Aswamisio 28 - AKITUTUKET NAKITETET (NEPEPEKA ISABULIN KA AWARAGASIA)

Nukisomakinosi ejii Paulo Malta

¹ Kidautu siong' akikuu, kajenunete siong' ebe akwap ng'in na kimanamanakiito akipi kenyarite Malta.

² Kiswamakinete ikulopek ng'ina siong' asianut na emam ketapit, naarai abutu kesi kinokokisi akimi, kakidiaun siong' kere kanu ageutere akiru adore, bobo ataa akwap ci.

³ Ketukuti Paulo akito. Igwakini kesi akimi, kolomuni emun king'a kanuka amwanus kosodi akimanamanakin akan keng'.

⁴ Kwanyunete ikulopek luka ng'ina emun ideledelo ka akan ka Paulo kosodete alimonokin ebe, “Tar etwan lo koraite lokaran, konye mam kinyekino nesi kitolosite akijar, atikere kekuit nesi alomun kakare.”

⁵ Konye kilakalakakini Paulo emun ng'olo akimi emam kikang'asite nesi.

⁶ Kidaraunete anyun nesi ebuye kere de etwaani atipet. Konye kedautu kesi akidara apak na epolo bobo mam anyun nukarokok isomakinosi nama keng', kibelokinete kesi awomowomosia kes, kotemarete ebe, “Erait nesi akuju!”

⁷ Kejaasi imanikoria arir neni lu keraito luke etwan kalokepokiit akwap ng'in na kimanamanakiito akipi. Kenyarite nesi Publius, lo kediauni siong' ka akitalakar siong' kojokan kapaarasia auni.

⁸ Keperi papa keng' ka Publius kapetat, edeka amwanus ka akwana. Kosodi Paulo alosite nama kejii nesi, kilipi. Na kidokokina akanin keng' kuju nama keng', kitang'aleuni nesi.

⁹ Na kisomakinototor nu, kosodete itung'a kere lukedekasi kakwap kang'ini abunere kitang'aleunete kesi.

¹⁰ Koinunete siong' idutan lu ipu; na ilomariata siong' kipiakinete kesi ng'ini ibore ni akotosi siong'.

Alomar ko Malta alosite Roma

¹¹ Ketuborosi ilapio iuni, kaikarete siong' kameli kanakegwoi ka akwap kana imanamanakiito akipi apakio nuka akiru kotaa ci. Kerait ameli ng'in nako Aleksandria. Kenyarite ameli ng'in, “Akujun imwatok.”

¹² Kadolete siong' ore lokapolon lo enyarite Sirakuse, kakiboi kang'ina apaarasia auni.

¹³ Kang'ina kasodete siong' akitolosit ka elotete kadolore ore lokapolon lo enyarite Regio. Apaaran na atupakini kogeuni ekuwam akikut alomun kong'alakimak. Ketuborosi apaarasia aare kadolete siong' otaun loko Puteol.

¹⁴ Kadumenete siong' kang'ina lukeyunak ice lu kelipete siong' akideun ka kesi kosabiti kepe. Ekipone lo nes abuniata siong' Roma.

¹⁵ Kiirarete lukeyunak ko Roma kuju kosi, kobunete osokoonin luko Apius kiton otelin iuni akisiriama siong'. Na kanyuna Paulo kesi, kiyalamikini Akuju, kicasi etau keng' noi.

Kotoma Roma

¹⁶ Na adoliata siong' Roma, kocamakinete Paulo akiboi bon, nenipe kaloka ajore lo kidari nesi.

¹⁷ Ketuborosi apaarasia auni, konyarauni ikapolok ka Iyaudin. Na ketukokinototore, kolimokini kesi ebe, “Iyaudin kang', mam eong' kapacarit koking'aren ka itung'a wok, mam eong' kabilit ikisila ka tapaa wok. Konye kekamun eong' ayeno alomun ko Yerusalem kakigwakino akanin ka Romayon.

¹⁸ Kedaun aking'iting'it eong', akotosi Iromayon alacakin eong' naarai abutu kesi kodumutu ebe mam eong' kesomate ibore ipede ni kitemokina eong' atwanare.

¹⁹ Konye na ang'erokinata Iyaudin nu, ajii eong' akilipi koyare eong' nama ka Kaisari kotubok nesi eong'. Konye amam nu ewosatere eong' itung'a kang'.

²⁰ Ng'in nes atenikina elipia eong' anyun osi. Abeite erait ebe katokite eong' konyororon ekipone lo kanu keng' kalo emunokiito itung'a luko Israel.”

²¹ Kolimokinete nesi ebe, “Mam siong' kidumuto ipopulai ipede alomun ko Judea kuju kon. Bobo de mam ipede kamaka ikanacan kalu ebuto ne enerata apede nukarokok kuju kon.

²² Konye ejokuna kiirasi siong' alomun kama kon nu ibala ijo; naarai, ijenete siong' ebe ener nukarokok kuju ka atukot kang'in alaro.”

²³ Na keseunata apaaran naka akiriamakin ka nesi, kolosete ka akipuakus nama kiboya Paulo. Kolimokini kesi akiro kere ageun tupuruc akitodol ebong', itodianari kuju ka ajakanut ka Akuju katamakiite akilipite kesi kocamutu Yesu kwape igiritere kokisila ka Musa kiton nu igirito ikadwarak.

²⁴ Kocamunete ice nu kebala nesi konye mam ice amunokin.

²⁵ Na ang'eriata ikulopek akiirar, koikarete, kedau Paulo alimun akirot ape ebe: “Kidere Emoyo Lokalaunan na kelimokina kes ka tapaa kus itorit nama ke ekadwaran Isaya”, ebe:

²⁶ “Kolot nama ka itung'a kalu kotema, Ibunete osi akipup ka akipup, konye mam kijenunete ibunete osi akitere ka akitere, konye mam kianyunete,

²⁷ naarai itau ka itung'a kalu kepasata akii kes ekekes akipup, kegolokisi akonyen kes; along'u tia kakonyen kes iteete, akii kes epupete, ejenunete adama kes, kosodete kesi akibeleun nama kang' ketang'aleu eong' kesi.”

²⁸ Kirikakini Paulo ebe, “Kojenutu ebe akiyuuno naka Akuju ejukiyar olong'au; epupunete kesi.”

²⁹ Na kedauna nesi ejori ng'unu, koikarete Iyaudin ing'iting'itasi ikulopek.

³⁰ Kokaru kiare kosodi Paulo akiboi kalaro kanaketaci nesi elope, idiaunene nesi kang'ina itung'a ng'ulu kere lu kelosenenete anyun nesi,

³¹ elimonori nesi kuju ka ajakaanut ka Akuju ka akisisianakin kuju ka Lokapolon Yesu Kristo emam akuriana kiton ibore ni irebokini nesi.