Aswamisio 21 - AKITUTUKET NAKITETET (NEPEPEKA ISABULIN KA AWARAGASIA)

Eikari Paulo Yerusalem

¹ Kidautu siong' alomar kama kes ka aikar itosomaete ameli kalosete siong' Kos, apaaran na atupakini Rodes, alomar kaneni alosite Patara.

² Kadumunete siong' kaneni ameli na alosi Foenisia, kadokete siong', ka aikar.

³ Kadoloto siong' nama eteoto siong' Saipras, kenyekinete siong' nesi koteten kaikar Siria, kadolore Tiro; naarai akotokina ameli akitodokun iboro kang'ina.

⁴ Na adumunata siong' lukeyunak, kasodete siong' akideun kang'ina apaarasia akanykaare. Koinakini Emoyo Lokalaunan kesi apedor naka alimokin Paulo mam alosite Yerusalem.

⁵ Na adaunototor apaarasia kosi kang'ina, kalomarete siong' ka akitolosite ka elotete kosi; kosodete kesi kere, aberu kiton idwe akinyamakin siong' akitodol na alomariata siong' king'a ka ere; kasodete siong' akukokin kokitala, ka akilipi ka kisidarkin.

⁶ Kaikarete siong' akidok ameli, kobong'orete kesi ore.

⁷ Kidautu siong' elotete alomun ko Tiro, kadolete siong' Tolemais; kemalaete siong' ikeyunak ka akideun ka kesi apaaran ape.

⁸ Apaaran na atupakini kalomarete siong' ka adolore Kaisaria. Kasodete siong' kang'ina akiboi ko otogo ka Pilipo, epe kamaka itung'a kalu keseute aking'arakite ko Yerusalem.

⁹ Kejaasi nesi ka apesur aung'on nu kemam kemanyakina, nu kedwarenenete.

¹⁰ Ering'a siong' itolosito akiboi ka apaarasia adis, kosodi ekadwaran lokenyarite Agabus abunere alomun ko Yudea.

¹¹ Na abunia nesi nama kosi, kirumi arokoba ka Paulo akejen keng' kiton akanin, kosodi atemar, “Nu nes ebala Emoyo Lokalaunan, ‘Epone lo nes etokiata Iyaudin ko Yerusalem elope arokoba na ka akigwakin nesi akanin ka Ilong'au.’ ”

¹² Na ipupunata siong' nu, kasodete siong' nenipe ka itung'a luka ng'ina akimaima Paulo mam alosite Yerusalem.

¹³ Konye kinyakuni nesi ebe, “Inyena isomaete osi, imonyete ka abilibili etau kang'? Naarai mere ayeno bon alokokina eong' konye atwanare de ko Yerusalem kanuka ekiror ka Lokapolon Yesu.”

¹⁴ Na ekaria siong' akimaima nesi, kenyekinete siong', kasodete siong' atemar, “Kisomakinosi nu ekote Lokapolon.”

¹⁵ Ketuborosi apaarasia nu, kasodete siong' alokokin aikar Yerusalem.

¹⁶ Kosodete lukeyunak ice luko Kaisaria aupar ka siong', ka ayar siong' otogo ka Mnason loko Saipras, ekeyunan loka sek lo aperete ka siong'.

Ipejokini Paulo Yakobo

¹⁷ Na adoliata siong' Yerusalem, kosodete ikeyunak akidiaun siong' kalakara.

¹⁸ Apaaran na atupakini, kolosete Paulo ka siong' nama ka Yakobo; bobo ajaasi imojong' kere neni.

¹⁹ Kedau akimala kesi, kosodi nesi akiniminimakin kesi iboro kere ipe ka ipe lu kisomak Akuju Ilong'au.

²⁰ Nape kiirarata nu, koinakinete Akuju aibuses. Kolimokinete nesi, “Bong' itee ijo, onac, ekosai aritai ki Iyaudin arautu lukeyunak, kiton ekipone lo elemuna kesi aricite Ikisila.

²¹ Adaun alimokin kesi kuju kon ebe isisianakini ijo Iyaudin kere lu ejaasi nama ka Ilong'au ebe kong'eroto Musa, ilimonokini ijo kesi mam akitub idwe kes kere de aricakite Ikisila.

