Aswamisio 24 - AKITUTUKET NAKITETET (NEPEPEKA ISABULIN KA AWARAGASIA)

Ewosan kuju ka Paulo

¹ Kedaunosi apaarasia akany, kosodi Anania, esaserdotit lokapolon abunere nenipe ka imojong' kiton lo egwoikit luce kojor lokenyarite Tatulus. Kitodikinete kesi egavana nu iwosatore kesi Paulo;

² na kenyaraunere Paulo, kogeuni Tatulus akiwosa nesi, ebala ebe. “Lokapolon! ayaite kon naka acoa kainu siong' apak na euja noi naka ainapakna, bobo isomasi akibelosia nukajokak nukakitojokon akwap wok.

³ Idiautosi siong' nu kang'in ilaru akolong'ia kere, bobo kiyalamikito siong' ijo noi.

⁴ Mam eong' kakote ayar akolong' kon na epol. Kanuka ng'un, elipit eong' ijo kasianut kon, kopupok siong' nedio.

⁵ Ibutu siong' kadumutu etwan lo erono noi; egeunene ejie kamaka Iyaudin kere ka akwap kere, bobo erait nesi lokapolon ka Inasarayon.

⁶ Atamit akitoron Etogo ka Akuju, konye kekamunete siong' nesi.

⁷ King'it ijo nesi, anyuni ijo elope ebe eraito nu itubokito siong' nesi abeite.

⁸ King'it ng'it ijo elope nesi, ijenuni ijo elope kama keng' kuju kang'in ibore ni itubokito siong' nesi.”

⁹ Kigang'ete Iyaudin de atubonokino na, isicasito ebe nu kere keraito abeite.

Abong'okinete ka paulo koking'aren ka Feliks

¹⁰ Kedau egavana akikiekin Paulo akani kinere, kobong'okini Paulo ebe. “Na anyuna eong' ebe kokaru kalu ipu ijo nes itubonok itung'a ka akwap kana, alakara eong' noi aking'ere nu atemar kuju kang'.

¹¹ Kwape ibeikitetere osi amoun, mam apaarasia atomo kaare ketuboro ape kalosia eong' kuju Yerusalem akilipi.

¹² Mam Iyaudin adumun eong' etepegi itwan ipede kotogo ka Akuju, kere de mam kesi kadumuto eong' ecori itung'a ejie kosinagogin kere de kalaro kere ko ore ka Lokapolon.

¹³ Bobo mam kesi kebeikinete akitodikin ijo nukiwosata kesi eong'.

¹⁴ Konye acamut eong' nu koking'aren kon, ebe ikamut atupite erot kalu iyuuto, Erot lo ebalasi kesi ebe loka aliokou, elipi eong' Akuju kes ka tapaa wok, kamunokite ng'ini ibore ni ebala ekisil kere igirito ikadwarak,

¹⁵ ajaasi eong' ka amunokina kamaka Akuju na ecamuto lu ikulopek, ebe ejaikin akitajaruno kalu edolito kalu mam kedolito.

¹⁶ Kanuka ng'un atamakiit eong' ng'ini pak ajaus ka awomowomosia nukajokak koking'aren ka Akuju kiton itung'a.

¹⁷ “Ketuborosi ikaru idis, kabuni eong' ainun itung'a luka akwap kang' aking'arasit kiton ileman.

¹⁸ Etolosit eong' asoma nu, nes kadumunata kesi eong' kotogo ka Akuju, kadau eong' asoma epucit loka akitalauno. Amam eong' kajaasi ka anya ka itung'a bobo amam akinyaluna apede.

¹⁹ Konye ajaasi Iyaudin ice alomun koprovins kaloko Asia neni; ejii kesi ikulopek abunore nama kon, kolemutu ewosan kes kejaasi kesi ka ibore kipede ka eong'.

²⁰ Kere de kinyek lu ejaasi ne kolimosi nukarokok nu kedumuto kesi esomate eong' na agwoya eong' koking'aren ka ebarasa,

²¹ kemam kerait ibore ipe bon ni alimuni eong' na agwoya eong' koking'aren kes ebe, ‘Kitubokinete osi eong' lolo kanuka amunokitere eong' ebe itajaruno lukatwak!’”

²² Kosodi Feliks, lo kejeni kotenan kuju ka Erot, kodauni ekesi ebala, “Na eduluna ekomanda Lisias,” kolimokini nes kesi, “Atiakuni eong' akiro kon.”

²³ Kicorakini nesi loka ajore kidar Paulo, konye koisikite nesi alakakina nedio bobo acamakin ipoupatin keng' king'arakisi nesi ibore ni ekote.

Paulo koking'aren ka Feliks kiton Drusila

²⁴ Ketuborosi apaarasia adis, kobunete Felik ka aberu keng' Drusilla, na kerait Ayaudit; kosodi akijukiar konyaraune Paulo, kosodi akipup nesi inera kuju ka akiyuun kotoma ka Kristo Yesu.

²⁵ Konye itolosit Paulo ejori kuju ka ajokus, ka ayaitoi, kiton abunere ka Apaaran ka Atubobonokino, kosodi Feliks akuriana, kosodi atemar, “Ibeikini ijo aikar kipokona. Kanyarauni eong' ijo bobo kadumu eong' apak.”

²⁶ Bobo kemunokit nesi ebe einakini Paulo nesi ikabel. Kanuka nu, kijukianari nesi konyarakine nesi Paulo irwan ipu kinerata ka nesi.

²⁷ Konye ketuborosi ikaru iare, koyari Porkio Festo ekicolong' loka egavana; kosodi Feliks akinyekin Paulo ka aenis ekote akitalakar Iyaudin.