Aswamisio 27 - AKITUTUKET NAKITETET (NEPEPEKA ISABULIN KA AWARAGASIA)

Eikari Paulo Roma

¹ Na atiakunere ebe itemokina siong' alosite Itali, kigwakinete kesi Paulo kiton ice lukeyenite akanin ka Julias, lokapolon ka atukot ka ajore na enyarite, “Atukot ka Agustino.”

² Kadokete siong' ataker alomar ko Adramito, ataker na kelokokina aikar nama kegwoyananata amelin ko Asia. Kaikarete siong'. Ajaasi siong' kiton Aristakas, Emasedonait loko Tesalonike.

³ Apaaran na atupakini kadolete siong' Sidoni. Ajaasi Julias ka asianut kamaka Paulo, kocamakini nesi alosite anyun ipoupatin keng' tetere einakino nesi iboro lu kekote nesi.

⁴ Kalomarete siong' kang'ina, konye kanu akusia ekuwam idirut wai kosi koking'aren, kaikarete siong' Saipras ewai lo kemam ekuwam kekusi.

⁵ Kadautu siong' atubor ka akare kana arir ka Silisia kiton Pamfilia, kabunete siong' Maira, ore lokapolon lokoprofinsi loko Lisia.

⁶ Kodumuni lokapolon ka ajore kang'ina ameli alomun ko Alekisandria elomari aikar Itali, kitodoki siong'.

⁷ Kaikarete siong' ka ameli iyameyamete apaarasia ipu, kodolete kocan arir ka etaun loko Nido. Na kirebokina siong' ekuwam akitolosite, kaikarete siong' wai loka Salimon nama mam ekuwan kejii.

⁸ Ketorete siong' arir keng', kabunore alaro na enyarite Ong'eleja Lokajokan, lo apete ka etaun loko Lasea.

⁹ Abutu siong' kadautu apak epolo noi kang'ina, akitodol na etukuriania akitolosite ka elotete naarai ketuboro Apaaran naka Epucit loka arumakino. Kanuka ng'un, kicorakini Paulo kesi kona:

¹⁰ “Osi, anyut eong' ebe elotete wok alomar kane akitolosit king'aren ebuni akitukurian; emunarosi ibore lu idakito oni ka ameli, itowolikino akijar de.”

¹¹ Konye kosodi loka ajore akitup nu kebala lo keyait ameli kiton nu kebala elope ameli adepar nu kebala Paulo.

¹² Kanu amamare alaro ng'ini nama egwoyananata amelin kejokuna akiboya apak naka akaterot, abutu lu ipu kotiakutu akitolosit ka elotete, kebeikin adolore Foenike. Erait Foenike alaro na egwoyananata amelin ko Kirete na iteosi ka agolitomei-to ka ngalakimak - to.

Ekuwam lo epolo noi kotoma akare

¹³ Kogeuni ekuwam alomun kong'alakimak akikut nedio, ituto ebe ikiliok akitolosit ka elotete kes. Kanuka ng'un, kogeunete elotete kes, koikarete itosomaete ameli itorito arir ka Kirete.

¹⁴ Konye ape ka ape, kokutuni ekuwam lokapolon lo enyarite, “ekuwam lo anyarite nyakol-kide” kinomi alomun kakwap;

¹⁵ na ekamunere ameli, bobo komam kebeikini akiteo ka ekuwam, kacamunete siong' koyaite siong'.

¹⁶ Na akeriarata siong' alaro na imanamanakiito akipi na enyarite Kauda, nes abekinata siong' aking'arakin ataker tetere emam kebilibilar.

¹⁷ Kirikinete ataker kuju ka ameli kotokokinete aunoi akimanamanakin ameli. Kosodete akuriakar ebe ebeikinete kesi anang'akin ka asing'e na ejii kwap ka akipi arir ka Libia. Kanuka ng'un kinyekinete kesi ekuwam koyaite ameli.

¹⁸ Abu ekuwam lo adedeng' kitolosite. Kanuka ng'un, aparan na atupakini, kogeunete kesi acakanikin iboro ice lu kedakit ameli akipi,

¹⁹ apaaran na atupakini, kocakakinete toma akipi iboro ice lu itosomao ayaiter ameli.

²⁰ Mam siong' anyun akolong' kere de akanyere ka apaarasia ipu. Abu ekuwam kitolosite akikut noi. Kokau siong' amuno ebe eyuuno siong'.

²¹ Kedautu lukejaasi ameli alosite ka apak kanakaujan mam kenyemito, kogwoi Paulo koking'aren kes kosodi atemari ebe, “Tia osi kipupito eong' mam alomar ko Kirete; atia mam iboro wok kemunauna kawol ekipone lo.