²² Inyena konye ikokino? Abeit ejenunete ebe ibu ijo.

²³ Kanuka ng'un kisomak nu kilimokinete siong'; ijo. Ejaasi itung'a iwong'on lu eyapokisi;

²⁴ koya itung'a lu kitalau akwana kon ijo nenipe ka kesi, kotac nu itosomaete, tetere ebarenete akwes kes. Kanuka ng'un ejenunete itung'a kere ebe emam abeite kamaka ng'un kanu alimokin kesi kuju kon adepar ebe ijo elope iricakit Ikisila.

²⁵ Konye ikamut Ilong'au lu eyutu, ejukutu siong' ebaruat itiakuto siong' ebe ekotokina kesi kinyekinosi ka inyamata lukitoroni kanuka alemikin akujun. Bobo kinyekinosi kesi ka aokot kiton ibore ni emiedite. Bobo kinyekinosi ka adoteu.”

²⁶ Apaaran na atupakini, kosodi Paulo ayar itung'a ng'ulu kosodete asoma epucit nenipe loka akitalauno. Kolomi Otogo ka Akuju ka alimokin itung'a kuju ka esial ka apaarasia kanuka akitalauno kiton kuju ka ileman lu elemikino ng'ini ipe kama kes.

Ikamuno Paulo kotogo ka Akuju

²⁷ Aputo apaarasia akanykaare adaun, kosodete Iyaudin alomun ko Asia, lukanyuto nesi kotogo ka Akuju, akinyalun anya ka itung'a, kikamunete nesi,

²⁸ emonyete, “Itung'a luko Israel, king'arakisi siong'! Lo nes etwan lo isisianakini itung'a ka ng'ini ilaro akiro nuka aking'ere itung'a luko Israel, nuka aking'ere ikisila ka Musa kiton alaro na nakalaunan. Bobo etolom Igirikin Otogo ka Akuju, etoron alaro na nakalaunan na.”

²⁹ Naarai kanyuto kesi sek Trofimus loko Efeso ejaasi nenipe ka Paulo ore lokapolon, kotiakunete kesi ebe keyaut nesi Otogo ka Akuju.

³⁰ Ere kere akinyalun, kosodete itung'a akerit atukokin nenipe; kikamunete kesi Paulo, kigwosarete nesi king'a ka Etogo ka Akuju, kogolokinete irutei atipet.

³¹ Itolosito kesi akote ekipone loka akiar nesi, kodolokini akirot lokepolokiit ajore ka Romayon ebe enyalun Yerusalem.

³² Atipet kosodi Lokepolokiit ajore ayar lukajore kalu epolokito aritai ka ajore amotari nama kes. Nape kanyunata itung'a nesi ka ajore, kinyekinete akibung'a Paulo.

³³ Kobuni lokapolon kajore ka akikamun Paulo. Kicorakini kotokoi nesi kinyororon kiare. King'itanari nesi ajenun ng'ai nesi.

³⁴ Kocelunete ice kokiding'a ka akwap ka itung'a ibore ipe, luce ice; bobo mam nesi ajenun akiro kaunu ka acelaka, kicorakini nesi koyaune Paulo obaraks.

³⁵ Nape kedolia atutuot ka ekek, kodakete luka ajore nesi, kanuka akinyaluna ka anya ka itung'a;

³⁶ naarai ketupito kokau anya ka itung'a, ecelasi ebe, “Kodaune!”

Egang' Paulo Akwan Keng'

³⁷ Aput luka ajore akitolom Paulo toma obaraks, kolimokini nesi lokapolon ka ajore, “Kenyek kalimok eong' ijo ibore?” Kotemari nesi, “Ijeni ijo Agirikini?

³⁸ Mere ijo etwan alomun ko Misiri lo asoduni ejie ikolong'e iyait komoding' itung'a aritai aung'on luka araka?”

³⁹ kobong'okini Paulo ebe, “Arait eong' Eyaudit, alomun ko Tarso ko Silisia etwan loko ore kalo mam kedit; kelipit eong' ijo, koisik eong' kenerata ka itung'a.”

⁴⁰ Na kecamakina nesi, kosodi Paulo akigwo ka aatutuon, kikiakini itung'a akani; na ketaunata ti, kolimokini kesi ka ang'ajep ka Iyaudin ebala.