Aswamisio 4 - AKITUTUKET NAKITETET (NEPEPEKA ISABULIN KA AWARAGASIA)

Petero ka Yoana koking'aren kijakaa

¹ Itolosito kesi ejori ka itung'a, kobunete isaseredootin kalo kepolokiit lukedarak Etogo ka Akuju kiton Isadukayon nama kes,

² ekadakiito naarai kisisianakinete kesi itung'a ka alimonori nuka ajarun ka Yesu kamaka lukatwak.

³ Kanuka ng'un, kikamunete kesi agolokini aenis akitodol apaaran na atupakini, naarai kedaut akwap akiwar.

⁴ Konye lu ipu kamaka ng'ulu kalu kiirarito akirot abutu kiyutu; kosodi etyae ka ikiliok apiar aritai akany.

⁵ Apaaran na ketupakini, kosodete ikapolok ka Iyaudin, ka imojong', ka lukesisianakinak ka Ikisila atukokin Yerusalem.

⁶ Kiriamakinosi ka Anas lokerait esaserdotit lokapolon ka Kaiafas, Yoana, Aleksanda, kaluce lukeraito luko otogo ke epe nenipe ka esaserdotit lokapolon.

⁷ Kitogwoete ikiyakia koking'aren kes kosodete aking'it kesi ebe, “Ka agogong'u kani kere kokiror ka ng'ai isomata osi nu?”

⁸ Ileleba Emoyo Lokalaunan otau ka Petero, kobong'okini kesi, “Lukapolok ka itung'a nenipe ka imojong':

⁹ King'isite siong' lolo kuju kanakajokan na esomakino etwan lo angwalit kiton ekipone lo etang'aleunere nesi,

¹⁰ ejii osi kere ajenun, bobo ejii itung'a luko Israel ajenun, ebe egwoi etwan lo kane koking'aren kus eng'ale cut kotoma apedor ka ekiror ka Yesu Kristo loko Nasareti lo ibubukinete osi omusalaba, kitajaruni Akuju.

¹¹ Yesu nesi lo kebalasi akigirigirasia nukalaunak kuju keng' ebe”: “Amoru na ibutu osi lukadukok kong'eroto nes ebelokin araun na epolo cut kang'un kere.”

¹² “Ejii adumun ayuno akitor nama keng' bon; ka akwapa kere emam bobo itwan ice ni ainak Akuju ayuuni oni.”

¹³ Koumokini atukot anyun ekipone lo ketitinyoko Petero ka Yoana bobo koraito itung'a lu kemam kisisiato. Kojenunete ebe keupasi itung'a ng'ulu ka Yesu.

¹⁴ Konye kemam ibore ni kebeikito kesi alimun, naarai kiteete etwan lokitang'aleuno egwoi kang'ina nenipe ka Petero ka Yoana.

¹⁵ Kosodete alimokin kesi kolomasi ko otogo kaloke ebarasa, kogeunete aking'itanakin.

¹⁶ King'isete, “Inyena ikokinete oni itung'a lu?” “Ng'in itwan ko Yerusalem ejeni ebe kesi nes esomakisi aumosit na egelakina na, bobo mam oni king'erete.

¹⁷ Konye tetere emam akiro nu kisiarakinosi otung'a, kekwenyasi itung'a lu mam bobo kesi ejori ka itwan ipede ko okiror ka Yesu.”

¹⁸ Kosodete anyaraun kesi ka akikwenyar mam ejori kere de akisisianakin cut ko okiror ka Yesu.

¹⁹ Konye kosodi Petero nenipe ka Yoana akinyakakin kesi ebe, “Kotiakutu osi ikulopek inyena ejokuna koking'aren ka Akuju. Akiyong' osi kere akiyong' Akuju.

²⁰ Naarai mam siong' kinyekinete ejori kuju kanu aanyutu siong' ka akiirar.”

²¹ Kosodi ebarasa akikwenyar kesi bobo noi kalacakin kesi. Kebutu kwanyutu kicasit akisican kesi, naarai kimaete itung'a kere Akuju kanu kebutu kisomakinosi.

²² Naarai etwan lo kisomakino aumosit naka akitang'aleuno kejaasi ka ikaru lu kedeparito akaisaung'on.

Ilipete lukeyuunak Atitinyu

²³ Nape kelacakinere kesi kolosete nama kipoupatin kes kalimokin kesi nu kelimokinete isaseredotin lukapolok kesi.

²⁴ Kiirasi ikeyunak ng'unu, kosodete kesi kere atukokin nenipe ilipete Akuju ebalasi, “Lokapolon kalokajeunan akuju, akwap, akare, ka ng'ulu kere lu ejaasi toma kes!

²⁵ Ibu ijo koinak Papa kosi Daudi, ekejaanakinan kon apedor naka atemar ka apedor kanaka Emoyo Lokalaunan”: “Inyo ekadakitere itung'a luka akwapin? Inyo arauna akitemeteme ka itung'a na emam adumunet.

²⁶ Ijakaa luka akwapin kolokokinosi, lukepugak kotukokinosi nenipe, akitepeg Lokapolon Akuju.”

²⁷ “Naarai teni abu Erode ka Pontias Pilato kiriamakinosi ko ore kalo nenipe ka itung'a luka akwap ka itung'a luko Yerusalem akitepeg Yesu, ekejaanakinan kon, lo itarauni ijo Kiristo.

²⁸ Kotukokinosi asoma iboro kere lu kitiakuut ijo kisomakinosi atupa ka apedor ka amina kon.

²⁹ Konye kipokona, Lokapolon, kitee kwape etukurianata, kocamak siong' kisiarasiarata akirot kon komam akurianu.

³⁰ Korwa akan kon kitang'aleu, kocamak kisomakine ko okiror ka Yesu, Ekejaanakinan lokalaunan.”

³¹ Nape kedaunata akilipi, kijang'ajang'akin alaro nama ketukokina kesi. Kobuni Emoyo Lokalaunan nama kes kere kogeunete akisiarasiara akirot ka Akuju emam akurianu.

Emorete lukeyunak Iboro kes

³² Kerait atuket kalukeyuunak ibore ipe kaomosia ka otau. Emam ipe kama kes kebu kotama iboro kes keraito lukes bon, konye komorete kesi nenipe ng'ini ibore ni kejatatare ka kesi kere.

³³ Kosodete ikiyakia akitodiar ka apedor noi kuju kajarun ka Lokapolon Yesu kosodi Akuju abukokin kesi kere akibusesu.

³⁴ Kemam ipede kamaka atuket kang'in ni kekadad. Kosodete ng'ulu lu kejatatare ka imanikoria ka itogoi agwelanar, kayaun ikabel lu kedumunosi kagwelanar imanikoria kes ka itogoi,

³⁵ kainun ikiyakia; kokoranikinete ng'ini ipe kama kes ikabel atupa ka akadadu ka itwan.

³⁶ Kejii Yosef loko otogo ka Lebi lokidoute ko Saipras, lo kenyarakito ikiyakia Barnabas (apolou keng', “Lo kesicatan etau”),

³⁷ kogwelari amana na kerait na keng', koyauni ikabel, koinakini ikiyakia.