Aswamisio 26 - AKITUTUKET NAKITETET (NEPEPEKA ISABULIN KA AWARAGASIA)

Inera Paulo koking'aren ka Agripa

¹ Kolimokini Agiripa Paulo ebe, “Kicamakin ijo ejori elope.” Kosodi Paulo arwar akan keng' kageun ejori keng':

² “Anyut eong' ebe arereng' eong' kanu eraitere ebe king'aren kon lolo, Ejakait Agiripa, nes ang'eria eong' ewosane ka Iyaudin kuju kang',

³ naarai ijeni ijo ikisila kere kiton angolopaka Iyaudin naka; kanuka ng'un, elipit eong' ijo kopupok eong' ititikiit.

⁴ “Iyaudin kere ejenete ekipone ka ejautene kang' ape ka akiditeu kang'. Ejenete ekipone ka akijar kang' kere, kotoma akwap kang' kiton Yerusalem.

⁵ Ajenutu kesi kapak kana euja. Kelokokina kesi, ebeikinete kesi alimor, ebe atupa ka itung'a lu ericito ikisila ka edini kosi ajara eong' bala efarisayot.

⁶ Kipokona, agwoi eong' kane atubokino naarai amunokiit eong' amuno yaa na etumunikiit Akuju kes ka tapaa kosi

⁷ nes emunokiito itekerio kosi itomonkaare adumun, ilipete kesi akware ka apaaran. Kanuka amuno kana, nes kewosata eong' Iyaudin, okwai Ejakait!

⁸ kanu kinyo iteoto osi ebe ejaasi icani cut amunokin ebe itajaruni Akuju lukatwak?

⁹ “Eong' elope eituut ebe itemokina eong' asoma ng'ini ibore ni abeikiit eong' asoma aking'ere ekiror ka Yesu loko Nasaret.

¹⁰ Akiro ng'unu nes abu eong' kesoma ko Yerusalem; mam eong' aakipiakin kesi lu ipu aenis bon, konye atupa kapedor alomun kamaka isaserdotin lukapolok, konye na arere kesi kacamakini eong' ario kes.

¹¹ Kesicani eong' kesi irwan ipu kosinagogin bobo katamakin eong' aking'arakin kesi kong'eroto amunokiite; bobo kotoma anyunyura na epolo kuju kes, kesicani eong' kesi atikere adolore oreria lukapolok lu elwaka.

Inera Paulo kuju ka Akibelokin keng'

¹² “Atenikina na nes alosia eong' Damaskas ajaasi eong' ka apedor kiton akicorasia ka isaseredootin lukapolok.

¹³ Kiding' ka apaaran, okwai ejakait, kanyuni eong' etolosit eong' ka elotete kang', acaus alomun kokuju, ecae adepar akolong', ecae imanakiit eong' ka ng'ulu lu alosete ka eong'.

¹⁴ Kebirokinosi siong' kere kwap, keirari eong' eporoto elimokini eong' ka ang'ajep ka Iyaudin ebe, ‘Saulo, Saulo, inyo kisicania ijo eong'? Ikang'asikin ijo along'u bala emong' lo epesi ebela kalokecokon keng'.’

¹⁵ Kasodi eong' aking'it ebe, ‘Ng'ai ijo, Lokapolon?’ Kosodi Lokapolon akinyakun ebe, ‘Arait eong' Yesu lo isicani ijo.

¹⁶ Konye konyou, kogwo; naarai na nes atenikina atakanuna eong' kama kon, aseun ijo ajaanakin ka akitodiar iboro lu iyanyu ijo kama kang' nepepe ka ng'ulu lu etodikini eong' ijo,

¹⁷ ayuni eong' ijo kamaka Iyaudin kiton Ilong'au lu ejukiari eong' ijo nama kes

¹⁸ kanuka ang'ar akonyen kes, tetere ibellkinosi alomun kotoma akirionus alosite acaus, bobo alomun ka apedor ka Asatanit alosite nama ka Akuju, tetere edumunete arimakino ka arokusio kes kiton alaro kamaka ng'ulu kalu italaute ka akiyuun kama kang'.’”

Inera Paulo kuju ka Asoma keng'

¹⁹ Kanuka ng'un, okwai Ejakait Agiripa, mam eong' kabiliti eruja loko kuju,

²⁰ konye kagei eong' alimokini ng'ulu lu ajaasi Damaskas, kotupakini Yerusalem, kiton akwap kere nako Yudea, kiton bobo Ilong'au tetere kesi ibeleunosi nama ka Akuju ka asoma asomisio nu itodunete ebe ebelokinosi kesi.

²¹ Kanuka nu nes kekamunata Iyaudin eong' kotogo ka Akuju ka atamakin akiar eong'.

²² Akitodol lolo, keng'arak eong' Akuju. Kanuka ng'un, agwoi eong' kane etodianari kamaka lucik kiton lukapolok, mam ace nu enera eong' adepar nu atemarito ikadwarak nepepe ka Musa ebe ebunete atubor:

²³ Ebe ejii Kristo akicanakin, bobo, kanuka araus losodit kanyoun kamaka lukatwak, itodiari nesi acaus kamaka Iyaudin nepepe ka Ilong'au.

²⁴ Itolosit Paulo aking'ere nu kiwosatere nesi, koceluni Festo keporoto kaloko kuju ebala, “Paulo, kimerasi ijo ibileri; akisisia kon nakapolon kinaki ijo kimerarete ibileri.”

²⁵ Konye kotemari Paulo, “Mam ibileri kekamuto eong', lokapolon Festo, konye enera eong' abeite bon.

²⁶ Ejeni ejakait iboro lu, inerananasi eong' ka nesi kalakakina; naarai amunokiit eong' mam ibore ipede kamaka lu mam nesi kejeni, naarai mam nu esomao kotoma akirionus.

²⁷ Ejakait Agiripa, imunokiit ijo ikadwarak? Ajeni eong' imunokiit ijo.”

²⁸ Kosodi Agiripa alimokin Paulo, “Kaurianut ibeikini ijo akitaraun eong' Ekristayot!”

²⁹ Kosodi Paulo atemar, “Keuriana kere de keuja, elipi eong' Akuju ebe mere osi bon konye bobo tetere ng'ulu kere lu epupete eong' lolo eraunete kwape kang' emam inyororon lu.”

³⁰ Kosodi ejakait, egavana, ka Bernis, kaluce anyoun,

³¹ kedautu alomar, kosodete kesi alimonokin ebalasi, “Mam etwan lo kisomate ibore ipede ni itemokina nesi atwanare kere de aeno.”

³² Kosodi Agiripa alimokin Festo ebe, “Tia etwan lo elacakiite kere kemam nesi kilipit kotubok Kaisari nesi.”