Aswamisio 5 - AKITUTUKET NAKITETET (NEPEPEKA ISABULIN KA AWARAGASIA)

Anania ka Safira

¹ Konye kogwelarete etwan lokenyarite Anania ka aberu keng' na kenyarite Safira amana kes,

² kosodi akigwa ikabel ice ejeni aberu keng' ka ayaun luce nama ka ikiyakia.

³ Konye kotemari Petero, “Anania, inyo alomia Asatanit otau kon aking'alakin Emoyo Lokalaunan kosodi ijo aking'adakin ikabel ice lu kidumuni ijo kagwelaria amana?

⁴ Ering'a ijo kigwelara, arait na kon; kidau ijo agwelar keraito ikabel lu kon. Inyo konye kitiakuna ijo asoma nu? Mam ijo king'alakiit itung'a. Ing'alaki ijo Akuju!”

⁵ Nape kiirara Anania akiro nu, kosodi akibirokin kwap ka atwanare. Kikamuni akurianu nakapolon noi ng'ulu kere lu kirarito ng'unu.

⁶ Kobunete isapa, koburakinete nesi kosodete adakari king'a ka anukakin.

⁷ Ketuborosi isaan bala iuni, kobuni aberu keng', emam kejeni nu kebutu kisomakinosi.

⁸ King'isi Petero nesi, “Kolimok eong', lu kes ikabel kere kidumunete ijo nenipe ka okilen kon ka agwelar amana?” kobong'okini, “Eebo, ikabel kere.”

⁹ Kolimokini Petero nesi, “Inyo kitiakunata ijo nenipe ka okilen kon akitam Emoyo ka Lokapolon? Ejaasi kipokona okek ikiliok lu anukete okilen kon, edakarete ijo de!”

¹⁰ Atipet kosodi nesi akibirokin akejen keng' ka atwanare. Kelomata isapa toma, kodumunete nesi ketwana, kosodete adakar king'a ka anukakin idunyasi ka okilen keng'.

¹¹ Kikamuni ekanisa kere akurianu ka ng'ulu kere lu abutu kiirasi iboro lu.

Aumosia kitoni nuka akitim

¹² Esomao aumosia nu ipu kanuka aumokina kokiding' ka itung'a. Ketukokina kesi kere akadapau ka Solomon.

¹³ Mam ipede ni mam arait Ikristayot abu kotamak akimorikikin ka kesi, konye kinerata itung'a nukajokak noi kuju kes.

¹⁴ Konye kiyatakinosi itung'a ipu atukot: Akwap ka ikiliok ka aberu nu kiyuuto Lokapolon.

¹⁵ Atupa kanu kisomaete ikiyakia, abutu itung'a kodakasi lukadekak orotin, ka akiperikin kesi apetan ka oliaboi tetere itori etoribe ka Petero nama kice kama kes na etuborere nesi.

¹⁶ Kotukokinosi itung'a de alomun ko otaunin kalu idunyasi ka Yerusalem, eyauto lukadekak ka ng'ulu lu kisicanete ajokin, kong'aleunete kesi kere.

Isicanio Ikiyakia

¹⁷ Konye kosodi esaserdotit lokapolon ka ng'ulu lukeraito luka atukot ka Isadukayon lukejaasi ka nesi ajaikin ka alilit.

¹⁸ Kikamunete kesi ikiyakia ka agolikin aenis naka itung'a kere.

¹⁹ Konye kong'ari emalaikat ka Lokapolon ikekia ka aenis kware kosodi ayaar ikiyakia king'a kosodi atemar,

²⁰ “Kolototo kogwata kotoma Otogo ka Akuju kolimokisi itung'a akiro kere nuka akijar kana nakitetet.”

²¹ Nape kiirarata nu, kolomete otogo iwali akwap kogeunete akisisianakin. Konyarauni nenipe esaserdotit lokapolon nepepe ka ipoupatin keng' imojong' kere ka Iyaudin atukot naka itung'a kere; kosodete kesi ayar akicorasit aenis koinune kesi ikiyakia.

