Aswamisio 22 - AKITUTUKET NAKITETET (NEPEPEKA ISABULIN KA AWARAGASIA)

¹ “Ikinacan ka kes ka papa, kiirasi nu egang'ia eong' akwana kang' koking'aren kus.”

² Nape kiirarata kesi nesi isineri kesi ka ang'ajep ka Iyaudin, kotaunete ti noi. Kotemari nesi:

³ “Arait eong' Eyaudit lo edouno ko Tarso ko Silisia. Ketopolouno eong' ko ore kalo, adumuni eong' akicorasia ka Gamaliel. Esisiate eong' atupa ka ikisila kes kataapa wok. Alemuna eong' noi akisomakite Akuju kwape isomata osi kere lolo.

⁴ Esicanit eong' itung'a lu atupito Erot lo akitodol akiara. Ekamit eong' ikiliok kiton aberu ka acakanikin kesi aenis.

⁵ Esaserdotit lokapolon nenipe ka ebarasa kere ebeikiito osi akitodiar ebe enera eong' abeite. Adumut eong' ipopulan alomun kama kes lu egirakite Iyaudin wok luko Damaskas. Kalosi eong' ng'ina akikama itung'a luka akinyakun kesi Yerusalem etokite kinyororon kisicanai kesi.”

Enera Paulo kuju ka Akibelokin keng'

⁶ “Etolosit eong' ka elotete kang', ka apiari Damaskas, apiarit kiding' ka apaaran, ape ka ape kocaikini eong' akolong' naka polon alomun kokuju.

⁷ Kasodi eong' akibirokin kwap, keirari eong' eporoto elimokini eong' ebe, ‘Saulo, Saulo, inyo isicania ijo eong'?’

⁸ Kenyakuni eong', ‘Ng'ai ijo, Lokapolon?’ Kolimokini eong', ‘Arait eong' Yesu loko Nasareti, lo isicani ijo.’

⁹ Kwanyunete lu aupasi ka eong' acaus konye mam akirar eporoto kalokisineri eong'.

¹⁰ Keng'isi eong', ‘Inyena ekokini eong', Lokapolon?’ Kosodi Lokapolon alimokin eong' ebe, ‘Konyou, kolot Damaskas, kilimokino ijo kang'ina ng'unu kere nu aseun ijo asoma.’

¹¹ Kanu amamare eong' abeikini akitere kanuka apolou ka acaus, kosodete ng'ulu lu ajaasi ka eong' arikite eong' kadolore Damaskas.”

¹² “Kosodi Anania, etwan lo kericit noi ikisila, lo kinerasi Iyaudin kere lukiboyete kang'ina nukarokok kuju keng',

¹³ abunere nama kang', kolimokini eong' egwoi kowai kang', ‘Onac Saulo, kodum apedor kon naka akitere.’

¹⁴ Kotemari, ‘Abu Akuju ka papa wok koseu ijo ajenun nu ekote nesi, anyun lo Edolit kiton akiirar akiro alomun ka akituk keng';

¹⁵ naarai itodiari ijo kuju keng' kamaka itung'a kere nu iyanyu ijo kiton akiirar.

¹⁶ Kanuka ng'un, inyena iderit ijo? Konyou kibatisai ijo, kilotai arokusio kon, kinyarau ijo ekiror keng'.’

Anyarauno ka Paulo alimonokin luka akwap

¹⁷ “Kabong'ori eong' Yerusalem. Ering'a eong' elipi kotogo ka Akuju, kanyuni eong' eruja,

¹⁸ kanyuni eong' Lokapolon elimokini eong', ‘Kisunyak, koloma ko Yerusalem atipet, naarai mam kane kiyunete akitodiaret kon kuju kang'.’

¹⁹ Katemari eong', ‘Lokapolon, kesi ikulopek ejenete ebe kang'olo osinagogi ka Iyaudin ekamit eong' ka akibung'a ng'ulu lukemunokiito ijo.

²⁰ Na arere eketodiaran kon Stefan, eong' elope ajii neni, acamakiit ario keng' bobo edari inagai ka ng'ulu lu arete nesi.’

²¹ Nesi alimokin eong', ‘Koika, naarai ejukiari eong' ijo nama kalwanan noi nama ka Ilong'au.’ ”

²² Kopupokinete kesi nesi akitodol nama atamaria nesi akirot na; kocelunete ebalasi, “Kolemasi itwan kwape ng'ini kotoma akwap! Naarai mam kitemokina nesi akijar.”

²³ Itolosito kesi acela kiton ibwakibwakete inagai kes ka acakanar apua kuju.

²⁴ Kosodi lokapolon ka ajore akicorakin itung'a keng' koyautu Paulo obaraks, kolimokini kesi kibung'ata nesi tetere ejenunete kesi inyo kecelatatar kona Iyaudin kuju keng'.

²⁵ Konye nape kedaunata akitok nesi atia akibung'a, king'isi Paulo loka ajore lo kegwoi kaneni, “Ecamakiit Ekisil osi akibung'a Eromayot lo mam ketubokiite ibore kere?”

²⁶ Nape kiirara loka ajore nu, kosodi nesi alosite nama ka lokapolon ka ajore kosodi aking'it nesi, “Inyena isomae ijo? Erait etwan ng'olo Eromayot!”

²⁷ Kosodi lokapolon ka ajore alosite nama ka Paulo ka aking'it nesi, “Kolimok eong' irait ijo Eromayot?” kobong'okini Paulo ebe, “Ebo”.

²⁸ Kotemari lokapolon ka ajore, “Abu eong' katac ikabel ipu noi araun Eromayot.” Kobong'okini Paulo ebe, “Konye eong' arait Eromayot ape ka akidouno.”

²⁹ Atipet kosodete itung'a lu kekotosi aking'iting'it Paulo akinyekin; kosodi lokapolon ka ajore akuriana nape kejenuna ebe erait Paulo Eromayot bobo ketokit nesi Paulo kinyororon.

Ejii Paulo king'aren ke Ebarasa

³⁰ Kekote lokapolon ka ajore ajenun abeite inyena amonyatait ka Iyaudin kuju ka Paulo; kanuka ng'unu apaaran na ketupakini kolacari inyororon ka akanin ka Paulo kosodi akicorakin esaserdotit lokapolon nenipe ka ebarasa kere akiriamakin. Kosodi nesi ayaun Paulo ka akitogwo nesi koking'aren kes.