹⁶ naarai abuni eong' akitodikin nesi akipuakus ka akisicanio keng' kanuka ekiror kang'.”

¹⁷ Kanuka ng'un koikari Anania kosodi akilom otogo. Kidokokini nesi akanin keng' kuju keng' kotemari, “Onac Saulo, ejuku eong' Lokapolon Yesu lo ketakanuni kama kon koroto kalo kitorit ijo ibuti ijo tetere eng'arosi akonyen kon ka adumun ijo Emoyo Lokalaunan.”

¹⁸ Atipet kosodete iboro kwape ka ikabel adacun ka akonyen keng' kosodete akonyen keng' ang'ar. Konyouni kosodi akibatisaun,

¹⁹ kedau akinyama, kobong'uni agogong'u keng'. Kiboi Saulo apaarasia adis nenipe ka lukeyunak ko Damaskas.

Elimonori Saulo Akirot ka Akuju ko Damaskas

²⁰ Kolomi nesi osinagog kogeuni alimonor ebe erait Yesu Okoku ka Akuju.

²¹ Koumokisi ng'ulu kere lukepotu kopuputu nesi kotemarete, “Mere nesi loko Yerusalem nes ari ng'ulu lu emaete etwan ng'olo Yesu? Bobo mam nesi kebuti ne katenikina kanipe kang'ini naka akikama itung'a ng'ulu ka ayar kesi nama ka isaserdotin nepepe ka lukapolok?”

²² Konye kosodi alimonor ka Saulo araun na epolo apedor, bobo akitodianareta keng' ebe erait Yesu Kristo kisimoninikini Iyaudin lu kiboete ko Damaskas mam kesi abeikinete abong'okin nesi.

²³ Ketuborosi apaarasia nu ipu, kitemunete Iyaudin ekipone loka akiar nesi,

²⁴ konye kolimokinete nesi nu kitemtemito kesi. Akware ka apaaran edarete kesi irutei ka ere lokapolon tetere kesi arete nesi.

²⁵ Konye koyarete ikiyakia keng' nesi kware, ka akijesar nesi kwap ka arwatat ejii toma obukit.

Saulo ko Yerusalem

²⁶ Kotamak Saulo ko Yerusalem akimorikikin nenipe ka ikiyakia; konye kosodete kesi kere akuriakar nesi, naarai mam kesi amunokin ebe kerait nesi ekesisian.

²⁷ Kosodi Barnabas abunore aking'arakin nesi, ayaar nesi nama ka ikiyakia itomonkaare. Kitemitemokini nesi kesi ekipone lo kanyuna Saulo Lokapolon korot kiton ekipone lo kineratatar Lokapolon ka nesi. Kolomokini nesi kesi bobo ekipone lo kelimonoro Saulo akirot ka Akuju kokiror ka Yesu ko Damaskas mam akurianu.

²⁸ Kanuka ng'unu kimorikikinosi Saulo ka kesi ko Yerusalem

²⁹ elimonori emam akurianu kokiror ka Lokapolon. Bobo kiner nesi, kitepeg Iyaudin lu inerasi Agirikin; konye abutu kesi kotamakisi akiar nesi.

³⁰ Na kejenunata lukeyunak nu, koyarete Saulo Kaisarea kosodete akijukiar nesi Tarso.

³¹ Kosodi ekanisa ko Yudea kere, Galilee kiton Samaria adumun apak naka aipuc. Akitoro aking'arasit ka Emoyo Lokalaunan abu kisicata ekanisa kosodi etyae keng' akiyatakin, ejari kotoma ayong'ite Lokapolon.

Petero ko Lida kitoni Yopa

³² Kila Petero ng'olo wai, kosodi apak ape alosite akipijokin itung'a ka Akuju lu iboete ko Lida.

³³ Kodumuni nesi kaneni etwan lokenyarite Aeneas, lokedekit noi ikaru ikanykauni, kiteregegiara.

³⁴ Kosodi Petero alimokin nesi ebe, “Aenea, etang'aleu Yesu Kristo ijo; konyou kitenak apetat kon.” Konyouni atipet.

³⁵ Kwanyunete nesi itung'a kere lu kiboete ko Lida kiton Saron, kiyuunete kesi Lokapolon.

³⁶ Ko Yopa kejii nakesisian na kenyarite Tabita, apolou keng' erait Dorika. Kisomae nesi asoma nukajokak kiton aking'aranakin luka ican.

³⁷ Kapaarasia kang'unu kodekakin nesi kosodi atwanare; kedautu kesi akilong' nesi, kosodete akigwakin nesi otogo loko kuju.

³⁸ Kanu kapiata Lida kiton Yopa, nakirarata lukesisiak ebe ejii Petero neni, kijukiarete itung'a iare nama keng' ilipito nesi ebe “Kemaimaito siong' ijo kobu atipet.”

³⁹ Kosodi Petero anyoun ka aikar ka kesi. Kedolo, koyarete nesi otogo loko kuju. Kogwoete apuseru kere kowai keng' emonyete itodiarito akotin kiton inagai ice lu kedonyit Dorika na kejatatare ka kesi.

⁴⁰ Konye kosodi Petero akireng'iar kesi kere king'a kosodi akukokin kwap akilip kong'olekini akwana, kotemari, “Tabita, konyou.” Kong'ari akonyen keng'. Nape kanyuna nesi Petero kosodi akiboikin.

⁴¹ Kosodi Petero akitonyoun nesi. Kenyarau luketupito Akuju ka apuseru koinakini nesi kesi Tabita ejari.

⁴² Kebutu akiro nu kojenunosi ko Yopa kere. Komunokinete itung'a ipu Lokapolon.

⁴³ Kosodete nesi ka Simon loketenan imukulei akideun ko Yopa.