Aswamisio 25 - AKITUTUKET NAKITETET (NEPEPEKA ISABULIN KA AWARAGASIA)

Ilipi Paulo koyare nesi nama ka Kaisari

¹ Apaarasia auni kedau Festo adolore oprovinsi, kolomari nesi ko Kaisarea alosite Yerusalem,

² nama kiwosata isaserdotin lukapolok kiton lukapolok ka Iyaudin Paulo. Kilipete kesi Festo

³ kisomak kesi ajokus naka ayaun Paulo Yerusalem, naarai kekotosi akiara nesi ko oroto.

⁴ Kobong'okini Festo ebe, “Eyenite Paulo ko Kaisarea, bobo abong'ori eong' elope ng'ina ka apaarasia kadis kanu ebuto.

⁵ Kinyek kolototo lukapolok kon ka eong' Kaisarea kiwosata etwan kisomate nesi ibore ipede nikaronon.”

⁶ Kiboi Festo ka kesi apaarasia ka akanykauni kere atomon, koikari nesi Kaisarea. Apaaran na ketupakini, kosodi akiboikin kwap kama etubonokinere kicorakini koyaune Paulo.

⁷ Na kedoluna Paulo, kotukokinosi Iyaudin alomun ko Yerusalem elukakito nesi, kogeunete akiwosa Paulo, ewosa lo mam kesi kebeikinete alemun akirot naka abeite.

⁸ Kigang'ar Paulo elope ebala ebe: “Mam ibore ipede esomate eong' nika akibil ekisil ka Iyaudin kere nika akitoron Etogo ka Akuju kere nika akitepeg Kaisari.”

⁹ Konye kekote Festo akisomakin Iyaudin nakajakok. Kanuka ng'un, kosodi nesi aking'it Paulo, “Ilokokina ijo alosite Yerusalem, kotubokine ijo kuju kanu kiwosatere ijo koking'aren kang'?”

¹⁰ Konye kotemari Paulo ebe, “Agwoi eong' kama etubonokina Kaisari itung'a, nama ekotokinar atubokin eong'; mam eong' kesomakit Iyaudin nukarokok, kwape ijeniata osi kotenan.

¹¹ Karono eong', bobo kesomate eong' ibore ipede ni elesikina eong' atwanare, mam eong' kelipit akikuu atwanare; konye kemam abeite kamaka akiwosa kes eong', emam itwan ipede ebeikini ayar eong' nama kes. Elipit eong' koyare eong' nama ka Kaisari.”

¹² Kedau Festo akiirar kalukecorak nesi, kosodi akinyakun ebe, “Ilipi ijo koyare ijo nama ka Kaisari, kanuka ng'un nama ka Kaisari nes ilosi ijo.”

Paulo koking'aren ka Agripa kiton Banis

¹³ Ketuborosi apaarasia adis, kosodi ejakait Agripa kiton Banis adolun Kaisarea akidiaun Festo.

¹⁴ Itolosito kesi akiboi kang'ina ka apaarasia ipu, kosodi Festo alimokin ejakait kuju ka Paulo ebala ebe, “Ejii etwan lo enyekini Feliks eyenite;

¹⁵ na ajaare eong' Yerusalem, kosodete isaserdotin lukapolok kiton imojong' ka Iyaudin ayaun akiro kuju keng', ing'isito koyenai nesi.

¹⁶ Kabongokini eong' kesi ebe mam kerait ekisil ka Iromayon atubokin lo iwosate ering'a nesi kiriamakini nepepe ka ng'ulu lu iwosato nesi, bobo ainakino apak naka aking'ere nu iwosatere nesi.

¹⁷ Na abuniata kesi ne, mam eong' abu kamunau apak, konye apaaran na atupakini kasodi eong' akiboikin nama etubonokinere itung'a kijukiari eong' koyaune etwan.

¹⁸ Na agwoyata luka ewosa, mam kesi ayaun amonyatait apede kuju keng' nuka arokusio kwape eitutere eong'.

¹⁹ Nu kejaasi ka kesi kerait apega adiosi ka nesi ikamut ekipone kes loka akilipi kiton kuju ka etwan kalo enyarite Yesu lo atwana, konye ebala Paulo ebe ejari.

²⁰ Na kekaria eong' amoun akiro nu, keng'isi eong' nesi kekote alosite Yerusalem atubokino kang'ina ikamut ewosan lo.

²¹ Konye na kilipia Paulo kotubok Kaisari nesi, kecorakini eong' kidarai nesi akitodol na abeikina eong' akijukiar nesi nama ka Kaisari.”

²² Kolimokini Agiripa Festo ebe, “Ejii eong' elope akiirar kamaka etwan kalo.” Kotemari Festo, “Imoi, iirari ijo nesi.”

²³ Kanuka ng'un, apaaran na ketupakini, kosodi Agiripa kiton Banis abunere elakara noi. Kolomete kesi otogo loka akiriamanakin ka itung'a ejaasi kesi kiton lukapolok ka ajore kiton itung'a lukejenuna ko ore ka lokapolon. Koyaunete Paulo toma atupa ka akicorasit ka Festo.

²⁴ Kotemari Festo, “Ejakait Agiripa kiton ng'ulu kere lu ejaasi ka siong', kiteete, etwan lo ewosata Iyaudin kere kama kang', ko Yerusalem kiton ne, ecelasi ebe mam kitemokina nesi bobo akijar.

²⁵ Konye adumu eong' ebe mam nesi kisomat ibore ipede ni itemokina nesi atwanere; konye na elipia nesi elope ebe kotiaku Kaisari, kasodi eong' akijukun nesi.

²⁶ Konye mam eong' ibore ipede nika abeite ni egirakini eong' lokapolon kang' kuju keng'. Kanuka ng'un, ayau eong' nesi nama kon, Ejakait Agiripa, ebe, kidautu oni aking'itng'it nesi, ajaikinosi eong' ka ibore nikigira.

²⁷ Naarai, mam kideere kama kang' ayari lo eyenite mam kitodiarite nu iwosatere nesi.”