²² Konye na kedoliata lukapolok aenis, mam adumun ikiyakia ka aenis, kobong'erete kalimokin atukot nukisomakinosi,

²³ “Na adoliata siong' aenis, abutu siong' kadumutu egolite nenipe ka lukedarak kere lukidarete ikekia; konye king'asi siong' ikekia, mam siong' adumun itwan ipede kotoma!”

²⁴ Nape kirarata isaseredotin lukapolok nepepe ka ejakait lokepolokiit Etogo ka Akuju nu, abutu kitimoki kesi nu kebutu kisomakinosi kamaka ikiyakia.

²⁵ Kobuni etwan kosodi alimokin kesi, “Kiirasi! Ejaasi itung'a lu kicakakinete osi aenis Otogo ka Akuju isisianakinete itung'a!”

²⁶ Kosodi lokepolokiit ajore alosite nenipe kaluka ajore akinyakun ikiyakia mam kitosomato agogong'u, naarai kekuriaka ebe ebekinete itung'a adaada kesi kamoru.

²⁷ Kedautu akinyakun ikiyakia, koyarete kesi atukot. King'isi esaserdotit lokapolon kesi,

²⁸ ebala, “Ekwenyarito siong' osi cut mam akisisianakin ka okiror ka etwan kalo, konye kiteete nu isomata osi! Ilimonosi osi akisisianakino kus Yerusalem kere, bobo ikotosi osi kotubokine siong' kanuka atwanare keng'!”

²⁹ Kosodi Petero nenipe ka ikiyakia luce abong'okin ebe, “Ejii siong' akiyong' Akuju, konye mere itung'a.

³⁰ Abu Akuju ka imojong' wok kitonyou Yesu kotoma atwanare kidautu osi akiar nesi ka akibubukin nesi omusalaba.

³¹ Egwak Akuju nesi akan keng' nako teten erait ekang'arenikinon bobo ekayunan, tetere einakini nesi itung'a luko Israel apak naka akisilar ka adumun arimakino ka arokusio kes.

³² Iraito siong' lukajenak ka iboro kalu, siong' nenipe ka Emoyo Lokalaunan, lo erait edutat lo ainaki Akuju ng'ulu lu eyong'ito nesi.”

³³ Nape kiirarata lukebarasa nu, kokadakinete noi, bobo akotosi akiara ikiyakia.

³⁴ Konye kogwoi efarisayot epe kama kes lokenyarite Gamalieli, lokesisianakinan Ikisila lo keyong'ito itung'a kere noi kosodi akicorakini ikiyakia kolomasi king'a nedio,

³⁵ kosodi alimokin atukot ebe, “Ikiliok luko Israel, kocoitete nu isomakinete osi itung'a lu.

³⁶ Iituto osi ebe apak ace kokau, abu Teudas kobu, ebala ebe nesi nes lokapolon, kotupete nesi itung'a apiarito akwatai aong'on. Konye abu kwarai nesi, kakisiarakin ng'ulu luketupito nesi kosodi atukot keng' atwanare.

³⁷ Kokau keng', kobuni Yudas loko Galilaya apak na kimarere itung'a; kiriari akwap ka itung'a wai keng', konye kotwani nesi de kosodete ng'ulu kere luketupito nesi akisiarakin.

³⁸ Kanuka ng'unu, ikamutosi nu, kalimokini eong' osi mam akisomakin itung'a lu ibore ipede. Kinyekinosi ka kesi! Keraito nu itemitemito kesi kang'unu nu esomata kesi nu kegeuni etung'anan, edaunosi,

³⁹ konye keraito nuka Akuju, mam osi kibekinete akilanya kesi. Ibeikinete osi idumunosi itijiete Akuju!”

⁴⁰ Kotupete akicorasit keng', kedautu anyaraun ikiyakia toma, kiposete kesi kosodete alimokin kesi mam ejori ka okiror ka Yesu kosodete aisikin kesi aikar.

⁴¹ Kolomarete ikiyakia kobarasa elakara naarai kebutu kesi kwanyutu ejokuna adumun akitisilaro kanuka Yesu.

⁴² Ng'ini paaran ko Otogo ka Akuju ka oreria, mam kesi apalikin akisisianakin ka alimonor akiro nukajokak kuju ka Yesu ebe nesi nes Kristo.