Aswamisio 23 - AKITUTUKET NAKITETET (NEPEPEKA ISABULIN KA AWARAGASIA)

¹ Kideriikini paulo akonyen keng' obarasa, kotemari, “Ikinacan kang' luko Israel! Elae etau kang' koking'aren ka Akuju ikamut nu esoma eong' ka akijar kang' akitodol lolo.”

² Kicorakini esaserdotit lokapolon lokenyarite Anania ng'ulu lukegwoete apete ka nesi kibapata nesi akituk.

³ Kolimokini Paulo nesi ebe, “Kibung'aete osi Akuju, osi arwatan nu ekwang'aka, nu etakanete koking'a ejoka konye toma ileleba abosus! Iboyete osi atubokin eong' atupa ka ekisil, konye kobilete osi ekisil kokipone kaloka akicorakin kibung'ai eong'?”

⁴ Kotemarete ng'ulu lukegwoete kawai ebe, “Irasi ijo esaserdotit lokapolon ka Akuju?”

⁵ Kotemari Paulo ebe, “Amam eong' kajeni, ikeyunak, ebe kerait nesi esaserdotit lokapolon; naarai igirite, ‘Siri kinere nukarokok kuju ka ejakait ka itung'a kon.’ ”

⁶ Konye nape kejenuna Paulo ebe keraito ice Isadukayon, keraito ice Ifarisayon, kiworoe nesi ko obarasa, “Ikanacan kang', arait eong' Efarisayot, esapat ka Ifarisayot; kanuka amuno kiton akitajaruno kalukatwaka nes katubokinere eong'.”

⁷ Nape ketemara nu, kosodete Ifarisayon kiton Isadukayon ageun ang'olopa, kosodi atuket atiak.

⁸ Naarai Isadukayon ebalasi ebe emam ajarun kamaka lukatwaka, kere imalaikan, kere emoyo; konye Ifarisayon ecamuto ng'unu kere.

⁹ Kojaikin acela nakapolon noi; kosodete ice lukesisianakinak ikisila, ng'ulu lukeraito luko wai ka Ifarisayon akigwo ka apegakin ebe, “Mam siong' kanyuto ibore ipede nikaronon kamaka etwan kalo. Abo kere kelimokit emoyo kere de emalaikat nesi?”

¹⁰ Abu apega kopolor noi akitodol na akurianarere lokapolon ka ajore ebe ebeikinete akibetebete Paulo. Kanuka ng'un, kicorakini nesi luka ajore keng' kolototo atuket ng'in, kolemasi Paulo kama kes, koyasi nesi obaraks.

¹¹ Akware naketupakini, kogwoi Lokapolon kowai ka Paulo, kotemari, “Mam akurianu, naarai ekipone lo itodiara ijo kuju kang' ko Yerusalem, nes itemokinar ijo akitodiar ko Roma de.”

Itemetemete Iyaudin ekipone loka akiar Paulo

¹² Taparacu na ketupakini, kosodete Iyaudin ice akiriamakin nenipe ka akote ekipone loka akiar. Kiyapokinete ebe mam kesi kenyemete kere de kemasete ibore ipede ering'a kesi kara Paulo.

¹³ Kejaasi ikiliok edeparito akaisaung'on lu ketiakuto nu.

¹⁴ Kosodete alosite nama ka isaserdotin ka lukapolok kiton imojong', kotemarete, “Eyapokisi siong' cut mam akiir inyamat ering'a siong' karia Paulo.

¹⁵ Kanuka ng'un, osi nepepe ka ebarasa, kijukiasi akirot nama ka lokapolon kaluka ajore koyautu nesi kwap nama Kus, imolete osi adumun akiro nuka abeite kuju. Ilokokina siong' akiar nesi ering'a nesi kebuna ne.”

¹⁶ Konye kosodi oceni ka Paulo akiirar kuju ka ekipone kaloka akiar Paulo; kanuka kolosi nesi akilom obaraks kalimokin Paulo.

¹⁷ Kosodi Paulo anyaraun lo epolokit ajore akwatata ape kosodi alimokin nesi ebe, “Koyaa esapat lo nama kalo epolokiit ajore; ejaasi nesi ka ibore ni ekote alimokin nesi.”

¹⁸ Koyari loka ajore nesi nama kalo epolokiit ajore, kotemari, “Abu Paulo, lo eyenite konyarau eong' kosodi akilipi eong' kayau eong' esapat lo nama kon, naarai ejaasi ka ibore ni ekote alimokin ijo.”

¹⁹ Korikori lo epolokiit ajore nesi awai, kosodi aking'it nesi ebe, “Inyena ikote ijo alimokin eong'?”

²⁰ Kotemari nesi ebe, “Eirarosi Iyaudin aakilip ijo ayaun Paulo obarasa imoi, imolete ekotosi kesi ajenun kotenan kuju keng'.

²¹ Konye mam acamakin kesi; naarai ejaasi kesi ikiliok edeparito akaisawong'on elokokina akikamun nesi. Eyapokisi kesi mam akinyam kere de akimat ering'a kesi kara nesi; kipokona elokokina, iderito akiirar nu itemari ijo.”

²² Kosodi lo epolokiit ajore aisikin esapat koika, elimokiit nesi ebe, “Mam alimokin itwan ipede ebe ilimoki ijo eong' nu.”

Ijukiaro Paulo nama ka egavana Feliks

²³ Kosodi nesi anyaraun luka ajore iare lu epolokiito akwatata ka ajore kalimokin kesi, “Kedol isaan iuni luka akware, kolokokisi luka ajore akwatai aare kiton luketekerak afarasin akaisakanykaare kiton lukakwaras akwatai aare alosit Kaisaria.

²⁴ Kolemutu afarasin ace kodakata Paulo, koyaasi nesi kotenan nama ka egavana Feliks.”

²⁵ Kigiri nesi epopula ekipone lo.

²⁶ “Eong' Klaudius Lisias nes egirakiit ijo lokapolon egavana Feliks. Emalan.

²⁷ Etwan lo ekamuto Iyaudin, asalari kesi akiar nesi apak na abunia eong' nama kes nenipe kaluka ajore ka ayun nesi, na ajenuna eong' ebe nesi Eromayot.

²⁸ Akote eong' ajenun inyena kerait amonyatait kes kuju keng', kayauni eong' nesi obarasa kes.

²⁹ Kadumuni eong' ebe kiwosate nesi kuju ka ikisila kes, konye mam atubokin nesi ibore ipede ni kilesikina nesi ario kere de aeno.

³⁰ Na etodokinere eong' ebe ekotosi itung'a akiar etwan lo, kejukuni eong' nesi nama kon atipet, ecorakiit eong' ng'ulu lu de lu kiwosato nesi kolimokisi ijo nu ejaasi ka kesi ka nesi.”

³¹ Kosodete luka ajore akisomakin kwape kicorakitere kesi. Kirumete kesi Paulo kayar nesi akwap naka Antipatris akware ng'in.

³² Apaaran na ketupakini, kobong'orete kesi nama iboyata obaraks, kinyekinete luketekerak afarasin elosete ka Paulo ko olotete.

³³ Na kedoliata kesi Kaesarea ka ainakin egavana epopula, kigwakinete kesi Paulo de akanin ka egavana.

³⁴ Na kisoma egavana epopula kosodi nesi aking'it Paulo nesi loko oprovins kali. Na kejenuna ebe kelomut nesi ko Silisia

³⁵ kotemari, “Apupokini eong' ijo kedolutu lu kiwosatosi ijo.” Kicorakini kidarai Paulo kama kiboya Erode.