²² Konye kipokona kemaimait eong' osi, kicasitete! Emam ipede kama kus itowolikini akijar; ameli bon ewolie.

²³ Naarai akware napena kegwoit kowai kang' emalaikat ka Akuju kalo arait eong' lokeng' bobo emae eong' nesi,

²⁴ kosodi atemar ebe, ‘Paulo, mam akurianu! Ejii ijo akigwo koking'aren ka Kaisari. Kanuka ajokus ka Akuju kama kon, nes enyekina nesi akiara lu ejaasi olotete ka ijo.’

²⁵ Kanuka ng'un kisicasitete itau, osi! Naarai amunokit kotoma ka Akuju ebe ikokinosi along'u kwape kalimokiitere eong'.

²⁶ Konye kiyaro oni ong'eleja ka akwap kace na imanamanakito akipi.”

²⁷ Kedol apaaran na kitomon kaung'on, itolosit ekuwam ayaite siong' adokar akare nako Adria, apiarit kiding' kakware kosodete lukepolokito ameli anyun ebe kapiarito kes akwap.

²⁸ Kanuka ng'un kosodete acakakin toma akipi auno na keyenikiite ibore lukalang'irok, kodumunete erait akiduloro ka akipi ifutin akwatat ape ka itomonkaare; king'aren nedio, kocakakinete toma akipi auno na keyenikiite ibore nikelang'ir kodumunete erait akiduloro ka akipi ifutin itomon ka ikanykaung'on.

²⁹ Kosodete akuriakaari ebe kebeikini ameli anang'akin ka amoru. Kanuka ng'un kijesunete kwap kokau ka ameli iboro iwong'on. Kosodete akilipi kobu apaaran.

³⁰ Kanuka ng'unu kotoamakinete lukayaitok ameli akisii; kigwakinete ataker toma akipi kosodete akimolekin ebe elosete kesi alemar iboro ice lu elang'ir koking'aren ka ameli.

³¹ Konye kolimokini Paulo lokapolon ka ajore kiton luka ajore ebe, “Kemam lu epolokiito ameli kideunosi kotoma ka ameli, mam osi kiyuno.”

³² Kanuka ng'un, kosodete luka ajore akitub aunoi nu kikamuto ataker kaisikin koika.

³³ Nedio ering'a akwap kiwalara, kosodi Paulo akimaima kesi kere konyamata inyamat ebala, “lolo nes apaaran na kitomonete kaung'on mam osi kinyemito ibore ipede.

³⁴ Kanuka ng'un, kemaimai eong' osi, konyamata inyamat; itemokina osi akinyam kikotosi osi akijar. Naarai mam etimat epede bon ka akwes kus kitolikino.”

³⁵ Kedau Paulo ejori nu, kirumi emugati, kiyalamikini Akuju koking'aren kes kere, kobilibil, kageun akinyam.

³⁶ Kicasete itawon kes, kosodi ng'ini ipe kama kes akinyam inyamat.

³⁷ Araito siong' kere lu ajaasi toma ameli akwatai aare ka akaisare kikanykape.

³⁸ Nakedauna ng'ini itwan akinyama ka akimonikin, kitebebenete ameli kokipone kaloka acakakin engano kere toma akare.

Abilibile ekuwam Ameli

³⁹ Na kiwalaria akwap, mam kesi anyun akwap konye kogiparete kesi etolim nama atiakunata kesi kebeikinosi itogwoete kesi ameli kaneni.

⁴⁰ Kanuka ng'un kosodete kesi akitub aunoi nu keyenitere ataker, kaisikin kilumokinosi akare. Bobo, kosodete kesi akilac aunoi nu kikamuuto akitoo kokau ka ameli nu kitosomao ayaiter ameli. Kosodete kesi akikiar ekitamba koking'aren ka ameli tetere ekutarit ekuwam ameli king'aren, kaikarete siong' ong'eleja.

⁴¹ Konye konang'i ameli etiipo kasing'e kotoma akipi komamuni alosit; kogwouni king'aren ka ameli komam kebeikini akikunyar, itolosit ekuwam lokapolon noi abilibil kau keng'.

⁴² Kosodete luka ajore akiten ekipone loka akiara lukeyenite kere tetere irebokino kesi akikwang'ar ong'eleja kamotar.

⁴³ Konye kekote lokepolokiit ajore ayuuni Paulo. Kanuka ng'unu, kirebokini kesi asoma nu. Konye kicorakini ng'ulu lu kebeikiito akikwang' kocakakinosi akipi atipet kikwang'arosi ong'eleja;

⁴⁴ kekotokina luce atupakin, irumito baaba akito nuka ameli. Lo nes ekipone lo adoliata siong' kere ong'eleja kotenan.