Aswamisio 3 - AKITUTUKET NAKITETET (NEPEPEKA ISABULIN KA AWARAGASIA)

Itang'aleuno etwan lo eng'walit

¹ Apaaran ape kolosete Petero ka Yoana Otogo ka Akuju isaan ikanykawong'on luka atabong'o, akolong' naka alipasia.

² Korute Kalokalan, kwape kenyaritere, kejii etwan lo kegwalit ka akijar keng' kere. Kedakanaro ng'in paaran orute kalo elae akilipanar ikabel kotung'a kalu kelosenenete Otogo ka Akuju.

³ Nape kanyuna nesi Petero nenipe ka Yoana elomete toma, kilipi nesi kesi koinakisi nesi ibore.

⁴ Koyasi kesi akonyen keng' nama keng' bon, kosodi Petero atemar, “Kitee siong'!”

⁵ Kanuka ng'un kong'olekini nesi kesi emuno ebe edumuni nesi ibore kama kes.

⁶ Konye kolimokini Petero nesi, “Emam eong' ikabel cut, konye kainakini eong' ijo ibore ni ejaasi ka eong': Kokiror ka Yesu Kristo loko Nasareti kalimokini eong' ijo konyou, koloto!”

⁷ Kirumi Petero akan keng' nako teten king'arakini nesi akigwo. Atipet kosodete akejen ka apokipokia akicat;

⁸ kosukun kuju, kogwoi, kogeuni alosit. Kolomi Otogo ka Akuju nenipe ka kesi, elosi, esukonor, ituri Akuju.

⁹ Kwanyunete itung'a kere nesi elosi ituri Akuju,

¹⁰ nape kejenunata ebe nesi nes lokilipanar iboe korute Kalokajokan, abutu kesi koumokisi ka ariang'un kesi kere nu kebutu kisomakinosi kama keng'.

Akiro ka Petero ko Otogo ka Akuju

¹¹ Ering'a nesi etunit Petero ka Yoana ka golot ka solomon, koumokinete itung'a kere kosodete akerit katukokin nama kejaasi kes.

¹² Nape kanyuna Petero itung'a, kolimokini kesi, “Ikinacan luko Israel, inyo iriang'urete osi kanu, inyo ipokitere osi siong' akonyen kus? Ituto osi ebe erait kanuka apedor kosi kere kanuka adolite nesi kitenakinata siong' etwan lo kolot?

¹³ Akuju ka Abraam ka Isaka ka Yakobo, Akuju kes ka papa wok, kitopolori ekejaanakinan keng' Yesu, lo igwelarete osi ka aking'ere koking'aren ka Pilato, ketiaku Pilato alacakin nesi.

¹⁴ Konye kong'erete osi Ekalaunan bobo Ekadoliton, kosodete osi akilip koinakine osi ekaaran,

¹⁵ kwarete osi lokegeuni akijar, lo etajaruni Akuju. Iraito siong' lukajenak kanu.

¹⁶ Arait agogong' ka ekiror ka Akuju nes ainakini eng'walas lo agogong'u. Nu iteete osi kanu ijenete osi esomakino kanuka akiyuun ekiror keng'; arait amunokiite Yesu nes etang'aleu nesi, kwape iteoto osi kere”.

¹⁷ “Kipokona ikanacan, ajeni eong' ebe kisomaete osi kawolite kwape ka ijakaa kus.

¹⁸ Konye abu Akuju kitodol nu adwarut nesi itorit nama ka lokadwarak keng' ebe ejii Kristo keng' akicanakin.

¹⁹ Kanuka ng'un kiamoto emuna, kobong'utu nama ka Akuju, tetere nesi erimakini arokusio kus. Kikokisi osi neni,

²⁰ isaan luka agogong' ka emoyo elomunete kamaka Lokapolon, kosodi nesi akijukun Yesu, lo erait Kristo lo adau nesi asekin osi.

²¹ Ejii nesi akideun kokuju akitodol apak na itenunere iboro kere lukitetiak, kwape ketemaritere Akuju itorit namaka lukadwaran keng' lukalaunak lukejaasi sek.

²² Naarai ketemarit Musa, ‘Ijukuni Lokapolon Akuju kus ekadwaran nama kus kwape ka ijukutere nesi eong'. Ipe kama kus nes ijukuno. Ejii osi akiyong' ng'ini ibore ni elimokini nesi osi asoma.

²³ Itwan kere ni mam keyong'i ekadwaran ng'oli egitaro kotung'a ka Akuju ka akiar.’

²⁴ Lukadwarak kere lu enerata, ageun kamaka Samuel ka ng'ulu lu ketupakinete kokau, kesi de abutu kinerata kuju ka apaarasia kanu.

²⁵ Iraito osi idwe ka lukadwarak ka luka akitutuket na kiteni Akuju kiton kes ka papa kus. Kwape kelimokina nesi Abraam ebe, ‘Alomun kamaka idwe kon edumunete itung'a kere luka akwap asulwany.’

²⁶ Kedau Akuju akitopoloun ekejaanakinan keng', kogei nesi akijukun nesi nama kus, akisirereng' osi kokipone kaloka akinyakun osi korotin kus kalukarokok.”